إعتزل لو الغيبه الكبرى؟

سامر رسن الواسطي

الحوار المتمدن-العدد: 4371 - 2014 / 2 / 20 - 21:41
المحور: كتابات ساخرة
    

مِن يوم الإعتزال الثاني للسيد "داخلين على جده" والناس بمنطقتنه دايخه ومسطوره وما تعرف رَجِلهه من حِماهه،بعض الأنصار يكَولون السيد أعرف بمصلحة العراق والمذهب فلا تدوخون راسكم،والبعض الآخر منهم يكَول كم يوم والسيد راح يرجع،وغيرهم يكَولون لا هاي هي بعد انتهت والسيد غِسل ايديه من جماعته ومن الوضعيه كلهه وما يرجع....
صكَبان ابو الغاز يكَول راح تصير أزمه لذلك من هسه يحاول يخزن اكبر قدر من قناني الغاز...
حجيه نشميه تخزن طحين....
الوالد يخزن تمن....
شيخ خماط يكَول الوضعيه خرطت و من هسه جاي يحضر هو وجماعه ملثمين ما اعرفهم البيكيسيات والأربِيجي سفن ويكَولون بس السيد ينطينه الضوء الاخضر راح نحرك مراكز الشرطه ونفلشها وإذا ما نكَدر نوصل لمراكز الشرطه فراح نفلش مكاتب حزب الدعوة الإسلاميه فرع المالكي وإذا ما كَدرنه نوصل لمكاتب حزب الدعوة فرع المالكي فراح نوصل لمقرات المجلس الأعلى للثورة الأسلاميه ونفلشهه على راسهم...
وشنو علاقة مقرات المجلس الأعلى بالموضوع ما ادري،والله شنو يكَولون كل عقلكم السيد زعلان وإحنه نظل كَاعدين وساكتين،والعباس نكَلب عاليها ناصيها...
بعض المتطرفين من الأخوة بجماعة التيار الصدري يكَولون غَيبة السيد للدراسه بأيران قبل أكثر سنه كانت الغيبه الصغرى وهاي راح تكون الغيبه الكبرى...
جماعة الدولة المدنيه ودُعاتها ظامين راسهم ومن نذكرهم بشعاراتنا والمبادئ يكَولون يا شعارات يا مبادئ يا دولة مدنيه يا قنادر،ما تشوفون الوضعيه صايره كظ اخوك لا يتيه...وكل واحد منهم مصادقله اكثر من وحده بالفيسبوك من العراقيات العايشات بالخارج بلكي يطلعنه يمهن،لذلك تشوفوهم ينسخون بسوالف نزار قباني ومحمود درويش وما يلحكَون...
إي والله مثل ما أكَللكم،الوضعيه كلش خابطه ومو تمام..بس مع ذلك ما راح نستسلم..
اللهم صلِ على محمد وال محمد والعن عدوهم وانصر ولدهم مقتدى مقتدى مقتدى....

#سامر_رسن_الواسطي (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات