قرار !!

أكرم الصوراني

الحوار المتمدن-العدد: 4806 - 2015 / 5 / 14 - 00:51
المحور: مواضيع وابحاث سياسية
    

قررت أصير إنسان عادي يعني عادي زي كتير ناس عاديين لا رايب ولا شمينت والشمينت لبن اسرائيلي تصل نسبة الدسم فيه أكثر من العادي بكثير ويستخدم في العادة مع القشطة لزوم القطايف والقطايف بالمكسرات في تقديري أطيب وأهلا رمضان الوضع وحوي يا وحوي أقصد "أندركونترول" مع إنه البلد ماشيه ع البركة من غير "أندروير" وجووون .. جون يا شباب .. هتافات ومسيرات شبابيه حاشدة تنطلق الآن داخل كافيهات القطاع وأسبانيا تدعو "رعاياها" في غزة لضبط النفس و"شِيَش" رايحه وأراجيل جايه وهيصه وحد الله وحدود السبعة وستين ما أنا فاهم مين دَخَّل جون في مين أو فاهم وعامل إنه عادي أو عامل نفسه يرجع يشتغل باسرائيل أو عامل باطون أو عامل خريج أو عامل موظف أو عامل قيادي أو عامل محلل سياسي أو عامل أمين عام أو أمين مخزن أو أمين صندوق أو أمين شرطه أو أمين السبب يعني كإني مش فاهم ولا إشي أو يعني عادي جدا حمار جدا لا بحكي بسياسة ولا بفهم بالاقتصاد ولا بالجغرافيا ولا بالتاريخ ولا بالاخراج ولا بالتصوير ولا حتی في الكورة انه عادي عادي من غير هدف ومن غير منطق وبلا وجع قلب ولا قسطرة بول وبلا فلسفه زايدة وليش حماس طخت ع فتح وليش فتح طخت ع حماس وليش "الخمسه بلدي" وليش ضاعت بلدي وليش الانفجار الداخلي بالقرب من مش عارف إيش وليش بدائل أبو زهري ستكون قاسيه اذا مش عارف شو وليش ما تكون طريه عشان ستي مركبه ضبه وليش قانون الضرايب وليش اللي مش عاجبه التكافل يروح ينصرف ع الضفة وليش عشان تدخل الضفة بدك تصريح وليش عشان تآخد تصريح تعمل تنسيق وليش التنسيق الأمني مقدس وليش وضعنا مقدوس وليش العرب مش فاضيين وعندهم زهايمر بخصوص فلسطين وليش فلسطين محتله وليش بغداد ضاعت وليش عيب "دولة غزة" وليش المؤتمر السابع لفتح ما انعقد وليش فضحوا الدنيا لما أحمد يوسف حكی حماس بتدردش مع اسرائيل وما فضحوها لما أبو مرزوق حكی مش حرام نتفاوض مع اسرائيل وليش اليسار ودن من طين وودن من عجين وليش غزة بالايد ولا انتخابات ع الشجرة وليش أنا مش ناوي أكتب في ذكری النكبة ومرور (67) سنة علی كفاح الشعب الفلسطيني وليش في ناس ما بتستحي وبتحكي "شعب غزة" وليش في ناس بتسب ع التليفون وع جوال وع الفواتير وليش الاتصالات صرفت ملايين علی "مين سليم !!" ومين زفت ؟ وليش سأكتفي بدقيقة صمت وأبوح لكم أن إحياء ذكری النكبة مع اقتراب ذكری الانقسام يا قلة أدب يا قلة حيا يا قلة عقل .. وعلی فكرة عادي بتصير في أوسخ التنظيمات !!


مايو/2015

#أكرم_الصوراني (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات