عمر وعبر

عبد الرضا حمد جاسم

الحوار المتمدن-العدد: 3132 - 2010 / 9 / 22 - 18:56
المحور: الادب والفن
    

عمــــر و عبــــــر
يسألني عن عمري شكثر
لو يا يوم ميلاد ي يمر
جاوبت: يا ساعه يا يوم تعني يا سنه يا شهر
العمر....يلي تسأل مر
الراح منه من البقه أكثر
يسأل:هم راح تترك بعد موتك أثر
ولو راجعت كل ما مضه
تلكه مواقف أنت بيها تفتخر
وعلما تريد...لو ما يصح ..لو ما تحبه الناس

عندك عذر بيه تعتذر
جاوبت:هامدة النارليش تنفخ بالجمر
تسأل عن المر
لو عله الرايح يمر
تسأل عن المكشوف منه
لو عن ألما تعرفه أو مستتر
كال..كل المشيته عدل لوبيه مطبات اوعثر
وهم وكعت ...من كمت بنفس الحفَرْ
كتله...مرت بعمري قصص
كل وحده منهن عمر
ومرات كل يوم من عمري بعمر
عمري يل تسأل بِده
كبل ما صار جسمي بالرحم وتصور
وي أول ظلم
أول قهر
أول سقم
أول ضرر
لاح البشر
ويه أول أنسان فكر يقابل جرم
بكل حزم
بالحلم والعلم والعمل والصبر
ريه أول لأم
تعذبت...شافت ابنها بلا ذنب ينحر
ويه أول أنسان
أبدع...وضع أول مسله للعدل
تنظم أحوال البشر
والشجر والحجر
اختلفت الناس
والأجناس شلون تحسب العمر
الأم...تحسب عمرها بعمر ابنها الكدام عينها كبر
وعند البعض النسبه بالميه بين
شكد ربح وشكد خسر
بين ساعات شغل أو تعب اوسهر
وساعات نوم وكسل وخدر
والبعض عنده العمر
لحظات معدودة
وخطوط بالطول ممدودة
بين الشرف و العهر
وبين الخير و الشر
وعند البعض
الفرق بين الحلو ما مر من الزمن
وبين ألي مر مر
وهواية ويكن الأكثر عدهه العمر
أيام معدودة
والعمر مكتوب ومقدر
والحقيقة
العمر...فسحه من الزمن
بين نبض برحم وبين وحشه وسكون الكبر
فسحه....بيها همسات
نسمات عذبات
وبيها هموم تلسع كالجمر
العمر...كتلك وكت مر
بيه
ليل..ظلام وهموم ونجوم و كمر
فجر..طلعت شمس تطرد شر
ظهر...كرصه بدفو لو شرده من حر
عصر...ألشمس نزلت ولون يعني انتضر
وكت..بيه الفصول الأربعة
ربيع..بكل مكان..الأرض..وبكل زمان تخّضر
خريف...الأوراق تعوف أغصان الشجر
وعلرصيف وبالشوارع والحدايق
مثل أيام العمر تنثر
والهوه الها يبعثر
شته...شمس أو برد
و غيوم و رعد وبرق ومطر
صيف....أجساد تعوف الهدوم العليها من الحر
ويضيق النفس بالصدر
والنهار يطول والليل يقصر
العمر...وكت ان عشته مكسور
مكشوف لو مستور
مسجون...لو محصور لو حر
مغمور لو مشهور
ناصر جنت لو منصور
يبقى مسافه من الزمن
ما بين كماط وجفن
والبشر....شما حجه
شما مشه
شما صفن
بين شك أو يقين أو ظن
يبقى فسحه من الزمن
بدت ...أنت البجه
وتنتهي عليك نسوان يبجن
وزلم منكبه...متَربه
البعض تكتم حزنها
والحزن عله وجه البعض يظهر
صفنات تاخذ البعض والبعض يشرب جكاير
وكهوه مره بدلال تفتر
العمر....ضوه بعد ظلمة رحم
يبدي بيه النظر
وقبل ظلمة كبر ينتهي بيها البصر
هو زمن
ان عشته تعبان
متعوس لو فرحان
بين أمان أو راحة أوحنية رحم
أو حصرة أوضيق الكبر
العمر...رحلة مسير أو سفر
تحتاج قوة تحمل أو صبر
بيها....مشاهد فرح ماتنسي أو تنكر
بيها...ثكيل يمر يكسر ظهر
بيها عايش على الهامش كل رصيده صفر
بيها من يكتب شعر للفجر ينتضر
بيها من يكتب نثر للفرح ينتصر
بيها شهم علك وسام النصر علصدر
بيها نذل عار عله راسه ظفر
ويه الشعر
بيها..من عاش بشرف رغم الفقر
بالعفه والقناعه والصدق بالعمل صار وكبر
وبيها....عله مود المال ذل نفسه وصغر
بيها غَدر
بيها غِدَرْ
غَدرْ....شما عِلَه سطحه تصور
ينهار ويبقه منه بس أثر
غِدَرْ....شما شَعَرْ هو قوي ينكسر
بيها.....ظلمْ حتماً إله يوم أو ينحسر
بيها....عَدِل حتماً إله يوم أوينتشر
بيها...عله مود الحق ضحه أو جازف
إتعنه وللمصاعب عبَر
العمر....مجموعة أعمال و أقوال أو صور
تعلم البشر
هوايه عبر
من هل العبر
_كلشي اليمر بالعمر يحتاج يتحلل ويتفسر
_إحذر...أبد لاتغتر
لن كلشي إله أول إله أخر
ومثل ماوصلت الك توصل للاخر
_ الوكت مو دايم لأحد
الوكت دولاب يفتر
_ النهر يبقى نهر شما جره بيه الماي
والماي لو بيه شح أوجف أو نشف
يكولون جان هنا نهر
_شما طال مجره النهر
حتماً مصبه بالبحر
ومنبع لو ينبع نهر من بحر
_شما با لعمر مركب بحر
مرساه حتماً علبر
_ شما طار طير وعله
إله يحط لويعشعش علشجر
وينزل علأرض ينكر
_ألي تهدم بالعمر لو خلصت النيه ينعمر
_الكسر...حتماً ينكسر
شما قوه وتجّبر
ان كان هو بشر
لو جان قاسي طبر

_الصار يابس..كلش سهل ينكسر
والصار مايع لين ينعصر
مايه يروح بكتر
والبثل ماله ينشمر
_كلشي لو زودت بيه النفخ
عن حدهَ حتماً ينفجر
_وكل صلب لو زادت عليه النار
يحمر أو يمكن ينصهر
_كلشي التّزيد عليه الضغط ينكمش لو ينحصر
_كل فعل يقابله رد فعل
يعتمد علتحمل والقوه والصبر
_ الخشب لو لاحته النار يحترك
أولوطّول عله النار يصبح خفت
ما ينفع يزيحونه كتر
_الماي...شكد مهم....وشكد قوي امن يفيض
ويطّفون بيه النار
بس لو حطيته علنار يتبخر
_ألي غصَبْ ينغصب
والعّيش الواد م بالقهر
يوم أو إله يضوك شكثر
صعب القهر
_كلشي انكسر ينجبر
بس الشرف
بلور من ينكسر
يطّشر أو ينّثر
_النخل...شما لاحه ضرر
يمرض يموت
بس ما حمل مالح تمر
ولاصار تمرهَ مر
_إن غيمت وأبرقت.....حتماً وراها مطر
ينهمر
_والعالي متعالي عله خالي
يوم...والماي عن هامته ينحسر
_الردي شكد ما تصور كبر بالرذيلة
بالرذيلة يندفن وينطمر
_العمر مابيه لَغِز يبقى لغز
ساعه واله ينحزر
_الشمس...شما رادت تغطيها غرابيل الحقد والغدر
حتماً.....توزع نورها عله النجوم والكمر
ويوصل ضواها للأرض
وبالصبح هو يبشر
والنتيجه
العمر....رحله
أول محطه الرحم وأخر محطه الكبر
يبدي بكماط...وينتهي بخامه بيضه لعورات البشر تستر
وهسه......يلي سألت
للعمر أنت قدر
وكلمن يكلك ها كثر
كله غلط
لن البشر متعودة ما تحسب أيام الرحم للعمر
كال...هذا ألي كلته عله العمر
شكد عليك من المصا يب جر
كتله العمر
خطوات موزونه تنمشي بكل حيطه وحذر
وهو حبل من الراسين ينجر
وشما جَرَه بالعمر
عله هل حبل يبّشر
والعمر...مو ماي جربه....ينزل نكطه نكطه
و لو تنزرف بلا حساب يخر
بعض الناس تعلمت من الزغر
عدهه العمر
مره وسياره وقصر
أشعر....
أنه طولت
أستسمحك تعذر
وأعتذر
وانت عليك أختار لا تحتار
قدر ..فسر
شلون ينحسب العمر
عبد الرضا حمد جاسم

#عبد_الرضا_حمد_جاسم (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل