عادل عياد
الحوار المتمدن-العدد: 5004 - 2015 / 12 / 4 - 21:59
المحور:
الادب والفن
( 1 )
الكل شاف اللي معرفش هو يشوفه
حياته كانت بالنسباله غموض
غمض عيونه ومعرفش يفتحهم
وزع دموعه على منابع الصبر
لكن الغريب إن الصبر مصبرشي
فغرق القلب
وفضلت عيونه مغمضه للنهايه
( 2 )
العصفور بعد ما ادبح
رفرف لحد السما
كان كل ما ييجي يحبها
تبعده لبعيد
كان كل ما ييجي يضحكلها
تضحّك الأسراب عليه
كان بيطير بين السحاب وريشه بيعافر
يحاول يخطف الفرحه بجناحه المكسور
فتحول السما الفرحه لعذاب
لشبكه تصطاده
والشمس بتشقشق أمل لعنيه
سما مغروره
وكتير طيور استشهدت في عشقها المجنون
( 3 )
ماشفشي من الغربال
مع إنه مش أعمى
مهربشي من غدر الزمان
مع إنه عاش العتمه
طب ليه يادنيا مرحمتيش
مع إنه طلب الرحمه
( 4 )
خنقت جذور الشجر الكائنات الضعيفه
لفت على أجسادها النحيفه
شنقتها شنق
وطوتها في قلب الأرض بعيد
مهربشي من المجزره
غير الكائن العنيد
صدقني ياصاحبي
محدش بيتعظ من الموت
غير الأموات
#عادل_عياد (هاشتاغ)
كيف تدعم-ين الحوار المتمدن واليسار والعلمانية
على الانترنت؟