يا محلى النصر بعيون المالكي

مؤيد حميد

الحوار المتمدن-العدد: 4362 - 2014 / 2 / 11 - 17:12
المحور: كتابات ساخرة
    

كافي والله خلصتو كلوبنه ..شنهي لزكه .. لو جيرتو العراق طابو .. ذاك خلص من عمرنه خمسه وتلاثين سنه .. أيجيبنه ويودينه .. وجنايز ولد الخايبه معلكه فوك التكسيات .. حتى مكابرنه ما ظل بيها ربع متر حتى ينطمر الواحد بيها ..وكل شويه شدو الحزام .. وأحنه مثل المطايا أنشد وما نلحك .. الى أن شدوه بحبل وخلصنه منه ..وكلها بجفه وجماعة الطلبات السريعه وكبة الحامض بجفه .. من الله اللي خلقهم ميخافون .. وشافو شعب على كد أيدهم , والله نطاه نقمة النفط ..وهاي دعش سنه صارلهم .. أيطببونه بحفره ويطلعونه من سيطره .. وكل سيطره حليب أمنه اللي رضعناه من ستين سنه يطلع مخثر منه وبيه طبيعي .. والنوب ختمها بالحرب على الارهاب .. وجماله نيابة عن العالم .. شوفو شلون قشمره وطيحان حظ .. الدم من عدنه والسلاح أحنه نشتريه.. وقناة العراقيه ما صدكت.. وجيبه جيبه .. دكول معركة الطف الثانيه .. وأتقدم وأحنه وياك أثنين .. ويا محلى النصر بعيون المالكي .. وهاي كلها علمود الولايه الثالثه .. والله , أيمرغل نفسه مو برمل الرمادي .. لا وينطي كل أبار النفط .. بس حتى يبقى كاعد على كرسي العرش .. لحس شويه منه وعرف طعمه شلون راح ينطيها..
جربت حظك مرتين عيني أبو سراوي وما كدرت تقدم للشعب كلشي.. لا سنه ولا شيعه ..والمسيح هجرتوهم ..وما ظل ولا محل أيبيع عرك .. هسه أرتاحيتو .. خلي غيرك أيشوف حظه ويانه , بلكي يطلع بيه خير .. ويجرنه من عنق الزجاجه اللي صارلنه دعش سنه مخنوكين بيها , وما نكدر كلشي أنسوي .. بلكي اللي يجي أيحط عينه على هذا الشعب المسكين المظلوم , والله يا أبو سراوي لو تفر العالم ما تلكي مثل شعب العراق يتقشمر بسرعه ويرضى بسندات كيعان حتى الزمال ميعيش بيها .. لان ما بيها خدمات ولا كلشي .. أرض صبخه والعاكول ماليها ..بس ميخالف ,هم الواحد أيكول عندي كاع بهذا البلد .. وبلكي من تطلع عيني أبو سراوي , تهدأ الامور وميظل لا داعش ولا فلول النظام السابق .. عود بالانتخابات اللي تجي بعد أربع سنين , يابه خذها كلمة صادقه وما بيها دغش , أني أول واحد راح أيسويلك دعايه ويعلك صورك , لك عيني بس أطلع وخلصنه ..وبعدين راح تاخذ خوش راتب تقاعدي , وحمايه وسيارات وطركاعه سوده ..شتريد بعد لزكه خو مو لزكه..
صدكني يا أبو سراوي شفتلك شلون منام ..خير اللهم أجعله خير .. منين يجي الخير أذا الرجال راح أيصير دمه طشار.. لا ما أكدر أحجي المنام هسه ..لان يرادله صفحه كامله ..خلوكم وياي ..وما خفي كان أعظم

#مؤيد_حميد (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
في رحيل شاكر الناصري، أحد مؤسسي الحوار المتمدن	حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل