الماء يا دولة المااااااااع

حبيب العربنجي

الحوار المتمدن-العدد: 3834 - 2012 / 8 / 29 - 21:25
المحور: كتابات ساخرة
    

بعد ما نشف ماء الغيرة من چهرات السياسيين العراقيين، وبعد مجىء چهرات بموديلات جديدة كلها من تنك وما بيها أي إحساس ، صار الماي بالعراق عجبة وصار إسم بلاد ما بين النهرين من أقوى النكات المعاصرة في عالم الفيسبوك والتويتر...أصلاً أي ممثل مبتدىء يريد يصير ممثل كوميدي درجة أولى ومن النوع العسكري خلي بس يطلع عالمسرح ويگول أكو بلد بيه نهرين ويسمونه بلاد ما بين النهرين وشوف شلون راح يشتغل الضحك وثاني يوم راح يصير أقوى ممثل كوميدي.
ماكو ماي بكل العراق..ماي للشرب، طبعا المنطقة الخضرة مو بالعراق حالها حال الفاتيكان داخل روما بس هي غير دولة، الماي صفاء ونقاء وهاي الشغلتين غائبة تماما عن العراق سواء في السياسة أو في أمور أخرى، ماكو أي شي صافي بالعراق غير البوگ صافي مثل الدمعة، وماكو شي نقي بالعراق غير القهر والهضيمة على حال بلد كان نبع صافي لكل الدول وهسة صار مزبلة لكل الدول، ياهو عنده نفايات بشرية او فكرية او دينية او عقائدية أو سياسية خلي يجي ويرميها بالعراق، أرض مباركة تتحمل كل النفايات بنص عمر تحلل مئات السنين، لا تخافوا على نفاياتكم، بيكم خير وجيبوا نفايات وتدللوا.
العراقي عنده وي الحسرة قصص وملاحم، كل شي حسرة عد العراقي، الكهرباء، سما صافية، كيلو تمر بلا ذبان، محل گصاب نظيف، شارع خالي من چلاب سائبة (بشرية وحيوانية)، حزب عراقي شريف، مدرسة بيها تواليت نظيف، منتخب براسه خير، ريال مدريد ما يخسر، كل شي حسرة، وطبعا حسرتنا الأبدية هي أن نفتح بوري ويجي ماي، بس إحنا الوحيدين بالعالم إللي نفتح بوري وننفخ تايرات لأن بوارينا ما بيها غير هواء، وأقصد البوري البوري وليس البوري بمعناه الإصطلاحي العراقي...بوووووووووووووووووووري.
وصلتني إيميلات من الموصل وكركوك والرصافة وكربلاء والبصرة وكلها تگول وين الماي، الناس نسوا الكهرباء لأن شغلة الكهرباء صارت من الأمور إللي لازم ما نحچي بيها لأن موضوع نجس وينقض الوضوء تماما مثل " أو جاء أحدكم من الغائط" وإحنا مثل ما تعرفون دولة دينية طاهرة ومتطهرة من كل هـَم يخص المواطن والشعب، اللهم زد طهارة سياسيينا وأنزل عليهم طهارة بالمفهوم البغدادي...تماما مثل ما نگول لواحد ما يشوف (بصير) حتى ما ينقهر...فبغادلة يگولون عن الغائط (طهارة) في تورية رائعة...اللهم أطمسهم بالطهارة للضالين..آمين. فهسة الموضوع كله عن الماي وقطرة الماي إللي صارت أعز من أعز الروح...وكل واحد يعرف عزيز روحه وماكو داعي اجيب أسماء أفرضها عليكم.
والغريب...ما شفنا أي واحد من أي مجلس محافظة في أي محافظة عراقية ولا أي نائب يمثل مائة ألف صوت في مدينته طلع وگال وين الماي، وإشوكت توگف حسرة الماي؟ لا طلع أبو الموصل، ولا أبو كركوك، ولا أبو كربلاء أو أبو الرصافة ولا أبو البصرة ولا حتى أبو بريص، كل في فلك البوگ حايرين ودايخين، ولا من العنصر النسائي الرقيق في البرلمان العراقي، ما سمعنا منهن وهن العفيفات الشريفات العابدات الصائمات القوا......مات مو عبالكم (دات)، ما سمعنا أي آه ولا ونة عن الماي. تطلع مهاوي خاتون وتگلب الدنيا وطابعة چم ورقة عن أن الحكومة ضربت الشيعة أكثر من السنة...گرة عينكم بهاي الحكومة...بمثل هذا فليتنافس المتنافسون...يعني ما طلعت مهاوي خاتون وتگول نحاسب الحكومة عن عجزها في توفير الكهرباء أو الماي، لا الخاتونة تحاسب على يابة أنت لازم تقتل من الجماعتين نفس العدد حتى تتحقق العدالة...يا أمة تفلت في وجهها الأمم. لو ذيچ السعلوة سوزانا...إللي من تطلع عالشاشة أتذكر عذاب القبر وسيناريوهات عذاب القبر...لان هي والموت والگبر سوا...أو بنت السهيل إللي تصلح تطلع بدعاية عن منتجات تلميع البشرة، او بنت الدايني إللي بتوالي العمر تذكرت تسوي نفخ للشفايف، او بنت نصيف إللي تشبه رئيس عرفاء الوحدة بعد أوامر القسم الثاني.
وأتذكر أن البطاقة التموينية بالزمانات، قللت حصة الچاي كل شهر أشوية حتى صرنا نگول راح يجي شهر ونروح نشرب إستكان چاي عد الوكيل ونرجع، فراح يصير نفس الشي وي الماي، راح يجي يوم نروح لدائرة الإسالة أو البلدية او مبنى المحافظة، ونشوف گلاص ماي...بس شوف...ونرجع للبيت ونقسم ألف قسم ويمين إن شفنا گلاص ماي شوف حقيقة مو خيال.وراح تكون هاي حصتنا من الماي بالأيام الجاية في بلاد ما بين العهرين...عهر الوعود...وعهر الغفلة بلا حدود في دولة الماااااااااااااااااااااااع.

#حبيب_العربنجي (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل