حوارات قبطية في المواطنة المصرية

أسعد أسعد

الحوار المتمدن-العدد: 3233 - 2011 / 1 / 1 - 15:10
المحور: الادب والفن
    

تقول إضطهاد...ها أزيدك جهاد
و أدوس علي رقبتك...
و حا أحرق كنايسك...
و ها أنهب تجارتك...
و ها أسبي بناتك...
و أخلّي حياتك مرار في إزدياد
ممنوع تصلي...
ممنوع ترنم...
ممنوع إيمانك...يعيش في البلاد
سيوفي ها تفرض عليك إنقياد
ها تشهد ها أسيبك
ها ترفض تُباد
تقول لي مواطن و حق العباد
ما فيش عندي ليك غير سجن إنفراد
كنايسك ها نهدم
وحقك ها نهضم
و ها تعيش ذليل
نهارك ها أبدّل بظلمه و ليل
و رزقك ها تاكله جيوش الجراد
تقول لي فراعنه جدود أمجاد
دي نغمه قديمه
ما لهاش عندي قيمه
ما دخلنا عليكم
و خدنا دياركم
و صرنا عليكم
إنتم عبيدنا و إحنا أسياد
مين اللي قال لك ها أسيبك تصلي
تسبّح ترنم و إلهك تعلّي
روح إجري إستخبي و قفّل ابوابك
و وطي نغمتك و ما اسمعش صوتك
صليبك تشيله
و مش عاوز أشوفه
كتابك في جيبك
ما تقراش حروفه
كنايسك في حاره
و ما لهاش أماره
ديانتك حرام و عقيدتك شراكه
دمك حلال
و مالك حلال
و عرضك و بيتك برضه حلال
و زي جدودك ما ماتوا شهاد
راح أفني وجودك و أيتم عيالك
و أمحي سلالتك ولاد الولاد
و اللي ها أطوله ها اسبيه بطوله
و ها آخده أسير و أبيعه في مزاد
نصيحه أخيره
طاطي لي راسك
و عرِّض قفاك
و خلّي كفوفي تطرقع عليك
تصير عندي آمن
و أسيبك تعيش
أهي دي المواطنه و قانون البلاد
أنا هو سيدك و إنت إللي عبدي
و أنا إللي فوقك و إنت إللي تحتي
أهو ده قانوني و ديه شريعتي
ها تُفرض عليكم بحق الجهاد
*********
بلدي و مالي و أرضي و عرضي
ترابها جدودي و نيلها وجودي
باصلي و أرنم و أطلب إلهي
و إيه اللي يمنع كنايسي و صليبي
باقرا كتابي و أعلم ولادي
نعيش في وطننا و نحب بلادي
إيه اللي خلاك تفكر تعادي
تكفر و ترهب عشان أنكر إلهي
باعبد مسيحي اللي إنت رفضته
و باقرا كتابي اللي انت دشته
و ليه لازم اعبد إلاهك و اسمه
و ليه لازم أسجد في جامع بمدنه
و ليه لازم أقبل نبيك و أهله
و ليه لازم أركع و أصلي عليه
كتابي كتابي و كتابك كتابك
قرآنك بتقرا و بإنجيلي مالك
مسيحي فداني و هوه نادالك
إيه اللي مش عاجبك و معكر مزاجك
ما تحل عني و خليك في حالك
********************
طب نقرا و نفهم و نبقي قرايب
يا أهلا و سهلا بأعز الحبايب
آدي الصفحه جاهزه مليانه عجايب
دي طفله صغيره جوزوها لشايب
و دي تاجره و شاطره شلحت له الجلايب
و دي واحده مرات ابنه خلته م العشق دايب
و دي واحده دم جوزها علي الأرض سايب
و غيرها و غيرها من سيرة المصايب
ده غير اللي نهبه و غير السلايب
و غير اللي عذبهم صغيّر و شايب
و الصفحه مليانه بغم و بلاوي
حكايات كتيره كتبها شهوده و سجلها إللي راوي
فلان إبن فلان إبن فلان حديثهم موثق و كلامهم فتاوي
كتب كتيره و مجلدات كبيره و تاريخ طويل مليان حكاوي
تقول ده يهودي و ده إسرائيلي
طب و اللي كتبه سيدك البخاري
ده كمان ها يكدب و الا كلامه منقي و حقيقي
طبعا ها تزعل كلامي جارح
و تقولي كداب مدلس و سارح
خلاص يا صاحبي ها نعيش نسامح
بلادنا حلوه و الرزق فيها و الأرض مليانه مطارح
إلاهنا واحد مالهش تاني و انا موافقك مش مقاوح
ليه تقول عليّ كافر لوكنت كافر كنت أصارح
*******************
تقدر تعيش و يايا صحبة من غير خصام نزرع سلام
تقدر تحط إيدي في إيدك و نبني حياتنا في ود ووئآم
تقدر تخلي نصيبي نصيبك في حكم بلدنا و ربط الزمام
تقدر تسيبلي ديانتي في حالها من غير أمن دوله من غير إنتقام
تقدر تخلي هوية بلادنا من غير ديانه فرضها علينا أمن النظام
تقدر تقول للمدارس تدرس مناهج توحد مش تزرع خصام
تقدر تقول للمحاكم شهادة القبطي مصري و شهادته إلتزام
تقدر و تقدر و تقدر و تقدر غلبت أعدد و طال الكلام
لغاية ما تقدر تقول بشجاعة مصري مسيحي و مسلم سواء
ها تفضل بلادنا عاليها واطيها و كل دماغنا فكر الغباء
و كل حياتنا مصايب تقيله عايشين في عزله بدون إنتماء
تخش جوامعك بتدعي علينا و كل كلامهم دعاوي إدعاء
و أنا ادخل كنايسي و أصلي لأجلك و يفتح دعائي أبواب السماء
و أقول يارب خلي إخواتي في بلدنا يحل عليهم روح الصفاء
و أقول يارب إقبل صلاتي الضعيفه و إملا بلادي حب و وفاء
و خلي قلوبنا و عقولنا فسيحه لأجل ما تقبل شعاع الضياء
و تعيش يا مصري و تحيا بلادي مثال التقدم مثال العطاء
و نطرد تعصب وارد علينا همه إنه يقتل و يسفك دماء
و نعيش في بلدنا حره عفيفه و تدخل بلدنا عصر البناء
سلامي لاخويا المسلم محبه من رب المحبه معطي الرجاء

#أسعد_أسعد (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات