موريس عايق
الحوار المتمدن-العدد: 1659 - 2006 / 8 / 31 - 09:56
المحور:
الارهاب, الحرب والسلام
ما حصل يسبب عقد اللسان. ليست بطولات المقاومين خلال الحرب هي السبب انما على العكس ما حصل بعد الحرب. نصر عسكري انتهى بشبه هزيمة سياسية والحق على الطليان.
ذكرني صديق بعد الحرب والتعليقات عليها بمقولة غوبلز: كلما سمعت ثقافة اتحسس مسدسي. لكن المشكلة المسدس ما عاد يكفي والواحد صار لازم يتحسس مدفعه على القليلة.
اتحفنا مثقفونا بقراءتين للحرب. الاولى وهي خاصة بالليبراليين والانسانيين والانواريين وهلم جرا قالوا اننا هزمنا والحرب كانت غلط من اساسها ولخدمة سوريا وايران والذي بدأ الحرب هو حزب الله. يعني خطف جنديين اسرائيلين هو كان السبب للقصف الوحشي الاسرائيلي وتدمير المطارات والجسور وقرى بأكملها. ممكن نقول ان نصر الله اخوت, ولا يحسب, اخطا التوقيت, امي سياسة. لكن ان ما حصل هو ذنبه!
يعني شو نوم الضباط الاسرائيليين مغناطيسيا ليقصفوا او يدمروا. هل هو من اعطى الاوامر لتسوية الضاحية بالارض؟
أخطأ بالخطف ولكنه كان السبب لكل هذا الدمار شغلتين غير بعض وليقول الواحد الثانية لازم يكون حمار, او سوري وبعدين راح نبين السبب انه سوري.
الجماعة اكدوا وبحساب رياضي الهزيمة. 1200 لبناني مات والله يرحمهم والبنية التحتية تم تدميرها ونحن لم نقتل في النهاية الا شغلة 200 اسرائيلي. طبق هذا المبدأ على كل معارك التحرير لتراها هزائم. الثورة الجزائرية كانت مثال على الهزيمة والتي انتهت بتحرير الجزائر!!!!!!!!!
المشكلة انهم ذاتهم الذين شرشحوا كل واحد قال ان تكلفة "تحرير" الامريكي للعراق غير مقبولة. اكثر من مية الف عراقي ,والحبل على الجرار, ماتوا. هم انفسهم وقفوا ضد هذا المبدأ وجعلوا كل من قال هذا عميل ويقبض كوبونات نفط واللي ماراح تخلص على ما يبدو.
شو يعني الدم اللبناني كتير غالي والعراقي ... اخت أبو مثلا. مية الف عراقي منهم مشكلة لتحرير العراق و1200 لبناني كارثة انسانية.وهم ضد ان نزيل ابتسامة طفل من اجل اسمى المبادئ واللي براسو مخ يفهم على الله تبعون.
القصة ما خلصت على القسم الاول حتى طلع النص التاني. مصري ناصري, كتر خيره والله, طالب باستعادة هدف ازالة اسرائيل ونحن لهلق ما ازلنا اثار عدوان 67 حتى ما نحكي على اللي بعدو, وآخر رأها معركة بداية نهاية اسرائيل. الشباب على ما يبدو دخلت الخطوط عندهم على بعضها وفكروا ان حزب الله هو الذي يملك التوماهوك والاباتشي والميركافا ولازم يكمل حتى تل ابيب.
شباب حزب الله صواريخه كاتيوشا ومضاداته للدبابات ار بي جي 29 وما عنده مضادات جوية. يعني كيف راح يكمل لتل ابيب؟
طيب . يمكن الشباب قصدهم مو حزب الله انما حدا تاني. طيب مين؟
واستنا اذا كان فينك تستنا حتى تسمع مين.
والاحسن ان هذا القسم أبى الا ان يكتشف, والعرب ثلاثة ارباعهم من نسل ارخميدس, عودة الروح القومية. والتي من ابرز تجلياتها قطع الكهربا عن لبنان وتهديده باغلاق الحدود.
الكارثة منها عند المثقفين انما بالسياسة والشعب. لأول مرة بالتاريخ المعروف, ربما, يذهب قسم من الشعب الى الحرب للدفاع عن الدولة وباقي الشعب ضد التعدي فيستدعي هذا السلوك الشائن ان تقف الدولة ضدهم. حزب الله يحارب اسرائيل وحكومة لبنان ضد حزب الله, بمعزل عن التصريحات وهي حكي للجرايد وياريتها حكي جرايد. النظام العربي باجمعه ضد حزب الله. الحكومة قررت ان تتأخر أسبوع بعد الحرب والسبب الوحيد معاقبة الشيعة على وقوفهم مع حزب الله. المهجرين هربوا والسوليدير طردتهم.
يعني كيف الواحد بياخد نصر سياسي مع هيك حكومة وهيك نظام عربي, غطا العدوان وشغلات كتير غيرها, والدول الكبرى ضده؟
واكتشف المثقفين الانسانين الهزيمة السياسية والحق على حزب الله. شباب هذا حزب الله منو الله (ما تخلطوا)
لنؤكد المشكلة ليست بالمثقفين والسياسيين بل بالشعب, وان كان المثقفين نخبتهم, بس هم عادة ما بيحكوا مع الغوغاء وربك عليم مين جمهورهم.
المهم الشعب وشو بدك مثال الشعب الفلسطيني اللي عم يحارب من شي قرن ضد الانكليز وبعدها ضد الاسرائيليين واجترحوا عجائب بالبطولة والشجاعة انتهى امرهم, سياسيا, الى اتنين.
محمد دحلان وصاحبو ابو مازن والذي اقام زعامته على الفساد ومافيات النهب والروابط الاسرية والعشاير وامامه حماس التي بعد نجاحها طالب بعض مندوبيها بمنع الرقص الشرقي وفرض الحجاب, يعني بعد كل هي المصايب ما شغلون شي قد هلقصة. والحمد لله ان هنية والزهار كانوا هون وضبوا اصحابهم بس المعنى بالاخير وصل.
شعب حارب مية سنة وبالنهاية دحلان وحماس وديمقراطيا يعني شو هلشعب. بصراحة حرام فيه الجزمة.
اما بخصوص العراقيين فالحال منو احسن. القتل على الماشي وما حدا بيعرف مين عم يقتل مين او ليش.
بالاخير اكتشفوا انهم شعوب وقبائل وعملوا المؤتمر الدولي لشعوب العراق للمصالحة والظاهر انه ما راح يكمل. والحل شو؟
تقسيم المنطقة على حسب الاثنيات والطوايف ما راح تشتغل.
القسم الاول راح يرفض انطلاقا من انتمائه الاكبر والقسم التاني راح يوافق. وماحدا يظن ان كل قسم راح يحارب التاني .لا ,راح يحاربوا بالاول داخل كل قسم لتأمين الوحدة الايديولوجية. بالقسم الاول راح يختلقوا اذا هم عرب ام مسلمين او شيعة(يتوحدوا مع ايران) او حتى مسيحيين ويطالبوا بالوحدة مع لبنان ويمكن يطلع بالغلط كم قومي سوري. والقسم التاني راح يختلفوا اذا هم علمانيين او متدينين وحتى هلحل لن يفلح.
طيب الديمقراطية. يمكن تمشي؟
لبنان وما حدا يروح بعيد. الشباب دخلوا الحرب الاخيرة وطلعوا منها. جماعة حزب الله حاربوا وانتصروا وجماعة اذار زعلوا لانو حزب الله انتصر. وحاليا عم يعملوا كل شي من اجل تحويل النصر الى هزيمة وما حدا احسن من حدا. كل واحد بيعلن, وبديمقراطية, انه الدولة ويعبر عن مصالحها. يعني عنا 3 تيارات فصار عنا 3 دول وكمل لقلك.
التاريخ عنا, كما يقول الرحباني الصغير, بيضل بيعيد حالو. بس في شغلة زيادة, ربما لم تلفت انتباهه وقتها, انو التاريخ بيعيد حالو بالمقلوب.
بكل العالم بيعمل الواحد حرب اهلية وبعدها بيجيب الديمقراطية الا عنا بيعمل الواحد ديمقراطية واول قرار للديمقراطية هو الحرب الاهلية وبعدها بيضل التاريخ بيعيد حالو. يعني هلتاريخ على اية مسطرة بيسطرو الواحد. بدنا مسطرة مخترعة وما حدا يفكر ان مسطرة بتبلش 100, 99, 98 وتكمل هي مسطرة بتظبط. اذا بتقلبها بتصير صحيحة بس التاريخ عنا ما بينقلب. وبعدنا عم ندور على مسطرة. فعلا التاريخ مشكلة الواحد بيفهم ان بعد الهزيمة العسكرية هزيمة سياسية وبعد النصر العسكري نصر سياسي. بس عنا هزيمة عسكرية فهزيمة سياسية 67 ونصر عسكري فهزيمة سياسية 73 والآن. الهزيمة جايى كيف ما برمتها وربك اعلم. والتاريخ ما عم يظبط لا على ماركس او فيبر ولا حتى على القرود السود.
الديمقراطيين, المثقفين طبعا, بيضلوا بيستغربوا انو ليش مع كل انتخابات ديمقراطية بيطلعوا برا, بيكشحن الشعب بالمشرمحي؟
الحال عنا هو 0,5% بيحكموا الكل والديمقراطيين مشروعهم توسيعها الى 1% بيحكموا الكل. 0,5% الجديدة هي هم ,اي المثقفين الديمقراطيين, والحديث منو افتراء. يعني الشباب بيقدموا اقتراحات ومتطلبات للاحزاب المسموح لها بالمشاركة بتطلع الكل برا واحيانا بيقدموا مواصفات عن معايير الفرد المؤهل ديمقراطيا بتطلع الكل برا, يعني بالاخير بيحكوا متل كل ملك عربي, الشعب منوش جاهز للديمقراطية.
طبعا نحن منا ضد التوسيع من 0,5% الى 1% وهي خطوة تقدمية بس منها ديمقراطية.
طيب مين بقي من الشعوب, السوريين؟
السوريين عندون كل المشاكل السابقة بس ما حدا بيحس عليهم. ما هم رب الكذب. يعني بيخلوا الكل يصدق انهم جبهة الصمود والتصدي وقلب العروبة وحتى اصحاب الفضل الاول باخراج الاسرائيليين واسقاط 17 ايار- والصدام الاول والاخير مع الاسرائيليين راح لنا فيه 80 طيارة ويمكن ما ضربوا قذيفة واحدة وبعدها يمكن ما ضربنا رصاصة- والعالم بيصدقهم ومانهم بحاجة ليضربوا مجرد كف. السوريين بيكذبوا على الله ذاته وبيصدقهم والدليل انهم اعطوا للعالم دينين من ثلاثة وكل الانبيا من عنا الا محمد والذي زارنا بيفاعته. لكن الحالة لم تستفحل بهلشكل الا بعد الاستقلال. فالسوريين اخذوا وطن كذبة ومن وقتها عايشين الكذبة من المهد الى اللحد. والكذب كمنتج سوري- متل طق الحنك كمهنة لكل لبناني على ذمة الرحباني الصغير- لا يوازى عالميا هو السبب بعدم دخولنا الى الغات وتوقيع اتفاقية الشراكة مع الاوروبيين لانهم يرفضون اعطائنا حقوق الملكية الفكرية- امبريالية شو بدك-وما حدا يصدق ان هناك خلافات اخرى فنحن مع كل القرارات الدولية وشرعة الامم المتحدة واللي بدك اياه.
يمكن الواحد بيدرك هلشغلة عبر تلميذ السوريين جنبلاط. فالسوريين ربوه كم تلاتين سنة وهلق بيكذب على الطالع والنازل بس على المفضوح, هي شغلة بالدم والتدريب ما بينفع فيها. واكتر من هيك ان اسامة بن لادن اقنع العالم ان الطريق الى القدس يمر بافغانستان وبرجي التجارة والشيشان وكوسوفو والبوسنة ولا واحدة منها الها حدود مع فلسطين. يعني لو ما كانت امه سورية كان بيقدر يعمل هالشي؟ اعوذ بالله. هي خصلة وارثها من الوالدة.
طيب مين ضل؟
الاسلاميين. والشباب وبعد الحرب اختلفوا اذا المراة بتصلي بساحة الكعبة او لا. واحيانا اذا الدخول على بيت الخلاء برجل الشمال او اليمين واذا هيدا واجب او مندوب. الشباب ماوراهن شي.
مين ضل بالامة؟
ما ضل شي.
يعني امة نخبتها -وهي تعبير عنها قبلت النخبة والامة او ما قبلوا وهي منها على كيفهن- بتبلش بالقرضاوي وتنتهي بالنابلسي وبتمر ببشور - وفيكن تحطوا الاسم اللي بيعجبكن وبيضل الحكي صحيح- هيك امة حرام فيها شحاطة عاهرة ساعتها 10 قروش.
اما شو الحل ففي احتمالين الاول ان القصة هي شي ميكروب بالجو وهون بتكون مهمة الجامعة العربية بتشكيل لجنة من علماء الطقس ومن الاجانب حصرا - العرب اصلا فيهن هالميكروب- لاكتشاف ميكروب شرق المتوسط واختراع شي دوا له.
والحل التاني بنحكي بعدين.
#موريس_عايق (هاشتاغ)
كيف تدعم-ين الحوار المتمدن واليسار والعلمانية
على الانترنت؟
|
ارسل هذا الموضوع الى صديق
|
حفظ - ورد
|
بحث
|
إضافة إلى المفضلة
|
للاتصال بالكاتب-ة
اليوتيوب
لينكدإن
تيلكرام
تمبلر
بلوكر
الموبايل
