ثورة مع إيقاف التنفيذ

حسن إسماعيل

الحوار المتمدن-العدد: 3304 - 2011 / 3 / 13 - 20:45
المحور: المجتمع المدني
    

يا شعب مصر يخيروك بين النظام البائد وتعديلاته
وبين ثورتك ومطلبك بدستور جديد

يا شعب مصر العظيم .. لتعلم أن من طلب تعديل هذه المواد بعينها
وترك بقية الدستور المعيب بكل مواده التي تجعل كل رئيس قادم مبارك

فالصلاحيات المطلقة مفسدة مطلقة
وكرسي الديكتاتور وصلاحياته المطلقة .. هو من يصنع الديكتاتور
وهذا هو دستورنا القديم الذي يريدون أن يرقعوه

واذا كانت الثورة أسقطت الديكتاتور مبارك
فالتعديلات التي لم تقترب من مواد صناعة الديكتاتور في الدستور القديم
ستأتي بديكتاتور جديد .. بمبارك جديد من رحم النظام البائد
مبارك جديد ليس بعجوز كمبارك القديم
أستوعب درس الثورة جيداً
سيـُأمن كل رموز النظام الفاسد وسيأمن عدم رجوع أموال مصر المنهوبة
ولن يخرجهم فقط الخروج الآمن
بل سيعمل بكل الوجوه غير المحروقة من الحزب الوطني الفعال جدا الآن
والذي يشتري مقرات جديدة .. وينشيء أحزاب جديدة بأسماء ثورية مستعارة
هو الذي سيحكم مجدداً مع تيارات أخرى لديها تقاطع في المصالح معه
والذي يعيد ترتيب صفوفه وأوراقه بعد مفاجأة الثورة التي لم تكتمل
وسيجفف منابع الثورة ومنابع كل القوى الثورية
التي لم تروض ولم تهادن ولم تستأنس
ولن يحاكم قتلة شهدائنا ..
ولن يحاكم ولن يحل امن الدولة بحق
بل سيلبسها قناع آخر حيث حربائية المرحلة الآنية والقادمة

ولتعلموا لماذا رفض طلب الثورة الرئيسي بعد سقوط مبارك بعمل مجلس رئاسي مؤقت
يحاكم النظام البائد
ويؤسس النظام الجديد لدولة المؤسسات ودولة القانون المحايد
وكان هذا هو الحل الوحيد الثوري
لكي يقطع كل السبل للرجوع للخلف .. للنظام القديم
لكي يقطع كل حالات الفر والكر من هذا النظام الفاسد على الثورة والثوار
بالتفافات وهمية من نوعية :
ايه مطالبكم ؟؟
طيب نكلم مين فيكم ؟؟
عايزين حد نتفاوض معاه
طيب خلاص نتفاوض مع الشباب البريء الطاهر
لا المطلب بتاع مجلس رئاسي مؤقت
صعب جدا وخط أحمر !!

والمطلب بتاع دستور جديد
ده برضه صعب جدا وخط أصفر !!

لكن المطلب بتاع حكومة تكنوقراط ده مطلب زي العسل
وعندنا كمان واحد تكنوقراطي مأصل اسمه أحمد شفيق

خدوا بالكم يا شعب أن أحمد شفيق هو رئيس الوزراء اللي اختاره مبارك
ولأن مصر أم العجايب والمعجزات
تبقى مصر هي الدولة الوحيدة في العالم اللي رئيسها المخلوع بثورة
هو اللي بيختار رئيس وزراءها بعد نجاح الثورة !!
ويعمل تفاوض مع الشباب البريء الطاهر مش مع المطالب
ويترك موقعة الجمل في مسيرة مسلحة من الهرم إلى التحرير
بناء على توجيهات سيادة الرئيس وثالوث رجاله

ولأن التفاوض مع الشباب غير خالص التفاوض مع المطالب
الشباب ياخد ويدي لكن المطالب بتأمر

الشباب لما نقوله مجلس رئاسي مؤقت ده خط أحمر هيقف
أصل الشباب مؤدب وبيحترم الأكبر

ولما نقوله الدستور الجديد هياخد وقت
علشان كده هنعملك ونظبتلك تعديلات تخليك تلعب سياسة وانت مبسوط وفرحان
هيوافق علشان الشباب بيتخنق بسرعة وعايز ينجز من الآخر

ولأن مصر أم العجايب والمعجزات
مبارك برضه ورجال نظامه البائد والديكتاتوري
اللي قهر وسرق وعمل ما لا يعمل في المصريين
هما اللي اختاروا المواد اللي عايزينها تتعدل مش الثورة

لأن الثورة كانت يا عيني عايزة دستور جديد ..
وطلع الطلب ده مش موجود في مطبخ النظام البائد !

فقال لشباب الثورة اتصبروا بالتعديلات ده سنة ولا حاجة
والدستور الجديد من العين دي قبل العين دي في الموسم القادم وأبقوا معانا
وشيل ايدك من على الريموت كنترول
وأوعى تغير محطة الثورة وتفوتك عجايب مصر !!

وكل الإعلام بتاع النظام البائد الفاسد .. الناهب .. الحاقد .. العاجز .. المضل
عمال يكذب ليل نهار تحت سمع كل العالم وكل الثوار من الشباب البريء الطاهر
وعمال يلبس كل المصايب للثورة وللثوار

مرة كأن المظاهرات في ميدان التحرير المليونية هي اللي خربت مصر ..
وهي اللي مسئولة عن بلطجية الحزب الوطني اللي شغال بـ nickname ..
وهي المسئولة على وقف المرتبات ..
وهي المسئولة عن الحظر ..
وهي المسئولة عن زلزال اليابان ..
إعلام مزيف إلى الدرجة القصوى وكل ده قال ايه ثورة
احنا ثورة مع ايقاف التنفيذ

أمال لو مش ثورة ومكناش نجحنا في إسقاط الرئيس كنت عملتوا فينا إيه وفي مصر إيه ؟
طيب زعل الشباب البريء الطاهر
وعمل مليونية وراها مليونية علشان يسقط شفيق يا راجل
قعدنا قد إيه حوالي شهر كده
يعني اسقطنا حسني مبارك الرئيس الديكتاتور في 18 يوم
وأسقطنا أحمد شفيق رئيس الوزراء في شهر
شوف ياجدع حكمة ربنا وعجايب ثورتنا
احنا وتونس طبعاً وغنوشي تونس

طيب اقعد
قعد الشباب البريء الطاهر برضه يتفاوض ويطلب إنهم يشيلوا ألدو ويحطوا شاهين
قصدي يشيلوا شفيق ويحطوا عصام شرف رجل من الميدان
حيث المعركة الوهمية والتي أبعدتنا أميال عن مطالب الثورة الرئيسية
حيث وضع العربة أمام الحصان الثوري

خدوا بالكم الشباب البريئ والطاهر وكل المصريين واللي قروا اللي أنا كتبه من الأول
الكل كليلة نيسي طبعاً في دوشة شفيق يا راجل والتعديلات ضد الثورية
نسيوا مطالب الثورة الرئيسية والبديهية هي مجلس رئاسي مؤقت ثوري ودستور جديد
وكانت المفاجأة أنه أتى عصام شرف
بس رموز النظام البائد طلقاء .. شرفاء .. أمراء
يديروا كل المطابخ من إعلام بيحارب الثورة
بإبتسامة صفراء وبقناع مكتوب عليه 25 يناير
لبلطجية في الشوارع .. لهدم وحرق كنايس .. وسرقة بنوك
واختفاء الملفات الحقيقية التي تدين النظام
وترك الملفات التي تصنع الإشاعات وتلهي الشعب المصري
في مين كان مخبر ؟ ومين فنان كان له ملف ؟
ومين من النشطاء كان له ملف ؟
كل واحد طالع بملفه
لتفريغ الحلة البريستو الثورية من مضمونها وقوتها وأهدافها وثوريتها
وبلع كثير من الشعب المصري الطـُعم
وبلعت بعض من القوى الوطنية الطـُعم
وبلع الإخوان كل الطـُعم .. طـُعم التعديلات الدستورية
اللي هيخلي البلد زي الفل
والعجلة تدور والأمن يرجع
الجيش وبعض من الشعب والشرطة والسلفيين والإخوان ايد واحدة

ويتم ضرب مصر في قلبها الثوري
ويرتبوا للأنتخابات القادمة بكل جد ونشاط باهر

ملحوظة مـُلحة :
الثورة طبعا مع ايقاف التنفيذ والمصيبة ان الثورة لو بس خلاص كده هنكون بس زحنا جمال مبارك وبعبع ومخطط التوريث وده مكنش بس هدف الثوار ده كان كمان هدف لناس في النظام
لجناح في النظام
لسلاح في النظام
وهنكون قدمنا مصر على طبق من دهب لمن يهمه الأمر ويمتلك تنفيذ الأمر
وساعتها مفروض نراجع شعار الثورة الرئيسي ( الشعب يريد اسقاط النظام )
ونخليه ( الشعب يريد اسقاط الرئيس والتوريث .. وبقاء النظام )

تحذير للثوار ..
لو تمت التعديلات زي ما طبخها النظام
اعرفوا إنكم اتحاصرتوا بين فرعون وديكتاتور جديد وراكم
وبحر مؤامرات وتكتيكات النظام قدامكم

يا ثوار مصر احذروا .. يا ثوار مصر اتحدوا
فهذه اللحظة هي أخطر الأوقات في ثورتنا
إما نكون أو لا نكون
أما تكون مصر أو لا تكون

#حسن_إسماعيل (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل