انا حبيت دولة الكويت

جان نصار

الحوار المتمدن-العدد: 4779 - 2015 / 4 / 16 - 16:30
المحور: كتابات ساخرة
    

في العام الماضي كتبت مقال عن مؤتمر القمه العربيه في الكويت بعنوان: قمة يا ريت في الكويت وبالامس كان هناك مؤتمر: انا حبيت دولة الكويت واللي اتخذوا فيه قرارات كتير مهمه عن عدة قضايا مش قادر اتذكر ولا واحده من هالقرارات اد ما كنت مهمه .لكن علقت في راسي اهمية قضية تجميع مساعدات لسوريا بقيمة 3مليار ونص وشوية كسور وفراطه اكم مليون ما دققت كتير بعددها.الامم المتحده ورئيسها بوكيمون كمان كان حاضر هون وقال ان المساعدات المقدره كان لازم تكون بحدود ال9 مليار.
الكويت طرقت على الطاوله 500 مليون وحبه وامريكا 500 مليون وشحطه والامارات 100 مليون وقطر مليون بالون وذيل القائمه السعوديه 60 مليون.(على اساس هي الافقر وما كانت احد اسباب التوليعفي سوريا وغيرها من العالم العربي)
المصاري وهاي الفلوس اكيد مش للنظام هاي مشان المسخمين والملطمين والمشحرين مجموعات من الملاين السورين اللي اليوم في المنافي مشردين وصاروا لاجئين وعلى الشحده عايشين بسب الاعداء الداخلين(النظام)والااعداء الخارجين(السعوديه وقطر وايران و و و).
الواحد صار يحكي مع حاله طب يا ترى ليش لازم احنا الشعوب دايما نرجع لورى ونوكول دورى(...)ليش هاي المليارات ما دفعت زمن السلم وليش لم تدفع في سبيل الرخاء الاقتصادي والتعليم والتقدم العلمي والقضاء على البطاله ومحاربة الفقر.
ستوب عندك يا حضرة الكاتب صرعتنا بهالمثاليات والمواعظ والشعارات بعدك لليوم ما تعلمتش ولا تنوريت ولا صحيت.احنا الصرعات والخلافات بدمنا وزعمائنا زي ما انت عارف وكل شعوبنا النايمه عارفه ومش راضيه تصحه كمان, يا اما مأجوره وبتشتغل على الرموت كونترول وفي مين يحركها او انها زعماء ديكتاتوريه مستبده وبتحكم شعوب نايمه بالعسل او بالخ...ما فرقتش كتير وهي شعوب راضيه مستسلمه.
وحتى يا اخونا الكاتب لما الشعوب عملوا ثورات وثاروا على الظلم والاستبداد وزاحوا الحكام المستبدين ما عرفوا يكملوا الطريق ولا كان عندهم قياده ولا خطط بديله ولا مشاريع قام بدلولنا زيد بعبيد وبدال ما نمشي لقدام, الله وكيلك رجعنا لورا ويا ريت بس بشوية خطوات رجعنا بالالاف الاميال والكيلومترات.
المشكله انها دول ما عندها ديمقراطيه ولا عداله اجتماعيه ولا حريه وقال شو بدهم يصدروا لدول الجوار كل هاي الشغلات اللي حارمين شعوبهن منها. ما هو فاقد الشيء لايعطيه .اشي بزهق وبكفر وبجنن وبتسألنا يا حضرة الكاتب ليش منحكي مع حالنا وبطلنا نطالب او نحتج.لانه على الاقل ما بتجينا شي تهمه تقويض او زعزعة النظام او اخلال بالامن او الاتصال مع دوله معاديه.
صدقنا يا حضرة الكاتب صار الواحد منا يخاف حتى يحلم احسن ما تطلعلها شي كلمه نازله او طالعه وتروح زوجته مسلماه للمخابرات اذا كانت مزعوجه او غضبانه منه او ممكن حتى تكون حتى هي مخابرات لشي دوله اجنبيه شو بعرفك.
المصيبه الكبرى يا اخي شو عنا احنا في اوطاننا حتى نتجسس عليه لدوله معاديه او الواحد منا بقدر حتى يحكي عن نظام الحكم ببلاده,ما هو ساعتها حتى الدبان الازرق مابعرف ارارو(قراره)
لنفرض جدلا اننا غيرنا النظام شو راح يتغير؟ على الاقل النظام الحالي سرق وشبع وفتح حسابات في البنوك السويسريه وحلني بأه (بقه) على النظام الجديد تايبقى يسرق ويشبع بدنا كمان بين 30 ل 50 سنه. صدقني اللي بتعرفه احسن من اللي ما بتعرفوش.
الكاتب:بصراحه انا شايف ادامي(امامي)شعوب مأزومه مهزومه مقسومه ملطومه مهمومه مسمومه مجزومه محرومه وكمان مركوبه .خليكوا على حالكم اصلا انا من زمان ما بكتب لألكوا انا بكتب لحالي وللاجيال القادمه والتاريخ وكتاباتي هي بس فشة خلق....
بعدنا في الكويت :خبر اليوم الطازه هو الزواج الاسطوري لحفيد امير وحاكم الكويت على اساس استنساخ زواج الابن الاصغر لسلطنه برناوي كان اسطوري كمان ومفيش حد احسن من حد .طالما ان الحاكم امير او سلطان وقاعد على خازوق نفط فالبذخ مطلوب حتى وان كان الشعب جوعان او طفران المهم انه ما يكون زهقان.
بقولك وزع على المدعوين خواتم من الالماس(اكيد معظم المدعوين كانوا من عامة الشعب الفقراء).
شارك في ترفيه المدعوين مجموعة رائعه من مطربي وطننا العربي واللي اجورهم تبداء من 5 اصفار وطالع.
مطرب السعوديه الاول الامير محمد عبده وعبد المجيد مجذوب ونبيل شعيل والماجد والرائد والعائد والوارد وحسين الجسمي ومرام فارس ونوال الكويتيه وهدى المصريه وشيماء القطريه وغيداء البحرينيه وفيحاء السوريه وميساء العراقيه واسماءالفلسطينيه وفداء الاردنيه ولمياء اللبنانيه واحياء التونسيه وفيزياء المغربيه وتحيا الشعوب العربيه.
كل هدول المطربين وغيرهم كتيرين شاركوا بحفل الزواج الميمون للامير صباح صبح الصباح المصباح.
على صعيد اخر منع المطرب مرسيل خليفه من دخول الكويت بطلب من احد النواب المتشددين بسب خلاعة ومجون المطرب مارسيل لانه فنان ملتزم بالاغنبه الوطنيه والهادفه والكويتين بدهم اغاني اكثر(تهديفا) هادفه وملتزمه من مرام فارس والمجموعه الاخرى.مع الاعتذار للفاضله اليسا والحجه احلام والرائده هيفاء لعدم توجيه الدعوه لهم لاحياء زفاف الامير لضيق الوقت والتوفير في المصاريف.
مارسيل وجه رسالة عتاب للاحباب في الحكومه الكويتيه طالبا منهم تقديم اعتذار رسمي والا بيحرد وبيزعل وبياخد على خاطره وانو ما في مانع لحضوره للكويت وهيدا كان خطئ مطبعي موش اكتر.. وبعدين يا خي انا جاي لاحيلكون حفلة واقدم اغاني مشان معرض الكتاب في دولتكون الكويت.
ملاحظه لخي مارسيل :انت مطرب ملتزم وهادف مسيس حالك ومهم. لشو جاي على الكويت وطالب من حكومه بتدعم الارهاب وسياستها معروفه وتوجوهاتها واضحه.
لا تؤلي(تقل) انك جاي تغني للشعب.
الالتزام هو كلمه وموأف(مواقف)
ملاحظه على ملاحظة الكاتب:يا استاذنا الفاضل احنا شايفين بكتاباتك كتير من المزاوده والشعارات والحكي اللي بلا طعمه على الانظمه والسياسات اكيد لو دفعولك لكنت صرت تدافع عنهم. نرجو منك الشفافيه والمكاشفه والمصارحه وان تكون صادق بالاجابه.
بصراحه وبكل صدق واخلاص وامانه اذا عرض علي رقم وامامه 6 او7 اصفار لابيع القضيه الفلسطنيه وكل الوطن العربي ليش الكذب.

#جان_نصار (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
في رحيل جليل شهباز، عضو هيئة إدارة الحوار المتمدن	في رحيل شاكر الناصري، أحد مؤسسي الحوار المتمدن

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل