المالكي وسسينه..والحرب المفتوحه!

مؤيد حميد

الحوار المتمدن-العدد: 4365 - 2014 / 2 / 14 - 23:49
المحور: كتابات ساخرة
    

خير اللهم أجعله خير.. أيكولون المنام لا تحجيه ألا بالمرحاض, حتى أيروح شره .. بس حلمي بالمالكي, ما خليت واحد ما سولفتله .. أريده يتحقق وبسرعه .. خير اللهم أجعله خير .. وبعدني ما حاجي الحلم , وصلني خبر , خير اللهم أجعله خير ,أنو أبو سراوي , دش للعنايه المركزه بمستشفى أبن سينا .. لان دولة ريس الوزراء والقايد العام للقوات المسلحه وزيرا الدفاع والداخليه والمشرف على جهاز المخابرات الوطني , والمسؤول العام على القضاء العراقي , وريس هيئة المساءله والعداله , وقايد المليشيات خير اللهم أجعله خير تعرض للاجهاد والضغط .. وشويه غابت روحه ..كل هاي وما تعرض لجلطه دماغيه.. بخت لو تخت.. جاه خطيه مام جلال , بس ريس جمهوريه , وصارت عنده جلطه دماغيه ونشلت أيده ورجله ونسى الكورديه .. صدك هذا أبو سراوي عشيرته داعياله.. بس خطيه جاه منين يلكاها .. وين ما أيدير وجهه أيشوف أنياب مكشره , أشو كلها سوده مصخمه .., وكلها محضره شلون سجاجين بعد شيبي , بس أيريدوه يوكع.. وجيبه جيبه وين التوجعه.. وخير اللهم أجعله خير , هذا الاجهاد وهاي التشنجات ,صارت من وره التقارير الجذابه اللي يكتبها ويوصلها سسينه وقيادتنه العسكريه الحكيمه , على الرمادي والفلوجه .. ومثل ما تعرفون أن سسينه مو مثل ذاك السسي .. لان سسينه أثنين سسي .. هم هو سسي الثقافه وهم سسي الدفاع .. بينما ذاك سسيهم سسي واحد .. لذلك سسينه مو بكد سسيهم .. سسينه ضليع بغزوات المدن, وأكل الدليميه..
خلونه نكمل السالفه .. سسينه كام أيطلع ( صور من المعركه ) بس على قناة العراقيه طبعا .. حتى يثبت للمالكي أن جيشه حقق أنتصارات رائعه على العدو الصهيوني .. وسمعتو الاناشيد الوطنيه وهي تلهب الشارع العراقي بالنصر المبين على الطغاة .. بس سسينه ما خبر المالكي عن الخسائر بالجنود الابرياء ولا بالمعدات العسكريه .. وما كال تره عيوني أبو أسراء , جنودنه الابطال كامو يتسربون واحد وره الثاني .. والوضع كلش صعب , لا , خلاها سكته سسينه.. وراح دز خبر للمالكي , بأن الحرب حسمت لصالح الدوله .. وخطيه أبو سراوي ميعرف شنو السالفه .. وجان يمه واكف المستشار علي الموسوي وهذا هو سبب خسارة المسلمين في معركة أحد.. يشتغل بالابيض والاسود .. كوم ودز للعراقيه , خبر عاجل .. الحرب حسمت لصالح الدوله .. ليش أكو واحد سأل بيا حرب حسمت الحكومه الوضع .. أشو كلها تشكيل لجان ولحد اللحظه ما بين شي .. وهسه عرفت ليش نوري المالكي يطلب ولايه ثالثه , خطيه, حتى يعرف نتائج اللجان اللي شكلها ..
ويوميه نقره بتايتل العراقيه , وهاي عبرنه الشهر على معركتنه المفتوحه , جيش سوادي كتل أربعين داعشي وبيناتهم والي جبير,وفرضنه السيطره على مناطق واسعه من الرمادي , وألقينه القبض على المسؤول الباكستاني , وبقى بس عشرين بالميه بعد ما طهروها .. وسسينه ما يدري كل الشعب العراقي مطهر من كاعه .. ولو تحسبون شكد وصل عدد قتلى داعش لحد اليوم , راح تنصدمون صدمه خايبه .. أكثر من ألفين داعشي ..وتدمير سبعة معسكرات.. الجماعه أمسويها خري مري .. وشوكت بنو هاي المعسكرات وشلون دششو دبابات وأسلحه ثقيله .. دبابات وأسلحه ثقيله يا لواء عدنان الاسدي .. صح النوم.. يا سسي .. والحلم راح أسولفه بعدين ..لان كلش أيخوف .. وما خفي كان أعظم

#مؤيد_حميد (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل