رشا أرنست
(Rasha Ernest)
الحوار المتمدن-العدد: 4456 - 2014 / 5 / 17 - 09:18
المحور:
الادب والفن
وبعدين في عذابك يا بلد!!
نعدي ازمة نلاقي غيرها اتوجد
نعيش او نموت مش فارق معاكي كأننا كمالة عدد
واحنا اللي ياما كانت ايدينا في محنتك سند
هانت عليكي حياتنا ولا اللي جاي بيمحي فيكي وجودنا
ياما حلمنا
نرجع نروي نخيلك
من عيون النيل ويرجع يزيدك
ياما وعدناكِ وحلفنا بترابك
العمر لسلامتك يهون
والبنت قبل الولد
قادرة تكون
سلاحك وقت الخطر فين ما يكون
طيب... ساكتة ليه؟!
مش احنا ولادك يا مصر؟
وكل نقطة في دمنا بتقولك نموت نموت وتحيا مصر
مشينا ياما شايلين بايدينا العلم
والايد التانية شايلة الكفن!!
يبقى ليه الجفاء منك
والارض ساكنة تحت ظلك
يبقى ليه السكوت
واحنا لاجلك عشقنا الموت!!
يبقى ليه تزودي فينا الانين
تحضني الجاني
وقدمك فوق رقاب العاشقين؟!
ساكتة ليه وانتي شايفانا متلهفين
نـوّصل من جديد اللي ضاع
بينا وبينك
واحنا عايشين مرغمين
#رشا_أرنست (هاشتاغ)
Rasha_Ernest#
كيف تدعم-ين الحوار المتمدن واليسار والعلمانية
على الانترنت؟