..!!أنا اسمي عبد الصمد

توفيق الحاج

الحوار المتمدن-العدد: 1184 - 2005 / 5 / 1 - 06:00
المحور: ملف 1 ايار 2005- الطبقة العاملة في ذكرى 1 آيار
    

أنا اسمي عبد الصمد
ملحمة عمالية فلسطينية بالشعر العامي
بمناسبة عيد العمال العالمي
للشاعر: توفيق الحاج
*
سلام عليكو يا ربع..من عامل وغلبان
يحكي حكاية شعب ..تحت القهر شقيان
أنا اسمي عبد الصمد..ساكن حدا السطلان
من بعد حي الأمل.. وحارة الإسكان
مش عارف أبدا الحكي..من هان أو من هان
يللا تنبدى بالكلام....ونشمر اكمامنا
ونقول بعد السمع…ع اللي جرالنا وكان

*

أنا عمري خمسين سنة..أوعيت على الأحزان
ما يوم شفتو عدل..وشفت الشقا ألوان
حياتي كلها تعب..وديون من الدكان
لو ابني مني طلب.. حبة حلو أبكي…
ما في في ايدي اشي..طفران ابن طفران

*

طونهاري أطحر نكد..وأسند الحيطان
مش لاقي شغله ولو ..عتال في السودان
شهرين وانا في الشمس ..مفلس من الدخان
وين الحكي والدعم..وانا بدي لو شيكل
من غللي شفت العمى..وراح أمزع الدزدان

*

يومين شغل وأسبوع.. مقفل المعير
على ايرز الطوفان..قام للشغل بكر
اللي سرح ع تناش..واللي سرح ابدر
وفي الطريق تشوف..عمال تجري ..تنط
من كل فج ومين..زحمه كما المحشر
سياره بدها تلف..والباص هناك زمر
والكل شاما يروح..يا عيني ع المنظر
واحد بيسأ ل ناس واقفين حدا البندر
قال أبو حطه حمرا: دريت ..الحاجز مسكر
طخو اليهود ع الناس .. واللي شرد اكتر
وايش نعمل بها اليوم.. وحظنا معتر..!!
*

ما شبعت عمري النوم..وبصحا مع لديوك
وادهس في عتم الليل ..بين الصخر والشوك
بدي الحق الرزقه..ولو الظهر مفكوك
هيك الزمن بدو..عيشة هوان وذل
ملايين ما تلقى بق.. وميات كما لملوك
وحظي من الدنيا ..صعلوك ابن صعلوك!!

*

يا عم أبو حسين.. أنا لسه في الحارة
عند حاجز التفاح ..بستنى سيارة
مت يللا يا سواق..سوق اتكل يللا
خلينا نغفى شوي..والفجر ماولى
ولما نصل غزة..حود ع جنب السوق
تنجيب فلافل سخن ..من عند عبد الله

*

يامين يعين الناس..على الهموم تكتر
كل يوم نقول اليوم ..يجي الفرج اكبر
يا مهون امبارح.. كان البلا اصغر
بكره..جاي العيد..والعيله تستنظر
كسوة وعيدية رحم ..عنهم مبتاخر
وهم المدارس كوم.. على حملو ما بقدر
من وين أجيب مصروف ..للبيت يتعمر
لحمة وبطاطا وبيض ..وطحين مع سكر
وصاحب الدكان ..إن شافني كشر
بيحقلوأصل الدين..كل ما بو بيكبر
والحرمة لما افلس.. تاخد على الدفتر
ما حد فيه حس.. وطول عمري بتحسر
يا رب فك الضيق..وخلي الخرم اكبر
يا حرمه خفي شوي..م البيض والجبنه
خلي فطوركو شاي ..مع دقه أو زعتر
ايش يعني لو صمنا ..شهرين أو أكتر
بلكي البلاوي تخس ..وبلكي الرجيم يظهر
ولما الزمان يروق..ناكل عسل باللوز
ونقعد ع شط البحر..نلعب ونتغندر
تبكي المره من الغيظ..وتظل تتقهر
لما اراضيها.. .. ومن قولي اتمعذر
بس يختي لا تبكي ..أنا بس بتمسخر

*

نروح على ايرز ..ونخش حلابات
في الحلابات تفتيش ..ذل وهوان ما يبات
هذا الخواجة يسب..ويلعن عظم لموات
وهذا الخواجة يطب..شلاليت على بوكسات
بدهم يذلونا.. ويجوعو الطنيات
لكن لغير الحق..ما تنزل الهامات

*

اللي غايظني كتير.. أتهل البدل والجاه
شايفين عيشتنا نكد..وضاربين طناش والله
يوم رحنا نشكي الفقر..والعز يا محلاه
مكتب وطقم الكنب..سبحان من أعطاه
يا سيدي بدنا شغل.. الله لا يذلك
قاللنا: همكو انتهى ..وهي الرئيس سواه
ادعولو فك الكرب ورب العرش يحماه
ولقينا آخر الشهر.. ال كنا نستناه
كبونه رز وعدس..ما تكفي حتى صوص
ما بالك بعيله.. .. توكل الزلط محلاه ؟!
عشره في عين الشمس..تفرك في قلبي آه

*

يا ما مصاري اجن..باسمينا وانضبوا
اللي بنوا الأبراج.. واللي الوف خبوا
ع ظهورنا صاروا كبار..وما حد خاف ربو
الله لا يعطيهم ..عافيه ولا يربو
سرقونا بسم الوطن ..وقالوا كلام عبوا
احنا فدا العمال ..والعامل نحبو
لكن مصاري فش.. وما في دعم..كبو
هيك الطفر بيذل.. وهيك الزمن بدو
يا ناس بيكفي فشر..اللي استحوا اتخبوا

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل