راس السمجه هو الخايس !!

مؤيد حميد

الحوار المتمدن-العدد: 4339 - 2014 / 1 / 19 - 23:05
المحور: كتابات ساخرة
    

راس السمجه هو الخايس!!
مؤيد حميد

فد نغوله ومزحجين.. دكول سنافر مشيطنه ..تشمرهم من فوك على روسهم يوكعون على رجليهم.. ولساناتهم زفره ونتنه , أذا واحد تناوشهم بمقال أو دردش وياهم على الفيسبوك.. وتشوفهم كلشي يعرفون ومادين خشومهم بكلشي.. وشركاتهم ومقاولاتهم تشتغل بروس العراقيين.. حنطه معفنه.. بسكويت مسموم.. جاي مسرطن..زيت يصلح للطبخ ولمحرك السياره.. أدويه فاسده .. دم ملوث.. ومن تريد تناقشهم .. واحد يشمرها على الثاني ويطلعون همه الاتقياء الشرفاء وحاملين راية الله أكبر.. ويطلعولك الجهه اللي أستوردنا منها , كلبه بنت كلب وساقطه مثل داعش وبنات عمها .. وطبعا جماعتنه تعلمو على اللجان.. ويخربون عليها .. خو أذا كالو حيلوها الى لجنه.. دك وركص للصبح.. وأغسل أيدك بقاصر..لان موت يا زمال وما تعرف النتيجه.. وعلى هالرنه طحينج ناعم..
السبب بهاي الضجه وغيرها, هو راس السمجه الخايس والمعفن.. لان لو جان الراس نظيف ويخاف ربه .. ما صار اللي صار بينه.. بس الخايس يبقى خايس حتى لو خليته بطشت ديتول .. وكلنه سمعنه وشفنه .. المسؤول بدول أوربا وطبعا ذوله كفره ..ما ممكن أيفكر يوما ما أو تخطر على باله أن أيغش شعبه أو يتحايل عليهم .. ولا أيقدم مصالحه الشخصيه على حساب مصلحة الوطن .. بأختصار .. المسؤول هناك عده وطنيه وعنده ضمير أيحاسبه.. أما عدنه ونحن نعيش في بلد الحسين بن علي.. الوطنيه والضمير ماخذين أجازه وبراتب تام .. وهاي فرصة أربع سنين أيشيل بيها الملايين من الدولارات وطزين بالشعب اللي يستاهل أكثر.. لان هو من يسمح لهؤلاء المتملقين أمراء الشياطين أن يتسلقوا هيج مناصب ويسكت.. واللي من أيده الله يحرك عزيزه ..وهاي شفناها بدورتين ويا ستار من الثالثه..
واليوم بده موسم الصيد ..وشفنه أبو سراوي وهو يوزع أبيده الكريمه 3000 سند أراضي على حواسم الناصريه..والحبربشيه مالته أيبلغون الناس التعبانه أنو لازم تنتخبون المالكي نصير الفقراء .. واحد من الكاعدين كال ..دجيب شعره من جلد كلب .. عبالك مان منيه علينه .. وهم شفنه الشمر الثاني وهو أيوزع بالدولار على متضرري العمليات الارهابيه بطوز خرماتو .. وتصورو علي الاديب أيزور عين التمر اللي ما بيها جامعات ولا معاهد ولا حتى دور حضانه.. كل هاي ليش هسه ..لان هذا موسم الصيد ويا سبحان الله لعد وين جانو كبل أربع سنين .. ليش ما زرتو ما شفتو شعبكم شلون عايش ..لو بس بالانتخابات تتوسلون بيهم حتى ينطوكم صوتهم .. شوفو لزكة الكرسي شلون راح يشلعها الشعب.. صارلكم أربع سنين دايرين وجوهكم .. متشوفون ألا نفسكم ومصالحكم .. وجايين هسه تقشمرون الشعب بسند أرض لو بدولارات .. والله عيب عليكم.. وذوله أنكس من داعش .. وما خفي كان أعظم

#مؤيد_حميد (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل