العنزة العنزية/حكاية اطفال من حكايا ستي اليافاوية اللي لسه ما حكتها

عماد أبو حطب

الحوار المتمدن-العدد: 3062 - 2010 / 7 / 13 - 22:55
المحور: الادب والفن
    

الليلة كان جاي على بال ستي تحكيلنا قصة جديدة عن الغول وطلبت منا انه ننتبه وما نعمل دوشة وهيك بلشت الحكي بالقول:"كان يا مكان...يا سامعين يا كرام...
في هالعنزة إلها أربع أولاد واحد اسمه سعسع وواحد اسمه حمحم وواحد اسمه معمع وواحد اسمه حماحم. كل يوم بتطلع العنزة الصبح من بيتها وبتسكر الباب على اولادها ولما بترجع الظهر بتكون حامله على ظهرها حمل حشيش وابزازها مليانه حليب. أولادها جواالدار. بتدق ع الباب.- يا أوليداتي ماء ...ماء.. يا اسخيلاتي ماء..ماء.. افتحوا بويباتي ماء ...ماء. ع ظهري حمل حشيش... وابزازي مليانات حليب.بيهجموا الأولاد، وبفتحوا الباب. بياكلوا هالحشيشات وبيرضعوا هالحليبات وبتسطحوا جنب امهم..
وفي يوم من الأيام طلعت العنزة لتلقط رزقها و رزق أولادها.. هيه طلعت من هون والغول اجي من هون. أثاري الغول كان سامع كل الحكي اللي بتحكيه العنزة لاولادها علشان يفتحوا الها الباب. أجا الغول وقرب من الباب و صار يدقدق ع الباب ويقول بصوت بيشبه صوت العنزة:.
- يا أوليداتي ماء..ماء... افتحوا ابويباتي ماء...ماء ع ظهري حمل حشيش... وابزازي مليانات حليب.
هجموا السخلات علشان يفتحوا الباب،الا السخلة الصغيرة نط الزغير.. قالهم ولكم استنوا هاي مش امنا ...صوتها غير...وبعدين ما قالت يا اسخيلاتي ...هاي مش امنا...هذا الغول. الغول. مش الغول... ما ردوش على الزغير سعسع وراح يفتحوا الباب. زرق سعسع واتخبى جوه القش. و فتحوا السخلات الباب من هون والغول فات من هون.
صاروا يركضوا من الخوف ويصرخوا بس شافوا الغول . نط عليهم الغول وبدقيقة كان بالعهم في بطنه وحمل حاله وطلع من الدار.وما انتبه انه الزغير سعسع متخبي في القشات..
أجت العنزه.. لقيت الدار قفره سخلاتها مش موجودين .سمعت صوت بين القش ولما قربت شافت الزغير سعسع متخبي وعم يبكي.هدته للزغير وسمعت منه القصة من طقطق للسلام وعليكم .. حملت حالها العنزة وركضت و راحت على ظهر بيت الغول وقعدت تدبك... صار الغول يقول مين اللي ع حيطاننا كسر فخارنا
ردت عليه العنزة:- هاي العنزة العنزية، أم قرون الحديدية، اللي أكل معمع وحمحم وحماحم يطلع ع البر يزاحم.
قالها الغول استنيني حتى أعمل قرون من عجين وانزل لك. استنته. عمل قرون من عجين وقعد بالشمس لما نشفوا. ونزل الها. قالت اله هلق جاي انته تخوفني بقرونك العجين هذه؟وهجمت عليه وكسرتهن بضربة واحدة. هرب الغول للبيت وقالها استنيني حتى أعمل قرون من طين... عمل قرون من طين وقعد بالشمس حتى نشفت ونزل لها.. كمان هجمت عليه وكسرتهن بضربه واحدة.اجه يهرب قامت حشرته العنزة في الزاوية وقالت اله لوين هارب هاي المرة؟ قالها استنيني حتى أعمل قرون من حديد. ضحكت العنزة وقالتلو شو مفكرني هبلة لهاي الدرجة استناك لتستعد وتقتلني وبعدين معاك اجاك الموت يا خسيس وراحت ضارباه في بطنه بقرونها وفجرته..ولما انفتح بطن الغول نطوا أولادها معمع وحمحم وحماحم.. أخذتهم للبيت وخلت الغول مكبوب على الارض ميت وقالت لولادها احترسوا في المرات الجاي وما تستنوا عدوكم حتى يصير أقوى منكم ولا بياكلكم.
وتوتة توتة خلصت الحدوتة....حلوة ولا مفتوتة؟

#عماد_ابو_حطب (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل