مسؤولية تك گول

حبيب العربنجي

الحوار المتمدن-العدد: 4237 - 2013 / 10 / 6 - 18:12
المحور: كتابات ساخرة
    

المسؤولية حلوة وتخبل ...صح أشوية شخصيتها قوية بس من داخلها حلوة وتدللك إشگد ما تدللها وتنطيها، بنت أوادم، تنطيها عشرة ترجعلك ألف وعشرة ! بس المسؤولية ما تشوف دربها وتصير عمية إذا أبوها جابها من بيت أهلها ونطاها عروس لواحد ما يعرف الفرق بين الختان و ليلة العرس !
وهاي الحالة هي إللي دا تصير عدنا، كل ما صارت شغلة نسمع فلان الفلاني يطلع ويگول: لازم الشعب يتحمل المسؤولية ويبلغ عن المخربين والمجرمين والمندسين والوهابيين والأزلاميين ورفاق السوء والرفاق البعثيين والمسرفين إخوان الشياطين والسايكوباتيين والميتافيزيقيين وحتى الخوزقيين (وهم جماعة يحملون خوازيق للوطن) وحتى المتبوسرين من أتباع مولانا الشيخ البواسيري. أي يابة نتحمل...حلوة مال تحسون إحنا موجودين..بس إحنا نريد كل الأوقات تحسبون إلنا حساب مو بس من يصير شي، او مثل ما تخلصون من البوفيه المفتوح بالعافية وبعدين تعال يا شعب يا طيب إدفع الحساب ولا تنسى تنطي خوش بخشيش !
بالدول إللي الله مطيح حظها حاشانا بالتفكير والعمل وما عدهم عطلات دينية...أكو شي أسمه المسؤولية المجتمعية..وهي عبارة عن فعاليات أو ممارسات تحدد مسؤواية المجتمع تجاه الدولة، والشي الأساس بهالشي هو الولاء والإحساس بالإنتماء، ووجود هدف موحد يحدد إتجاه العمل، عمل الحكومة والشعب ! بهاي الدول إذا واحد يشوف واحد يريد يتفل بالشارع يروح يجره من ياخته مثل حرف جر ويسلمه للشرطة، بس إحنا إذا نشوف واحد يقذف بالبلغم من حلگه عبالك دا ينيشن على الفرضة والشعيرة نتذكر: إي والله صدگ رحمة الله والديك ذكرتني ما بلغمت اليوم...خخخخخخخ...عييييييييع...پپخخخخخخخخخ...تفووووووووووووو !! ويمسح حلگه بردان قميصه وبشواربه ! لو إذا نشوف واحد يرمي زبالة بالشارع تروح أم البيت وتتعارك وي رجلها : تعاااااااااااااال وشوف مسوي نفسك شريف روما وما تخليني أشمر الزبل بالشارع...تعااااال شوف الناس شي يسوووون؟؟ وتجيب طشت الزبل (العراقيون يحبون يخلون زبل المطبخ بالطشت) وعلى عناد العوازل...والصحن الدوار...ويصير الزبل مثل سيد مطشر بالشارع ! ليش؟؟؟ لأن ما عدنا هدف موحد يجمعنا !! صح الحكومة تلعب تلك گول عالشعب...بس الهدف الموحد يعني الحكومة والشعب عدهم تك گووول ويهدفون عليه سوا .....مو بس الحكومة تهدّف والشعب گولچي بلا تدريب واللياقة صفر اليدين...ولأن ما عدنا ولاء موحد يحدده الإنتماء لأن اصلاً الشعب ما يحس بالإنتماء لوطن ما ناطيه لا أمن ولا سقف يحميه ولا باب رزق يسترزق منه بدال ما يروح يزاحم الچلاب والبزازين في معيشتها ! عمرنا ما جربنا ولاء لشي يجمعنا...حتى الله من شاف المنتخب كلنا دا نصفگ له ونهوس له... گال أوكفوا لي ! إجى وطيح حظ هذا المنتخب بفاشل حمود وعصابته وصرنا ننافس الصومال حتى في قائمة فيفا للمنتخبات المتقدمة...وأثيوبيا راح توصل لكأس العالم وإحنا نتحسر على كأس بطولة الطارمية للفرق الشعبية !
لعد شلون تريدون الشعب يتحمل المسؤولية؟؟ الشعب بايع بأرخص الأسعار لأن بس يريد يصرف بضاعته، وغاسل إيده وما يريد شي يربطه بهالبلد إللي يستحي من اسمه، شلون تريدون منه يتحمل مسؤولية تجاه شي ما يحبه؟؟؟ لا تگولوا وطن!! الوطن حماية وإحنا ما شفنا أي نوع من الحماية بوطننا غير حماية المسؤولين وحماية الثلاجات من نحول الكهرباء حتى لا يگوم الكومپريسر ! ما شفنا حماية حقوق ولا حماية إحترامنا ولا حماية هويتنا، شلون نتحمل مسؤولية شي ضاع ؟؟ رجعوا إلنا إحترامنا الداخلي والخارجي عود بعدين طلبوا من عدنا نتحمل المسؤولية !
هي وين حصة الشعب من الوطن؟؟؟ أشو الشعب تهجول بالمنافي والمطارات وصار ذليل أمام السفارات ..وصار كل أماني الشعب شلون يحصّل صفة لاجىء أممي حتى لو اضطر يگول هو مصمم الغواصة الزرقاء ومطارد من الحكومة لأن ما يريد ينطي أسرار الغواصة لوطن ما يحترمه ولا هو يحترمه...الوطن حماية وستر وآمان وإحنا ما شفنا هذا الثلاثي الخيالي والأسطوري...بس سامعين أكو مثل هالشي مثل سامعين ببرج بابل وما شايفيه...الوطن إيد تمسح عليك من تتعب وتشيلك من توگع، مو إيد تكفخك فوگ ضيم الدنيا تجيك كفخة من الوطن ...ماكو حصة...ماكو بنزين...ماكو حياة...ماكو حتى قبر واحدنا يندفن بيه...صرنا نندفن في امعاء الچلاب إللي تنتظر براس الشارع حتى تاخذ طعامها بأول إنفجار.. وتگولون نريد الشعب يتحمل مسؤولياته !
يابة بلا هاي الفيكات... أنتو طالعين برة وشايفين شلون الناس هناك يتصرفون ويتحملون المسؤولية وجايين هسة وتريدون تطبقوها براسنا...مو گلنا ذيچ الدول طايح حظها من التفكير... بذيچ الدول التعبانة إذا الدجاجة زعلت من الديچ لأسباب تشغيلية يگوم الپرلمان يسوي جلسة طارئة لمناقشة أسباب زعل الدجاجة حتى لا تتكرر المشكلة مستقبلاً وي باقي الدجاجات والنوب تقل الإنتاجية وتصيب الديچ كآبة ويعوعي كل ربع ساعة ويزعج الناس...هيچ تفكير يتعب ! عوفونا بحالنا... خلونا نعلم ولادنا شلون يتعلمون الحساب... تعال بابا : سيارة باص كيا بيها خمسطعش نفر...فاتت من يمها سيارة مفخخة وأنفجرت گدامها...ثلاثة من ركاب كيا صاروا شاورما...ثنين تكة بالشارع...واحد أخذه الچلب وهرب فرحان وهو يحرك ذيله...وثلاثة لفوهم بالبطانية المقلمة ودوهم للطب العدلي..وأربعة على عربانة يجرها حمار متقاعد.... بابا أحسب لي أشگد الناس راحوا بهاي المفخخة ويا ريت ما تعرف الجواب والحساب...بهاي الحالة عندك مستقبل ويجوز تصير الناطق الرسمي بأسم وزارة الداخلية !

#حبيب_العربنجي (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل