لا، لا، لا،لا لحازم القمرچي في الكاظمية!

رزاق عبود

الحوار المتمدن-العدد: 3904 - 2012 / 11 / 7 - 23:36
المحور: كتابات ساخرة
    

بصراحة ابن عبود
قام وكيل الامن السابق حازم الاعرجي بجولة بوليسية على طريقة الكابوي، وشقاوات ايام زمان، وزرگات الامن القديمة في اسواق الكاظمية مهددا، متوعدا اصحاب المحلات، وقطع ارزاقهم بيده اللئيمة. حيث قام بتكسير اقراص السي دي امام محلاتهم، والقاها في الشارع على طريقة اسياده الصداميين القدامى، باذلال الناس، والتسييد عليهم، وممارسة سلطه لا يملكها، وفرضها بعمامته، وتواطئ السلطات"ياهو يجي يتشيخ براسنة"! قام برمي قطع الاقراص في الارض "متعلم على الزبالة، والوساخة"! اذا كانت المدينة "مقدسة" فكيف يرمي الزبالة والاقراص "المحرمة" في شوارعها؟ الا يخشى ان تدنسها مثلما دنستها اقدامه؟ خو يسوي حمله لتنظيف المدينة، ورفع الاوساخ منها، وجعلها نظيفة، لائقة "بقدسيتها". على الاقل يشغل كم واحد من الاف البطالة في المدينة! لو يخاف من المافيا الايطالية؟
لماذا لا يمنع المخدرات، والحشيش، والحبوب، والكبسول الذي يبعثه لهم اسياده الجدد في طهران؟ يريد منع التبرج، وبيع مواد التبرج. يبين عنده نية يحتفل مع اولياء نعمته الجدد الامريكان بيوم الهالوين(يوم الموتى)! طيب اذا يريد يمنع التبرج(المكياج) لعد هو ليش متبرج؟ اشو مقلم شواربه، وحاف حواجبه! يصير "عالم" دين(وين المختبر ماله) يحف؟! يصير يختلي مع حفاف، لو حفافة؟ واذا العلوية بالبيت حافتلة، ليش ما يبدي بنفسه، ويمنع مرته من الحفافة؟ الامام علي بن ابي طالب قال: "لو سرقت زينب بنت علي لقطعت يدها". يالله خلي يگطع ايد اللي حفتله؟ خل یگطع ايد الحرامية داخل، وخارج الحرم الكاظمي! خل يحارب الفساد، والمفسدين اللي باگو الملايين! بعدين التجار اللي استوردو، وباعو مواد التجميل، والاقراص مو كلهم اسلام، ومسلمين؟! الكاظمية، خو فرغتوها من غير المسلمين. بعد چم مگرود صبي، ومسيحي بالعراق حاطين عينكم عليهم! ما ترتاحون، اذا ما تهجروهم! بعدين وزير التجارة، مو من جماعتكم؟ ليش ما تروح تكسر الاقراص اللي عنده؟ لو گادر بس على الفقره المساکین؟!
واذا الاعرجي سيد، وابن رسول الله(كما يدعي) ليش ما يسوي مثل اجداده علي، وابنة الحسن يطلع بالليل يبحث عن المحتاجين يساعدهم؟ ماكو ارامل، وايتام بالكاظمية؟ دروح هناك بلكي تلگة عدهم اقراص، لو مكياج، لو خمر، لو گاعيدن يلعبون لگو. حتى تخلصهم من الموبقات، وتخليهم يغنون: "فوك ضيم الله لحگني الاعرجي"! هسه اني ليش ذكرته بالارامل المسكينات خاف ياخذهن كلهن جواري عنده؟!
بعدين اكو فد سؤال مشروع! شمدري الاعرجي انه اكو عرگ بالكاظمية، ويريد يمنعه؟ اشو خطية الشباب يسافرون من الكاظمية لابو نؤاس، بلكي واحد يحصله فد ربعية! وهناك تستقبلهم الشرطة، والامن، والمخابرات، والقوات الخاصة، وقوات بدر، وجيش القدس، وجيش المهدي، ويرجعون سكرانين من الخوف! اذا الاعرجي يعرف وين يبيعون خمر في الكاظمية خلي يگل الناس وين، لو بس اله، ولجماعته؟ شنو هاي الانانية؟! بعدين هو من المبشرين بالجنة، وهناك خمور، وحواري، وغلمان. اي ما يصير يا مولانا تريدهه دنيه واخره. خلينة نتونس بدنيانة، احنة ما ظامنين الجنة مثلك!
اما القمار، واللگو، والميسر، ولعب الزار هاي کانت بزمن الملك. شنو رجعت بزمن السادة؟! هي العالم عدهه فلوس تاكل حتى تلعب قمار؟ هاي الزواغير اللي بيها شرب، وقمار دلينه عليهه مو بس الك، حرام. بعدين الريسز بعده يشتغل!
سالفة لاءات الاعرجي ذكرتنا بلاءات مؤتمر الخرطوم. عندما اجتمع حكام العرب(حشاكم) في مؤتمر قمتهم العتيد، وقرروا لاءاتهم الثلاثة. "لا صلح، لا تفاوض، لا استسلام"! على اساس يقصدون اسرائيل، بس همه كانوا يقصدون شعوبهم طبعا! يقال ان بعض الحكام العرب(سخونة) حال عودتهم الى عواصمهم، وقصورهم، وحريمهم اتصلوا باصدقائهم الصهاينة وسالوهم: "ما هو رأيكم بهذه النكته البايخة"؟ احد الصهاينة رد بخبث: "هاي لاءاتكم مثل عباءاتكم مصنوعة(محيوكة) عدنة!
هسة عاد يا مولانة علينة؟! لو "اللي بي حكة تحكة، واللي بي شوكة تچكة" على گولة البغاده. اگول صدگ، الكاظمية بعدهه تابعة لبغداد، لو صارت اقليم بوحدها برئاسة فخامة، ضخامة، سماحة، زعامة السيد حازم الاعرجي حفظه الله ورعاه.
هاذه خبر جديد ما سامعين بي! عيش، واسمع فانت في بلاد العجايب، والغرايب، والمصايب!

#رزاق_عبود (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
في رحيل جليل شهباز، عضو هيئة إدارة الحوار المتمدن	في رحيل شاكر الناصري، أحد مؤسسي الحوار المتمدن

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل