ترانسفير

حبيب العربنجي

الحوار المتمدن-العدد: 4074 - 2013 / 4 / 26 - 14:24
المحور: كتابات ساخرة
    

صدگ خان جيغان، والخارجية العراقية نايمة نومة العوافي لأن معالي خوش خيار ياخذ الاوامر من سيد آل البرزنة مو من رئيس الوزراء بحسب ما هو صرّح وگال. عملية ترانسفير چبيرة وغير قانونية دولياً دا تصير والخارجية العراقية ساكتة سكوت الموتى، السلطان المهلوس آردوغان جلس وي أوجلان وأتفقوا إن مقاتلي حزب العمال الكردستاني ينسحبون من تركيا!!!! أي ينسحبون وين يروحون؟؟ ليش همّ مو مواطنين أتراك لو شنو؟؟ وإذا هم مو أتراك لعد ليش وشلون الحكومة التركية راحت لأدغال أفريقيا حتى جابت الهارب عبدالله أوجلان وتحاكمه؟؟ شنو الموضوع؟؟ أكو دولة بالعالم تطلب من مواطنيها ترك أراضي وطنهم إلى دولة مجاورة؟؟ شنو شروط الإتفاق بين أردوغان وأوجلان حتى يطلعون من تركيا إلى جبال قنديل في شمالي العراق!
أدري جبال قنديل ملك صرف للعراق لو ملك صرف لعبدالله أوجلان؟؟ ممكن جواب معالي خوش خيار؟ لو راح تجاوبني وتگول أن جبال قنديل ضمن أراضي الإمبراطورية الكردستانية؟
راح اجي وياك، بس تحملني لأن لغتي عربنجية ومو لغة دبلوماسية مثل لغتك وشامتك اللماعة على خد مشمشة..طلعلي أي وثيقة تاريخية (غير مزورة رجاءاً) تثبت حق عائلة بارزان في التصرف في جبال قنديل وتوزيعها إلى مواطني دولة أخرى؟ ولك الناس لحد هسة ما يعرفون شلون يلفظون لو يكتبون أسمكم...أشو مرة الكرد ومرة الاكراد ومرة كردستان ومرة بارزان ومرة شركة نيجيرفان.
أكو أحد من الخارجية العراقية گعد وي أردوغان وعبدالله أوجلان في ساعات الإتفاقية على خروج مقاتلي حزب العمال الكردستاني إلى العراق؟؟ شنو مو من حق دولة الترانسفير أن يكون لها ممثل في هاي الإتفاقية؟؟ لو هسة معالي خوش خيار راح يگول چان أكو ممثل من عائلة بارزان في هاي الإتفاقية، أي مو ملك متوارث في DNA آل بارزان، يقطعون الشمال ويوزعونه مثل ما يريدون.
وشوفوا توقيت تنفيذ عملية الترانسفير، 8 / آيار/2013، يعني هالتصعيد إللي صار بالعراق له لينك مباشر مع هاي العملية، وتغطية على عملية الترانسفير إللي دا تصير والكل ساكتين.شگد عدد مقاتلي حزب العمال الكردستاني؟؟ وإذا تركيا ما حسبتهم مواطنين أتراك وطردتهم خارج تركيا (طبعا للعراق) منو راح يصرف عليهم؟؟ آل بارزان؟؟ لو راح يطلبون إضافة فقرة للموازنة الإتحادية تخص المساكين مقاتلي حزب العمال الكردستاني إللي بجرة قلم صاروا بلا وطن ويحلمون بالإنتماء إلى وطن عائلة بارزان؟؟ وأشوية أشوية دمجهم في مليشيا البيشمركة، والجيش العراقي مع ترقيات بلاش من بابكر زرباوي.
أدري شنو الموضوع... وين ممثلية العراق في الامم المتحدة؟ ليش ساكتين لو الكل قبضوا خوش قبض من آل بارزان؟ بس من يصير الوطن خان جيغان ما حد يگدر يفتح حلگه بچلمة خاصة إذا آل بارزان هم أصحاب السوق والمدينة إللي بيها خان جيغان!
خلونا نسوي سيناريوم معاكس، اكو عراقيين يتكلمون اللغة التركية..وهم التركمان، الأكراد يگولون التركمان بقايا الدولة العثمانية ، خوش حچي..راح أبدي من هاي النقطة، يعني تاريخيا هذولة (التركمان) بالأصل أتراك لحد سقوط الدولة العثمانية 1922، راح يطلب العراق من هذولة (الأتراك المتعرقين) مغادرة الأراضي العراقية (مبدأ التعامل بالمثل) والعودة إلى تركيا موطنهم الأساس.. عملية ترانسفير تماما مثل عملية ترانسفير مقاتلي حزب العمال الكردستاني التركي، شنو راح يكون رد فعل السلطان المهلوس أردوغان؟ راح يقبلهم لو راح يگول آني شعليّ بيهم لا أعرفهم ولا أعرف أصلهم! هم عراقيين مو أترك ولا بقايا الدولة العثمانية. وإذا خوش خيار صدگ يفتهم بالدبلوماسية راح يعرف شنو مبدأ التعامل بالمثل وشنو إذا الطرف الثاني ما قبل على هذا المبدأ لعد من حق دولة الترانسفير أن ترفض إستقبال مقاتلي حزب العمال الكردستاني أللا منتمين إلى أصل ولا تاريخ ولا دولة وحايرين تماما مثل ما حار عبدالله أوجلان قبل سنوات وما لگى أرض تلفه وراح بأدغال أفريقيا...الغباء موهبة ووراثة وممارسة وتصدير !
وهمين ترانسفير آخر...بعد ما نجح الجيش السوري الرسمي في إستعادة مواقع مهمة من جيش عرعور وگرگور وزعرور ودبور، ماكو مكان لهذولة المسلحين إللي دا يقاتلون بسوريا غير الهروب إلى العراق وطبعا من الحدود السورية- العراقية، ومن يصير الوضع فالتون ماكو غير خان جيغان، تعالوا يا مقاتلي جيش عرعور ودخلوا لمحافظة أنبار ...عملية ترانسفير عرعورية، وطبعا آل بارزان راح يسوون عملية ترانسفير همين لنقل مقاتلي الحزب الكردستاني السوري من منطقة القامشلي إلى العراق تماما مثل السيناريو التركي...ووزارة الخارجية العراقية دكان لبيع خوش خيار...خيار مر أفسد الزلاطة العراقية .
يا جماعة...بدون أي تعصب ..بس إللي دا يصير ترى أبد ما يخش العقل...دولة تلغي جنسية من مواطنيها إحنا شعلينا (وليش فيروس آني شعليّ ما اشتغل هاي المرة؟)...أشو باتفاق واحد ألغت تركيا صفة المواطنة عن أكراد تركيا وطلبت منهم الخروج من تركيا...شنو إحنا صايرين مكب نفايات لباقي الدول لو پاراسيتول مالتهم، منو عنده صداع إحنا موجودين، ومنو عنده زبالة مضوجتهم إحنا موجودين، نلم زبالتكم وإحنا ممنونين لأن عدنا أراضي ما نعرف شي نخلي بيها، والغريب إن عبدالله أوجلان صار له بالسجن كذا سنة وهسة يللا تركيا عرفت الحل، لا مو الغريب...بس هسة يللا صار خان جيغان يستقبل الوفود المشاركة في مهرجان الفالتون بدون أي رسم مشاركة.
يللا يا حكومتنا...ويا وزارة الخارجية...نطالب بمبدأ التعامل بالمثل...شيلوا تركمان العراق إللي هم (بقايا) الدولة العثمانية وخلوهم يروحون لتركيا في إتفاقية ترانسفير في مقابل استقبال مقاتلي عبدالله أوجلان، وشيلوا مقاتلي الطريقة الگرگرية الموالين لآل سعود وخلوهم يروحون لآل سعود، وخلوهم مقاتلي منظمة البدر جماعة هويد العويمر الموالين لأيران نسويلهم ترانسفير إلى دهلران أو أصفهان أو طهران أو أحراش طارزان أو مزبلستان...ما دام أكو هيچ مبدا في التعامل بين الدول.
وين مجلس الامن؟؟؟ مو حزب العمال الكردساتني التركي منظمة إرهابية؟؟؟ ليش ساكتين عن إستقبال آل بارزان لمنظمة إرهابية؟؟ نريد جواب يا بان كي مون أو مناع مفتاح قمر حتى الجماعة المتدينيين أخاف يستحرمون الأسماء العجيبة...نترجم إلهم (بان كي مون) إلى (مناع مفتاح قمر) تماشياً مع الجو العام وحالة المطر الشرعية في الخطابات السياسية.
آني أريد ترانسفير...حالة ترانسفير ينقل البلد...من حالة خان جيغان...إلى فندق خمس نجوم، والحجز مسبقاً لعدم الإحراج رجاءاً...وبكفنا نقبل لو نرفض الحجر او نرفع السعر.

#حبيب_العربنجي (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل