طقاطيق مرفوسة – على الواقع وأيامه- طقطوقة 3

محمد طلعت

الحوار المتمدن-العدد: 3797 - 2012 / 7 / 23 - 21:38
المحور: كتابات ساخرة
    

فطار شهى يا خلق الله
طبعا فى دولة الشيوخ الحالية الكل قافل حنكه وصايم ومحدش يقدر يجهر بفطاره كدا زى زمان، على العموم الله يهدى الجميع والصوم برضه فوائده كتيرة، ...
لكن:
خليك فاكر وأنت عامل فيها مستشيخ اليومين دول إن الدم كله سواء وأن اللى مات فى سبيل فكره أو طنه أو بيته أو .. أو. المهم أنه يكون مات فى الشارع مش على سريره، دا ممكن برضه نقول عليه شهيد.. واوعى حد يزغلل عينيك ويقولك لاء، قوله طيب ما انتم خليتوا من سيد قطب وحسن البنا شهداء اش معنى دول ياعم الشيخ.. هى شهادة لهم بطولة وكوخة لفرج فودة والسادات مثلا.. هتخاف تقول كدا لو خفت تبقى مش فرعونى ولا مصرى أصيل.. ولازم تعرف أن الدم كله دم مصرى ما فيه فرق.. الفرق بس فى امخاخ شيوخكم الأغبياء..
:
وبالمرة كمان ماتنساش وأنت شمتان فى موت عمر سليمان وعامل فيها مثقف وبتقول الخليفة عمر بن عبدالعزيز سجد شكرا لموت الحجاج تبقى تقرأ كدا أعمال الحجاج بالمرة فى تأمين مُلك بنى أمية ودوره فى وأد الفتن ودوره كمان فى الفتوحات، وياريت كدا تبقى تشوف السطر اللى متغبر وسط السطور عن الحجاج فى حسن الخاتمة وكمان ابقى شوف عمر بن عبدالعزيز كان بيحسد الحجاج على ايه عند موته.؟! يامثقفين الغبرة.. انقلوا صح واعطوا للتارخ حقه وانصفوا الحاضر..!
:
وكمان عشان المرارة اللى اتفقعت من أول يوم على الجهل بتاع "الزبيب" حرام لأنه بيسكر.. المغفل اللى يقولك كدا. قوله "اتلهى يامولانا وروح اقرا كلمتين انفع وابرك لك ولا تتكلم تانى ولا تخطب فى الناس إلا لما تقرأ وتتعلم أولا : زرع/ نتج/ صنع/ حصد.!
:
وبالمرة ياعم المؤمن وياعم الثورجى وياعم الكنباوى، خليك مرة تقى بجد وبلاش تمثيل الايمان المفاجئ دا فى رمضان.. واحترم وطنك وفقر بلدك واسترجل وقاطع مسلسلات وإعلانات وبرامج الهبل الرمضانى.. بلاش تقعد تلزق فيها ليل نهار، وخليك واعى ولا تنسى أن قعدتك دى بتترجم بالملايين للأصحاب القنوات دى.. اللى هم فى الأساس قطعوا عليك الاتصالات.. واللى غيبوك ومنعوا عنك المعلومة الحقيقية.. واللى لاهوك فى الخوف والفزع.. واللى هم برده شاركوا فى الفتنة بتلويث الوطنية و الايمان ومسخوا رمضانك ونهبوا بلدك .!
مش معقول انت تتفرج وتدفع، وغيرك يكوم فلوس بالملايين على قلبه من مجرد أنك مغفل.!
:
شارك فى صناعة مصر على نظافة ياعم المستشيخ وصنع منها طاقة نور مش تكون مجرد تابع فى جمع القمامة.. طيب وبعدين بعد الجمع ياترى هنبيعها للصين تصنعها وتصدرها لنا منتجات رمضانية من سبح وسجاجيد وفوانيس بلاستيك، ياخى عيب على المكنسه والكيس والجردل اللى فى ايديك شوف كدا ملصوق على قفاهم ايه..؟ ((صنع فى الصين))، طب والنبى مش مكسوف انت تجمع وغيرك يصنع وترجع انت تانى تشترى، ابقى تجاوزت الحدود بقى لما قلت عليك أنك (((مغفل)))..!
والغفلة دى أكيد من الشيطان ابليس المنجوس والعياذ بالله ولأكيد عاوز دقة زار عشان حضرتك تستشخنن وتسترجل..!
وبلاش ياصاحبى تبقى طرى ومضحوك عليك من الحنلنجية باسم الثورة وباسم الدين وباسم الحرية.. مش ملاحظ إن مافيش حاجة جت خلاص ((باسم مصر))،غير جمع الزبالة ..!

#محمد_طلعت (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
في رحيل جليل شهباز، عضو هيئة إدارة الحوار المتمدن	في رحيل شاكر الناصري، أحد مؤسسي الحوار المتمدن

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل