كلا كلا للتيار

حبيب العربنجي

الحوار المتمدن-العدد: 3983 - 2013 / 1 / 25 - 20:07
المحور: كتابات ساخرة
    

التيار يعتمد على الفولتية، والقدرة هي مربع التيار في المقاومة، وكل ما أرتفعت الفولتية تقل التيار وتقل نسبة الفقدان في القدرة ومن هاي نشوف في عمليات نقل الطاقة الكهربائية تزداد الفولتية وتوصل لغاية 400 ألف كيلو فولت حتى تصير نسبة الفقدان قليلة كلش.
هاي المقدمة في الهندسة الكهربائية نحتاجها لنفهم الفولتيات العالية لوزراء ونواب ومدراء (التيار الصفري) في العراق، فهذول كلهم من فئة الفولتية العالية حتى توصل نسبة الفقدان في أرباحهم الشخصية من مناصبهم إلى الصفر ، مو شطارة في إدارة المنصب بس لأن عدهم فولتيات عالية ببركة السسيد القائد...إللي بارك هذا الجهد التياري وگال: كنتم خير أمة أفسدت الناس...تسرقون بالمصروف وتنهون عن المنجز، وذلك في برقية لمولانا القايد إلى النائب بهي الطلعة الإيرلندية والأعرجية وختمها بقوله...عفية حبيبي بهاوي !
وتاريخ هذا (التيار) بدا من سرقة اعمدة الكهرباء وكيبلات الكهرباء من مدينة الثورة كخطوة أولى للتيار، ما ظل عمود كهرباء بمكانه، وهناك نشوف لك السيد مولانا القايد ظهر مثل الباتمان على مسرح الأحداث وأعلن جيش الإمام الغائب بإجازة مفتوحة لحين زوال اعذاره، ووين أكو واحد يفتهم بسرقة التيار الكهربائي وأعمدة الكهرباء ووايرات المولدات صار قايد ميداني بهذا الجيش، وإذا أحد سال وين كهرباء الوطن فيكون الجواب بجيب (التيار الصفري).
وبعد ما صار الرفيق سلام المالكي أصغر ملياردير (بالدولار الأمريكي) بالعراق وصار يدير شركة طيران خاصة أسسها من چان وزير النقل ، صعدت أسهم هذا التيار عد اللصوص في بورصة الإنتماءات، منو يريد يصير ملياردير خلي يتفضل، وإللي يصير بهذا التيار صدگ عبالك ياكلون الچكليتة المباركة، أشو كل مهتلف بعد ثلاثة أشهر يلبس رباط فوسفوري ويصير شي، حتى لو وارن بافت ما يگدر بكل ذكائه الإستثماري يصير بثلاثة اشهر مثل ما يصيرون جماعة التيار الصدري!
والفولتية العالية لأعضاء هذا (التيار الصفري) يخليهم دوم متنگين وشايلين قطعة (خطر فولتية عالية)..من هذا معيوفين، شي يسوون ما حد يمهم، لأن أي تماس وي الفولتية العالية يسبب حرگ وموت وخراب ديار، بوگوا ما حد يتقرب إلكم، ذبحوا ما حد يسألكم ليش، أخذوا بيوت وأملاك وضع اليد ما حد يگول ما يصير وأكبر دليل جامع الرحمن بالمنصور صار بجيب مولانا...من تركات " كلا كلا يا بابا" !
لا تتعجبوا من الثروة المليارية لبهاوي الأعرجي، فهو أستمرار لعشرات ومئات مليارديرية صاروا خلال عشر سنوات من اللعب على أحلام الفقراء، من بيع شعارات والقبض أحلام العصافير. بهاوي أبو الخدود الورية، يگول آني من عائلة زنگينة مثل ما گال بوكتها إنتصاب قنبر أنو هو من عائلة أصيلة، وإللي يعرف خالة إنتصاب يصيح بات وياخذ جائزة، هذا الزنگين من ذاك الأصل.. وإللي جوا إبطه طلي يمعمع او بحسب الفصحى يكاد المريب أن يقول خذوني. يعني من يجي بهي الطلعة ويگول ترى آني من عائلة زنگينة فهذا يعني هو دا يبوگ وداعة سيد عليوي، وينها مهاوي الخاتون أم اللسان ليش ساكتة؟؟ ليش ما تطلع تردح وتسال بهي الطلعة من أين لك هذا مولانا، وإذا چنت من عائلة زنگينة ليش چنت تبيع كروت الموبايل ؟؟؟ شنو كانت عندك معايشة بالحجابات لو شنو الموضوع؟
وهسة تعريف (التيار الصفري) هو: مجموعة من مواقف واقوال متذبذبة وأفعال خطرة تؤدي إلى قتل الوطن والمواطن، ويعتمد هذا التيار على فولتيات عالية جدا للصعق مما يؤدي إلى عدم وجود أمبيرية تيارية غير شعارات وكلام يضوي مثل الگلوب الصيني، أول ما تفتحه كلش يضوي وبعد ثانيتين...بفففففففففففف يحترك ويوگع من السقف على ماعون تشريب بامية لو صينية تشريب باگلاء.
والله كلش خايف لا يصير كل الكهرباء يم جماعة هذا التيار...وهناك يحكمون على الوطن بالإعدام بالكرسي الكهربائي !

#حبيب_العربنجي (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل