حيدر الحيدر
الحوار المتمدن-العدد: 3528 - 2011 / 10 / 27 - 22:42
المحور:
الادب والفن
يوميات ولهان...!
ـــــــــــــــــــــــــــ
لَفـْني الدهر بشليلهْ
لَمـَّن رِدت أشكيلهْ
***
أيامي أگضيهه بضجرْ
والليــل ناوبته بحذرْ
والعُمر بدروب السفرْ
يدعس سنيني بخيلهْ
***
ما فادني ليـل الصبرْ
وَجَر بنص گلبي جمرْ
صَوَّبني بسهام الغدرْ
كل نبله تجدح چيلهْ
***
يل طلعتچ مثل الگُمرْ
تضوي درابين السهرْ
يا حلوه يا طعم الشكرْ
يا نبته طَيْـبه وهيلهْ
***
ناطور بجفون الخطرْ
أنطر هلالچ كل شهرْ
يا ليل شَل حالي القهرْ
گلبي إنهدم كل حيلهْ
***
يا ليـله أنوارچ زِهَنْ
هلبت دياجيرچ گضنْ
ميلي عن دروب الفتنْ
يكفـي لِعب ختيلهْ
***
يحْبَيبهْ وَدعْنَهْ الزعلْ
شَع الفرح عاد الأملْ
خلنه نحس طعم العسلْ
يروينـه لو فد ليلهْ
ــــــــــــــــــــــــــــــــــــ
حيدر الحيدر
5 /9 / 1970
#حيدر_الحيدر (هاشتاغ)
كيف تدعم-ين الحوار المتمدن واليسار والعلمانية
على الانترنت؟