جهاد علاونه
الحوار المتمدن-العدد: 2785 - 2009 / 9 / 30 - 09:54
المحور:
كتابات ساخرة
كان صوتي وما زال حلو وقوي وكنت أخرج حفلات غنائيه ومن زمان من سنة 2000م تقريباً بطلت أطلع للحفلات الغنائيه على شان تم تعييني في وزارة الأوقاف بمهنة خادم مسجد ومؤذن قبل ما يكون في آذان مركزي للمدينه بكاملها فتركت الغناء والفن والطرب على شان ما بتناسب مع مهنتي كرجل دين , يعني أنا الآن رجل دين , شو هذا التحول اللي صار في حياتي ومين يلي مسؤول عنه , يمكن كنتْ أنا غبي ما عرفتْ كيف أتعامل مع المؤامره اللي تم تدبيرها بحق الفن والطرب .
بس والله إني ندمان على اليوم اللي شُفت فيه الأوقاف , والله كانت حالي بالأول أحسن , يا رجل أنا كنت أسمع بللي بدخلوا المساجد إنهم عباره عن ملائكه , والله كنت أفكرهم هيك , وكنت بس أسمع عن واحد إنه بروح على المسجد كنت أتمنى أن أمسك بثوبه وأتبرك فيه والله إني كنت مخدوع في عالم رواد المساجد , يا رجل شو هذا , والله كل المشاكل إللي بسمعها في البلد بتصير غالبيتها منهم.
يعني كنت أميز بين الناس إللي غاوين مشاكل وبين الناس إللي بقفوا في المساجد في الصف الأول , كنت أعتقد إنهم هذول شيء وهذولاك شيء آخر مختلف تماماً عن رواد المساجد بس لمّا دخلت على المسجد وبدأت أخدم فيه تفاجأت من هول ما رأيت , يا رجل رأيت اللي بخلقوا المشاكل في حارتنا نفسهم هم اللي بخلقوا المشاكل في أماكن العباده وبصراحه همه اللي بقفوا في الصف الأول خلف الإمام آه..هذول همه نفسهم اللي بقفوا في الصف الأول والثاني والثالث والرابع في المسجد , بس في ناس ما بخلقوا في المسجد مشاكل وهذول إللي إيمانهم ضعبف جداً هذول هم اللي بصلوا في المسجد في الصف الخامس والسادس والسابع.
الصف الأول معروف لمين هو, في المسجد في ناس على طول الخط واليوم والأسبوع والسنه بيجوا وبقفوا في الصف الأمامي في المسجد, حتى في منهم بنافسوا الإمام على مكانه أمام الصف , وهذول دائماً بحضروا قبل موعد الآذان بدقائق وللي بشوفهم بركضوا ليلحقوا الصلاه بالصف الأول بنبخع من منظرهم,على شان هيك بتلاقيهم بسرعه حجزوا لأنفسهم في الصف الأول .
وفي ناس ابتحضر للصلاه متأخره بعض الشيء يعني بحضروا بعد الآذان تقريباً بدقيقه واحده وهذول بكون إيمانهم ومحبتهم للمسجد ولبيت الله أقل من يللي بحضروا في الصف الأول هذول هم أصحاب الصف الثاني ما هي المسأله واضحه وضوح الشمس إللي بحضر للصلاه أولاً بكون الدين في حياته شيء عظيم وشيء جميل على شان هيك بكون حضوره حضور مميز , أنا هيك كان تفسيري للأمور , وكنت بس أسمع واحد بقول فلان يصلي في المسجد في الصف الأول كنت أحكي بيني وبين نفسي : مشاء الله اللهم قوي إيمانه.. اللهم هبنا إيماناً كإيمانه ..اللهم هبنا إيماناً كإيمان العجائز.
وللي بحضر للصلاه في الصف الثالث بكون هذا قد خرج من منزله تقريباً بعد إقامة الصلاه وهذا أكيد أو من المؤكد إنه بكون مُلتهي في أمور الدنيا يعني بكون يشاهد برنامج سياسي أو ثقافي على التلفزيون أو ملتهي مع أهل بيته في موضوع تافه , والدين والصلاه في حياته شيء غير مهم على شان هيك ما بجد إله مكان للصلاه إلا في الصف الثالث والصف الأول والثاني بكونوا محجوزين للي الدين في حياتهم شيء مهم.
والصف الرابع هذول بطلعوا من دورهم وحنا في الركعه الثانيه من الصلاه فعشان هيك بصلوا متأخرين وما بجدوا مكان ليهم لا في الصف الأول ولا الثاني ولا الثالث .
وفي ناس بحضروا للصلاه في الصف الخامس , وانا ما بحكي عنهم إنهم الطابور الخامس لالالا أنا بقول إنهم في الصف الخامس وهذول بنكون احنا امخلصين صلاه وبكونوا هم بادئين في الركعة الثانيه من الصلاه.
وفي ناس بيجوا بعديهم للصلاه في الصف السادس هذول بنكون احنا أنهينا الفرض والسنه وبكونوا هم باديين في صلاتهم مع نهاية صلاتنا .
وصدقني يا أبو علي إنها المشاكل غالبيتها بتكون على حسب نوع أو درجة الصف في المسجد , يعني إللي بحضروا للصلاه في الصف الأول هذول بتكون مشاكل الحاره والفتن والخبص من غالبيتهم , طبعاً في ناس منهم كويسه بس غالبيه المشاكل يا أبو علي من اللي بحضروا في الصف الأول , بعدين صعب جداً إنك تقدرلهم أقوياء وإيديهم طايله وبضروا أي شخص ما بعجبهمش , والله يا أبو علي إني كنت مفتون فيهم وبعدين شفتهم على حقيقتهم , بتلاقي الواحد فيهم مش شايف حدى قدامه .
أما يللي في الصف الثاني فهذول مشاكلهم أقل بقليل من مشاكل الصف الأول بس في فرق بينهم وبين مشاكل الصف الأول في أشياء بسيطه منها إنهم تبعين الصف الأول إللي بكونوا خلف الإمام أحياناً بعض الناس منهم بتأخروا عن حضور الصف الأول , فلما بيجوا وبلاقوا في حدى وقف مكانهم بصيروا يحشروا فيه ويحشروا فيه حتى يزهقوه الصف الأول فبضطر للمغادره للصف الثاني , وإذا كان شاب صغير بالعمر بمسكوه من الخلف وبزتوه وراهم وكأنهم ورقة (فاين) .
بس تبعين الصف الثاني هذول مش مهم عندهم هذه الأمور المهم أن يقوموا بإرشاد الصف الأول وتوجيه الأوامر من أجل إصطفافهم بشكل مستقيم وتلاقيهم بقولولك أرجع لورى (للخلف) ..قدم لقدام (إلى الأمام) لزوا الصفوف سووا الصفوف ومن كثر تعاليمهم وإرشاداتهم بطلع الصف الثاني أعوج..يا رجل والله بشوف في المسجد شوفات عجيبه.
بس تبعين الصف الثالث بختلفوا كمان بعض الشيء عن الصف الأول والثاني هذول أهم شيء عندهم الصلاه بجانب الأعمده الملتفة الدائرية على شان يسندوا ظهورهم للأعمده الدائريه وبعدين يوم الجمعه بتلاقيهم حاجزين لبعضهم البعض أو بيجيك واحد وبرمي على صاحبه إبعصاته أو بعبايته (عباءته) لكي يحجز له دور بجانب العامود الدائري , ودائماً في خلاف بينهم وبين السلفيه على الأعمده بس مش اتفكر وانت سيد العارفين على شان السلفيه طمعانين للجلوس بجانب الأعمدة من أجل إسناد ظهورهم , لالا السلفيه ضد الموضوع كله , هم ينهون عن الصلاه بين (سارييتين).
شو بدك إبطولة السيره أهم شيء صحة البني آدم , البني آدم ما فيش أخبث منه البني آدم يا رجل الشيطان نفسه بتعلم منّه , مش بقولوا الشيطان بوسوس للبني آدم؟ أي صدقني إنه في ناس بوسوسوا للشياطين وبفتنوا الشياطين , والله في واحد بعرفه ما بصليش غير بالصف الأول وحرم كل بناته من ميراثه , وفي واحد ما بصليش غير بالصف الثاني هذا بموت على الفتن ومره من ذات المرات قلي يا رجل إنه ما بعرف يقعد بدون فتن وقال إنه اليوم اللي ما بفتن فيه بين الناس بروح بفتن بين أمهْ وأبوه.
بس هي إن (خليت بليت) الدنيا لسا فيها خير بس أهل الخير إقلال والطيب ما إلهوش حظ , والحظ لكويس دائمن مع الإنسان الفتان زي الجيزه لكويسه بتكون من حظ البنت المش حلوه , هالدنيا عجيبه .
#جهاد_علاونه (هاشتاغ)
كيف تدعم-ين الحوار المتمدن واليسار والعلمانية
على الانترنت؟
|
ارسل هذا الموضوع الى صديق
|
حفظ - ورد
|
بحث
|
إضافة إلى المفضلة
|
للاتصال بالكاتب-ة
اليوتيوب
لينكدإن
تيلكرام
تمبلر
بلوكر
الموبايل
