جهاد علاونه
الحوار المتمدن-العدد: 2782 - 2009 / 9 / 27 - 19:10
المحور:
كتابات ساخرة
ليلة الأمس كانت بالنسبة لي ليلة عنيفة بالمناقشات لم أدخل لمثلها تقريباً منذ عام 1997م.
-شو هسع كل هالناس مش قادرين يقنعوك؟ إن الإسلام خطر على الغرب وعارفين إنه احنا على صح وهم على خطأ؟
- المسأله مش بالكثره ولا هي بالشجاعة إنتوا كلكوا عباره عن إنسان واحد, على شانكم على رأي واحد وبتحكوا تقريباً نفس الإسطوانه وبالنسبه للإسلام وخطره على الغرب أكيذ هو خطر على المصلحين السياسيين وعلى المتنورين وعلى الحريه والمساواة والديمقراطية , أكيذ هذا الشيء بعرفه.
-شو إنت بتقول عن كلام العلماء إنه اسطوانه؟ وشو الحريه والمساواه والكلام الفارط؟
- لا مش قصدي وأنا آسف جداً , بس هذا الكلام كان يحكيه الإعلام الليبرالي قبل خمسين سنه وهو اللي كان يروج لمثل هيك دعايات والآن على ما أظن يجب أن يتخلى الاعلام الليبرالي عن بث مثل تلك الدعايات , شو عالم طلع على الفضاء وسمع صوت الآذان!! وبس نزل على الأرض بعد عشرين سنه زار القاهره وسمع فيها نفس الصوت واللحن!!! فسأل عنه فقالوله هذا الآذان وبعدين الرجل تفاجأ ودخل في الإسلام على شان سمع معجزة الآذان, شو هذا الكلام غير العلمي.
- كيف إنت مش امصدقنا؟
- لا على العكس أنا مصدقكم وانتوا جماعه صادقين إنتوا بسيطين وناعمين وحلوين وكثر الله من أمثالكم ,أنا بس مش امصدق العالم اللي حكى هذا الكلام.
- طيب في موضوع ثاني أكيذ بدك اتصدقه.
- شو هو؟
- في عالم صور الكرة الأرضيه وشاهد نور طالع من الكعبه, شو رأيك بهذا الكلام؟
- يا جماعه ريته الف نور وبنور عليه وعلى قلبه .
- بس طلعوا على القمر طلوا من فوق شافوا نور طالع , عملوا حساباتهم الفلكيه فعرفوا إنه طالع من الكعبه والآن الكعبه من هذا المنطلق اكتشفوا إنها الكعبه هي مصدر الكون.
- يا سلام ..طيب ماشي خلينا انشوفه والله عن جد حابب إني أتنور باهالنور, عيوني مطفيين من كثر البكا والنوح .
- إنت مش امصدق؟ ما هُمه شطبوه من الشبكه العنكبوتيه , كانت على النت وبعدين الصليبيين الحاقدين على الإسلام شطبوه.
- لا كيف مش امصدق , يعدين ليش بتشكوا إني مش امصدق؟ أكيذ لأنكم إنتوا مش امصدقين , أي صدقوني لو بدي أنزل لممارسة هيك كتابات من بُكره بصير أثرى رجل في الأردن , وغير الناس تيجي وتتمسح بكذبي ودجلي ونفاقي , وغير أعيش لورد وملياردير على حساب العقول الضعيفه , وغير أصنع للنساء (حُجب- رُقيات) للي بدها تحبل وللي بدها تسحر لسلفتها ولسلفها وللي بدها تسحر لجوزها وتخليه ما يسمعش كلام أُمه , وللي بدها تسحر لحبيب القلب , يعني زي ما عمل أحمد زكي في فلم (البيضه والحجر) كان يعراض السحر والشعوذه والدجل وبعدين تبنى كل هذي الأفكار وصار من أغنياء البلد , يتعني احنا بلد بعيش على الكذب والنفاق والدجل , بعدين مش من حق الصليبيين يشطبوه عن النت, لا عن جد ما إلهموش حق.
- شو يعني كمان مش مؤمن بالحجب ؟ على كل حال شكراً إلك النقاش معك عقيم.
- ليش هو أنا سبيت حدى منكوا , بس اللي بتحكوه عن جد كلام فاضي , قبل ثلاث سنوات زرت واحد وكان عنده شيخ (حاوي - فتاح ) بقرأ على أي مرض آيه قرأنيه وبشفيهو والشيخ نظر في وجهي وقال :إنت يا أستاذ محسود , عيونك ووجهك فيهم حسد , في ناس حاسدينك, فقلتله : على إيش بدهم يحسدوني ؟لا عندي سياره ولا رصيد في البنك ولا أنا ساكن فيلا غير إشوية المقالات إللي بكتبهم في الحوار المتمدن , لايروح إنهم حاسديني على الحوار المتمدن, يوخذوه ما بدي إياه يا ريته ألف مليون مبروك عليهم أي والله عن جد بريحوني مبروك عليهم الحوار المتمدن ,شو طايلني منّه ...آه ولاّ يمكن حاسديني على (نانا) شو طايلني غير التعب وعدم النوم والتفكير فيها ليلاً ونهارا .. فحكالي: لا يمكن الحسد على الصحه, فقلت في هذي ممكن أنا بمشي عدة كيلومترات من غير توقف وبقرأ كل يوم ساعتين , وبالنسبه للأمور اللي معاك خبرها ,نشيط جداً وبحاجه لمهدأ يعني مش زي بعض الناس إللي بياخذوا منشطات ومش مشايه الأمور معاهم مثلي ,أنا دايمن مزاجي عال العال .. فقال: عشان هيك بدي أعطيك هالوصفه وبالمجان, فقلت : ليش يعني بتفكر إني بدي أشتريها ؟ ولا حتى بالمجان , وأقلك؟ خليني أموت من الحسد وخلي الحسد يقلع عيونهم, قال _وصفه) أي شو إنت طبيب عام.
- طبيب عام؟
- آه كلامك هيك بدل , بدل على إنك طبيب عام أو اختصاص .
- بتصدق ‘نها الأزمه عندي أحياناً بتكون واصله للشارع.
- أكيذ واصله للشارع ,بس أنا لو كنت حاكم إداري بسجنك على جرائمك البشعه.
- شو جرائم وما جرائم , الرسول كان يعالج بالقرآن.
- هذاك الرسول مش إنت , لعاد المسيح كان يحيي الموتى , ليش ما الرسل بولص ومولص ما قالوا إحنا بنحيي الموتى؟ أكيذ على شانهم بعرفوا إمكانياتهم أمام إمكانيات الرب, بس انت جعلت نفسك أكثر من الرسول.
- يعني يا أستاذ بدك تقنعنا في سولافتك هاي مع الشيخ في إيش ؟ صارلك ساعه بتسولف عنه ,إنت شو إللي بدك إياه؟
- أنا بدي أعيش في مجتمع مدني تمارس فيه الحريات العامه وإذا امرضت المستشفى يشفيني وأروح على الدكتور مش على دجال وإذا في امرأه ما بتنجبش يعني ما بتخلفش أولاد تتعالج بالزراعه مش بالحُجب ,وإذا كان معاي مصاري زياده عن حاجتي بالآلاف أتبرع فيهن لمثقف مثلي من أجل اتمام طباعة كتاب أو ديوان شعر , مش أروح أرميهن في المساجد أو أبني مسجد , لا إذا كان معاي فلوس زياده لازم أبني فيها مركز صحي , يعني دخلكم اللي بتعالج على حساب شخص مش الشخص المُتبرع بكون إله أجر وكأنه باني مسجد مالكم "أجعلتم سقاية الحاج وعمارة المسجد الحرام كمن آمن بالله وباليوم الآخر؟) هذا استفهام استنكاري للموضوع بالكامل , وكمان المرأة اللي ما بتخلفش أولاد لو كان معاي فلوس زياده وتبرعت فيهن إلها مش أفضل من ما أشتري قطعة أرض ب 50ألف دولار أمريكي من أجل إقامة مسجد, شو صحصحوا؟
- إنت بدك مجتمع مدني بدك تنتشر الدعاره شو حريات عامه , شو امرأه حره تلبس فوق الركبه وتقول امرأه حره قاتلك الله يا رجل اتقي الله شو الشيب بلش يطلع في راسك روح صليلك ركعتين لله واستغفر ربك.
- يا جماعه ما هو اللي بنظر للمرأه على أساس إنها سلعه جنسيه ورخيصه هذا هو الكافر , عشان هيك بكون الشخص المؤمن باللته وبالدين إذا شاف وحده حلوه ولابسه مثلاً زنار لحم فوراً بصير يفكر فيها جنسياً فقط لا غير , لالالا الموضع أجمل من هيك , كمان الرجل وتبرجه بالنسبته للمرأه مُغري جداً لعاد ليش الرجال ما يتحجبوا ؟ أنا بشوف في القرى الشباب بلعبوا في الملاعب والحارت وهم يرتدون شرتات أي ألبسه رياضيه قصيره , فليش ما يشعروا بالخجل وليش الموضوع عندهم عادي , نفس الشيء عن المرأه ونفس الشعور لازم يكون.
- إنت هسع بتقارن النسوان بالرجال استغفر ربك روح صليلك ركعتين لله.
- يا جماعه موضوع المرأه مش موضوعنا بس انجرينا كلنا للموضوع جر , خلينا في موضوعنا , أنا بدي أفهم وين راح الشعاع الصادر من الكعبه؟
- إه إه هاذا إنت بعدك مش امصدقنا , في عالم قال هذا الكلام على التلفزيون .
- عالم كذاب ولازم ينسجن وتقوم الدنيا وتقعد كيف هو يعني مستصغر إعقولنا ؟على شان يحكي هيك, بدي أفهم.
- يعني انت عقلك كبير واحنا عقولنا صغيره؟
- مش قصدي زاد فضلكم انتوا الخير والبركه والإنسان بموت وهو بيتعلم ومن علمني حرفاً كنتُ له عبداً بس مش إملاحظين يعني هيك إنكوا زودتوها إشويه , أي صدقوني إني قرفان حالي من هيك سوالف.
- على كل حال يا أبو علي قدامك في جوره بُكره بس يحطوك فيها رايح تعرف إنه الله حق.
- وانتوا قدامكوا شعب جيعان للحب وللرومنسيه وللحريات العامة ولأشياء كثيره بستحي من ذكرها بخجل من العالم اللي برى يعرف إنا لسا بعدنا بنفتقر إليها , وحيات العيون الحلوات وحياة اللي جمعني فيكوا من غير ميعاد إنكوا رايحين تتحاسبوا على وسادتي الخاليه ورايحين تتحاسبوا على الثراء الفاحش والبسكوت اللي إبتطفحوه والفلل إللي بتسكنوها والشعب مش املاقي لقمة خبز , ريت الله لايشتي عليكوا إذا بيجي عيد الأضحى وأنا مازلت أشكو الطفر والضنك , صدقوني رايحين تتحاسبوا حساب عسير على المساجد اللي إبتبنوها والناس مش إملاقيه مركز صحي تتعالج فيه.
-ما هو إنت لو بتصلي وبتتقي الله كان ألله أغناك من فضله .
-من فضله أم من فضلكم؟
لا من فضله.
لا صدقوني من فضلكم.
#جهاد_علاونه (هاشتاغ)
كيف تدعم-ين الحوار المتمدن واليسار والعلمانية
على الانترنت؟
|
ارسل هذا الموضوع الى صديق
|
حفظ - ورد
|
بحث
|
إضافة إلى المفضلة
|
للاتصال بالكاتب-ة
اليوتيوب
لينكدإن
تيلكرام
تمبلر
بلوكر
الموبايل
