يا أم الشهيد

شهد أحمد الرفاعى

الحوار المتمدن-العدد: 4755 - 2015 / 3 / 21 - 20:23
المحور: المجتمع المدني
    

رسالة إلى أم الشهيد


مش راح اضحك عليكى و اقولك ولادنا اولادك !!
علشان الضنا زى الوطن مينفعشى حد يستلفه و لا يسلفه لحد !!

لكن حقولك كلنا ولادك .. و جرحك جرحنا .. وولادك ولادنا ..

حقولك انا حاسة بيكى و بحرقتك على ضناكى ..
حاسة بنارك اللى مستعرة جواكى
حاسة بدموعك اللى بتروى مخدتك كل ليلة و انتى بتحاولى تنامى
حاسة بروحك اللى رايحة منك و تايهة
حاسة بلهفتك و اشتياقك أنفاس ابنك او بنتك .. لــ لمسة ايديه
حاسة بغربتك وسط الناس اللى مش حاسين وجعك علشان مجربوش وجع الفراق و يارب ما يجربوه ابدا على غالى
حاسة بإنتظارك دخوله عليكى كل يوم
حاسة بيكى و انتى شايفاه فى كل ركن فى البيت بتكلميه ساعات كتير بس لما تبقى وحدك انتى و هو بس
حاسة بصبرك اللى بتتحايلى عليه يكون صديقك و ما يتركك و يرحل زى ما رحل قرة عينك
حاسة دموعك اللى بتنزل فى كل صلاة وانتى بتقولى يارب يجعل مثواه الجنة
حاسة بيكى اوى لما بتبصى على رقمه فى الموبايل و بترنى عليه يقولك الرقم غير متاح
حاسة بيكى لما بتطلعى صورته و تبوسيها و تقوليله وحشتنى يا بنى
حاسة بيكى و انتى حاضنة ملابسه و تضميها لصدرك وقتها بتحسى انه فى صدرك فعلا
حاسة بيكى لما بتسلمى امرك لله من كتر تعبك من الحزن و من قلة الحيلة و تقولى الحمد لله
و حاسة بيكى لما بيبقى نفسك تزوريه و لما تروحى تحطى على قبره وردة
بيبقى نفسك تفتحى عليه و تطمنى عليه زى ما كنتى بتفتحى عليه باب الاوضة تطمنى عليه و هو نايم
..
عارفة ليه يا أم الشهيد انا حاسة بيكى !!
علشان انا أم فقدت ضناها فى لحظة ..
ما بين ( سلام يا ماما حأبقى اتصل بيكى لما اوصل )
و ما بين خبر يجيلك فى اتصال ( العربية اتقلبت بولادك على الطريق و بنتك شهد تعيشى انتى ) بينهما أقل من 20 دقيقة !!

الضنا غالى .. و الوطن غالى .. علشان كده ربك وعدهم بالجنة ووعد الله حق .
إستعينى بالصبر و الصلاة ..
و بشر الصابرين الذين اذا اصابتهم مصيبة قالوا انا لله و انا اليه راجعون .. صدق الله العظيم

كل يوم ام و انتى اعظم ام يا ام الدنيا .. يا صابرة يا بهية زى بلدك مصر / يا أم الشهيد الغالى

بقلم / نجوى عبد البر

#ام_شهد

#شهد_أحمد_الرفاعى (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل