خلف الدواح .... وخطوط المرجعيه الحمراء !!

ناصر الياسرى

الحوار المتمدن-العدد: 2393 - 2008 / 9 / 3 - 08:52
المحور: كتابات ساخرة
    

( نقد المرجعيه .. خط أحمرا لا يمكن تجاوزه .. الا من يحمل صك الغفران الحوزوى )
_ ألو ؟
_ منو؟
_ شنهى السالفه .. سيدنه .. اشو مرجعيتكم صايره فركاس ما تنكاس ؟؟!!
_ هم رجعت حليمه لعادته القديمه .. يمعود خلف مو اليوم اول ايام رمضان شنهى سالفتك هم تريد اتفطرنه ؟؟
_ ايباه .... وانته شلون ضابطه ضبط ..... دين وصلاة وتقوى ... اشو انته مطلوب من رمضان الراح 28 يوم !!
_ خلف هذا موضوع شخصى والدستور العراقى يحترم ويكفل خصوصيات الفرد .. ليش تحاول ربط لحيه بلحيه ؟؟
_ زين وشبيه صاحبك كريم النوري .... شحامى حمامه حمي .. ويعتبر انتقاد المرجعيه خط احمر !!
_ كريم شاهبورى ؟؟ ... هذا صاحبك مو صاحبى .
_ شبيك سيدنه ... اكلك كريم النورى ياشاهبورى !!
_عرفته .. قصدك ابو قناة الفرات واليشتغل بفيلق بدر .. عمى هذا خوش آدمى وعنده خوش أطروحات وطنيه .. سمعته منه من جنا مشتركين بمؤتمر الكونفدراليه الدوليه للصحفيين باربيل
_ مثليش .. نورنه ... الله ينور كبرك بالحياة بالكهرباء الوطنيه بدلا من السحب لو مولدة البيت
_ والله ابو حسين من اطروحات السيد النورى هو اعطاء كركوك للكرد بدلا من يستحوذ عليها السنه العرب !!
_ كول غيره سيدنه .. قابل الاكراد بروتستان لو كاتوليك لو هندوس غير همه سنه حالهم حال اخوتهم السنه العرب ؟
_ لا اغاتى السيد النورى ينطلق منطلق قومي .. وهذوله السنه العرب قومجيه على كولته وكل القومجيه متهمون الى انت تثبت ادانتهم !!
_ وبعد شيكول ؟؟
_ ويكول يا محفوظ البكه والسلامه ان العماله لأيران خيرا من ا لعماله للدول العربيه !!
_ وهذي العماله شلون فسره السيد السند ؟؟
_ فسره على اساس كون ايران دوله مسلمه وشيعيه ولها مصالح مشتركه مع اتباع اهل البيت فى العراق وتبنت المعارضه الشيعيه سابقا بينما الدول العربيه نواصب ويكنون العداء للشيعه ووقفت بجانب النظام السابق !!
_ زين سيدنه مو المعارضه جانت فى دول الجوار العربيه مثل سوريا والاردن ؟
_ لا عينى خلف .... المعارضه الحقيقيه فقط التى كانت فى ايران . اما الباقى فهم عملاء للنظام السابق وعملاء للدول العربيه ويكنون العداء للثوره الاسلاميه فى ايران ولدولة ولي الفقيه السيد الخامنئى وللمرجعيه الشريفه !!!
_ زين سيدنه وهذي المرجعيه الشريفه على كولتك .. شنى شغله ؟؟
_ شغله قيادة الامه الاسلاميه نحو اقامة دولة العدل الألهى .
_ زين ودولة العدل الألهى التي اقامته المرجعيه الشريفه فى العراق على كولتك .. شقدمت للمواطنبن من خدمات ؟؟
_ الله اكبر يا خلف .. شنهى نكران الجميل ... كل هذا الخير وبعدك فاك حلكك ؟؟
_ ولك سيدنه غير فاك حلكي من الجوع ... اريد اعرف شقدمتلى حكومة أم الخمسات؟؟
_ أيباه ... شكد قاسي ..من انزول على كلبك الحجري .. مو صارلكم خمس سنوات تلطمون براحتكم .. أحد منعكم مثل ما منعكم صدام ... مو حتى الجفانه والقامات والزناجيل اجتكم من اخوتكم فى الجمهوريه الاسلاميه فى ايران .. بعد شتريدون قابل نرضعكم مميات ؟؟
_ زين وباقي الخدمات ... مثل الكهرباء الماء المجارى البانزين تشغيل العاطلين مكافحة الفساد الاداري والمالى مشاكل المهجرين الارهاب.
_ الله اكبر ياخلف .. قابل تريد كل هذا ينحل بخمس سنوات .. عمي ينراد للحكومه اقل شي فد قرن لوكرنين أستيل !!
_ زين .. جاليش المرجعيه ورطتنه وأمرتنه بنتخاب قائمة الائتلاف العراقي .. اذا جانت تعرف بصعوبة المهمه ؟؟
_ على كيفك خلف .. يكول ابو المثل أكعد أعوج وأحجى عدل .. من يكول المرجعيه دعمت قائمة الائتلاف ؟!!
_ ولك سيدنه اشك زيكي ... كل هذا الدعم وتكول المرجعيه ما داعمه احد .. جاى هيه المرجعيه داعمه الحايط وماادرى ؟؟!!
_ زين خلف احلفك بقبر رجل اختك .. شفت قريت فتوى من المرجعيه تكول انتخبو هذى القائمه لو ذيج القائمه ؟؟
_ لا .. جا جماعة الائتلاف شلون يكولون بأن القائمه مدعومه من المرجعيه ؟؟
_ عمى هذوله جذابه وحراميه !!
_ جا الشعب شلون صدكهم ؟؟
_ عمي الشعب .. أزواج .. كمش !!
_ زين والجماعه من رفعو صور السيد ليش مكتب السيد ما اعترضت على الموضوع ؟؟
_ عمى خلف .. ترهدن اذا كلمن رفع صورة السيد المكتب يعترض عليه .. جا هذا يرادله عشرين مليون فتوى يوميا !!
_ زين اذا للسيد فقط عشرين مليون صوره جا لباقى المرجع والساده الكرام بدء من شهيد المحراب وانتهاءا بحجة الاسلام والمسلمين السيد عمار الحكيم خفظه الله ورعاه
جم صوره اتصير؟؟
_ خير من الله ... كلهم ساده وعلام وصورهم بركه من رب العالمين .. وانته شحارك كلبك ؟؟
_ آنى .... الحارك كلبى ليش تحجون على هدام الجان عنده مليون صوره .. وطلعتوه من ط.... ز الجلب .. وهسه فد السيد عنده عشرين مليون صوره ومحد فك حلكه واعترض عليهه من غيرصور باقى المراجع والساده والعلام على كولتك ؟؟!!
_ ولك بن الزنيم ... يا نغل بن النغل .. يا هتلى بن الهتلي .. يا بزر سخته .. يا حياندري
تقارن بن صبحه ويه المرجعيه الشريفه و الساده العلام الأجلاء ؟؟
_ على كيفك سيدنه .. غير انتم تكولون على صدام جان دكتاتورى ؟؟
_ نعم
_ وجان طائفي ؟
_ نعم
_ وجان يسرق خيرات الشعب ؟
_ نعم
_ وجان يوزع النفط بالمجان على الدول العربيه ؟
_ نعم
_ وجان عميل لأمريكه ؟
_ نعم
_ وجان ظالم الشيعه وهامل مدن الجنوب
_ نعم
_ وجان طالع اربعه وعشرين ساعه على التلفزيون ؟
_ نعم
_ وجانت العوجه عاصمة العراق السياسيه
_ نعم
_ وجان الحكم بيد أهل تكريت والرمادى والموصل
_ نعم
_ وجان تشككون بأصله ؟
_ نعم
_ من نعم الله عظامك .. جا ماتكلى الجماعه شيفرقون عنه .. من نعنتله على بو خيركم
من جانبهم غفورا رحيم ومن جانبه حرامس ... من بلابوش عمايم
_ شوف .. خلف الدايح .. راح اخاير كريم النورى .. و أطلب منه يدزلك واحد من الويلاد ( يكغمك ) !!

#ناصر_الياسرى (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل