مقال ساخر

مؤيد السعدي

الحوار المتمدن-العدد: 6615 - 2020 / 7 / 11 - 12:56
المحور: كتابات ساخرة
    

الحكومه تتعامل مع المواطن والطبقة الفقيره بهذا الأسلوب
اسمع؛
اكو وحدة متزوجة بس حبابة حيييل ساكنة شقة ابعمارة
( يعني من مثيرات الجدل عله كولة المثقفين )
وكل يوم من يطلع رجلها لشغله يصعدلها واحد شكل شي زغار وشي اكبار من كل الأنواع والتوجهات
( يعني صايرة وحدة وطنية عله كولة المستقلين )
بحيث الناس الساكنه بالعمارة ملوا ولعبت نفسهم من الشكولات الي تدخل العمارة عله هاي الحبابة الصايرة ابعمارتهم ملتقى جماهيري
( يعني توافقية وطنية عله كولة الحزبيين )
وبيوم من الايام كلولها كافي ترى راح انفضحج
( يعني ايلوحون ابملفات الفساد عله كولة البرلمانيين )
بس ماكو فايدة لما دزولها خبر انه قررنا نجتمع بالليل ونجي نكول لرجلج ترى واحد صاعد واحد نازل
(يعني يضربون بيد من حديد عله كولة المصلحين ) ؟
المهم منعولة الوالدين خافت وكالت خل الكالي فره زينه للسالفة
(يعني غطاء دستوري عله كولة المشرعين )
واشتغل تفكير بت ابليس وجابت موس حلاقة وطيرت نص من حاجبها !
ومن اجه رجلها كامت تبجي وتدهك وتلطم
فسألها رجلها : كللها هاا شبيج حبيبتي شكو .. اشصاير .. دفهميني ؟
كلتلة : جاي اعدل بحواجبي وكصيت حاجبي وجوارينا كلهم يضحكون عليه ويصيحون وراي ( واحد صاعد واحد نازل)
( يعني تسقيط سياسي عله كولة الاعلاميين )
هذا هم المعدل صعدت الغيره براسه ونطت دمارات المرجله ابجسمه وغلا عرق الناموس فلكف ساطور اللحم وطلع بنص العمارة يصيح : مناعيل الوالدين مرتي واحبها ( واحد صاعد واحد نازل ) انتوا شعليكم .. معليكم بيها والي يندك بيها النوب اسوي ما اسوي بي وارجعه لل ..
(ارجعه للمربع الاول .. عله كولة السياسيين)
الناس هم سمعت وكلمن غلس وسد بابه وطب جوه لان مثل متعرفون طلايب وعطاوي وفصول وشكاوي وقط ابمختلف انواعه لهذا قرر الجميع السكوت حقنا للدماء ودعما لرصانة الوحدة الاجتماعية
( يعني حفاظا على التجربة الديمقراطية عله كولة الديمقراطيين )
" شاهد سالفتي أيها الاحبة الكرام : اكو هواي ناس مثل هاي الحبابة مطيحة حظ الوادم وملبستهم الطاسه بس خبيثة وتعرف اشلون تقشمرهم وتضحك عليهم
( يعني عدها مقبولية عله كولة الفاسدين )
والمصيبة الأكبر انو اكو هواي مثل صاحبنا رجل الحبابة ماكولين من الفج للفج ومغلسين وراضين ومطمبخين ويدافعون عنها ويعتبرونها فضل من الله منزله عليهم (يعني تاج الراس عله كولة المنبطحين ) لا او واحدهم من اتكله بوية ترة انهجمت ابيوتنه يزعل عليك ويمتعض ويوجهلك خطاب شديد اللهجة؛
وتاليها شنهي انظل ساكتين كاتلنه القهر........
مدري عليمن جبناها !!!!!!!

#مؤيد_السعدي (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات