جهاد علاونه
الحوار المتمدن-العدد: 3295 - 2011 / 3 / 4 - 00:45
المحور:
كتابات ساخرة
وأنت عزيزي القارئ إذا كنت فاضي أشغال وأعمال فبإمكانك أن تزورني في البيت لتتسلى أو لتقضي وقت فراغك معي..وأي إنسان لا يوجد لديه شغل أو عمل بإمكانه أن يشتغل في رسم صورة لي إذا كان فنانا..وبإمكان الكذابين والدجالين أن يكتبوا عني كثيرا من الأكاذيب إذا لم يجدوا أحدا في البلد يكذبون على لسانه..والله وكيلكوا الكل عاملني في البلد حكايته وسولافته , واللي مش املاقيله سولافه يسولف فيها بصير يحكي عن مقالاتي على الإنترنت واللي مش املاقيله شغل يشتغل بصير يطلع على باله يشتغل بي, حتى اليوم جاء أحد المصورين وطلب مني أن يصورني بجانب مكتبتي ليكتب عني موضوعا شيقا لصحافة الجامعة ونظر في وجهي وقال: طالما أنا في هذين اليومين فاضي وما عنديش شغل ..ابتسم صدقني راح يطلع أحسن موضوع..وقبل أسبوع اتصل بي أحد المذيعين على عمان أف أم وقال: الآن أنا فاضي وما عنديش شغل شو رأيك أعمل معك مقابلة إذاعيه؟؟؟ يعني أنا حكاية كل من ليس عنده حكاية وأنا قصة كل من ليس لديه قصة يكتبها أو رواية يحكيها للناس وأنا أولا وأخيرا شغلة أي انسان ما عندهوش شغل, يعني أحيانا أكون جالسا في البيت لوحدي وفجأة يدق جرس الباب وحين أفتح الباب أجد قريبا لي أو جارا يقول: والله شفت حالي فاضي شغل قلت خليني آجي على أبو علي, وعلى فكره كل اللي ما عندهمش شغل غيري في البلد كثر مش بس المخابرات, لا, كمان المواطن العادي المسالم الذي لا ليس له دخل لا في السياسة ولا في الثقافة ,وليس مشكلة عندي أن أكون شغل الناس أو شغل الذي لا يملك شغلاً ومش مشكله إذا (الفاضي بعمل قاضي) بس المشكله عندي صارت إنه كل واحد فاضي صار بده يشتغل بي والناس ما فيش ليها شغل إلا أنا , فلماذا؟ أعتقد السبب يعود إلى طيبة قلبي الذي لا يحقد على أحد وليدي التي لم ولن تؤذي في يوم من الأيام إنسانا , يعني الناس ما الهمش هذول اليومين شغل إلا أنا..وين بروح ووين باجي ومع مين بقعد..وكل واحد فاضي وما عندهوش شغل بيجي على حد باب بيتي قال على شان يسليني, بس هو بكون قصده مش هيك , هو بكون قصده شيء آخر ألا وهو إنه هو اللي بده يتسلى بي ويشتغل بي ويبلش بي .
وكل أقربائي وجيراني حين لا يجدون عملا أو شيئا يتسلون به فإنهم فورا يفكرون بي ليشتغلوا به أو ليلهوا به , حتى جابي شركة موبايلكم (أورنج) استفتح بي هذا الصباح بفاتورة الإنترنت فسألته شو اليوم جاي بكير؟ فقال: لا والله بس شفت حالي فاضي وبلا شغل فقلت خليني أشتغل في فاتورتك, فقلت له: يعني هو ما فيش عندك شغل غير أنا؟ يا أخي البلد مليانه ناس متهربة من دفع المستحقات والضرائب اللي عليهم ليش ما اتروح عليهم وتنساني هذا الشهر حتى يأتي ألله بفرجه, وبعد ذلك بساعة مررت بجانب السوبر ماركت فناداني صاحب السوبر وقال: اليوم شفت حالي فاضي وما عنديش شغل فقلت خليني أحسب ديونك فطلع عليك (..) فقلت له: يعني هسع انت إلك مصاري على كل أهل حارتنا ومع ذلك ما أجيتش تحسب غير ديوني أنا؟ يا زلمه روح شوفلك واحد ثاني اشتغل فيه غيري.
وبعد ذلك رجعت إلى الدار لأشرب القهوة مع أمي وزوجتي أمام باب الدار فسمعت صوتا مزعجا قادما من خلفي , فالتفت إليه وكان جاري (طارق) يطرق عامودَ الكهرباء بمطرقة حديدية : فقلت له: يا رجل شو هذا الإزعاج؟ فرد ضاحكا: والله اليوم متحير شو بدي أشتغل فقلت خليني أحاول تعديل الماسورة في عمود الكهربه تاعك, فقلت: شو مال العالم والناس والدنيا !! أي هو اللي ما بلاقيش شغل بيجي يشتغل بي؟ أي بديش أشرب قهوة نهائيا على باب الدارويلعن..., وحين دخلت الدار قالت لي زوجتي: والله متحيره اليوم شو بدي أطبخ شو رايك اتروح ...على..., فقاطعتها قائلا: شو حتى كمان اللي مش عارفه شو بدها تطبخ اليوم صارت بدها تشتغل بي؟ شو رأيك تطبخيني؟
وحين جلست لأستريح في غرفة النوم أخذتنني الغفوة قليلا فرأيت خيال معشوقتي نانا وقد جاءت هي الأخرى لي في منامي , ويبدوا أنها هي أيضا اليوم فاضية أشغال وليس لديها أي عمل تقوم به بسبب سوء الأوضاع السياسية لذلك تركت كل الناس ولم تأت لأحد في منامه إلا لي أنا , واستيقظتُ على رنة هاتفي النقال وكان صديقي(مازن) هو الذي يرن ومنذ أكثر من شهر لم أتلقى منه اتصالا واحدا ولم يسأل عني فغالبية أصدقائي حين يعرفون بأنني بلا عمل يتجنبون المحادثة معي والسهر معي والجلوس معي ولا يتذكروني إلا حينما أكون أعمل, وفي هذه المرة استغربت من صديقي (مازن) كيف قد خطرت على باله رغم أنني لا أعمل , أمن الممكن أنه أيضاً فاضي أشغال؟؟؟.. وحين سألته هذا السؤال قال: ( آه.. والله بس شفت حالي فاضي لا شغله ولا عمله فقلت خليني أحكي معك وأعزمك على سهرة هيك نقعد فيها ) فقلت له : صدقني وأنت أكثر العارفين بأنني لا أحب الخروج ولا السهر خارج المنزل, فأنا طوال حياتي كلها لم أخرج خارج منزلي للسهر.. ولكنه أصر قائلاً : يا زلمه ما هو أنا اليوم فاضي أشغال .. فقاطعته وقلت له ماشي يا أستاذ على كيفك,ما هو اللي فاضي يعتقد إنه كل الناس فاضيه.
وبعد أن وضعت هاتفي على طاولة المكتب عاد ليرن مرة ثانية وهذه المرة كان رقما خاصا فقلت : يا ساتر أستر من أرقام الخاصة,وكان صديقي (جعفر) الذي انقطعت أيضا أخباره منذ ستة أشهر.. داعبني قليلا ومازحني كثيرا , وبالمناسبة صديقي هذا دمه من النوع الثقيل جدا والذي لا يستطيع أي أحد منا حمله أو الجلوس بجانبه وله رائحة زنخة جدا, والمثير في كل الموضوع اعتقاده بأن دمه خفيف جدا وهو يعتقد أيضا بأن ظله خفيف جدا وبأنه صاحب روح مرحه وحين مللت من مكالمته الطويلة سألته: شو اليوم خطر على بالك حتى تتصل بي؟ يا رجل من ستة أشهر لم أتلقى منك أي اتصال: فقال: ولا شيء..صدق ما في أي شيء مهم بس شفت حالي فاضي فقلت لازم أرن على أبو علي وأسمع أخباره , بشرفك ما هو دمي خفيف؟ فقلت له وتكاد مرارتي أن تفقع ووجهي يريد أن يتفجر منه الدم من الغضب: طبعا دمك خفيف وأحلى شيء فيك انك انت الوحيد اللي مستلطف حالك جدا وأجمل شيء فيك أنك الوحيد الذي لديه اعتقاد بخفة دمه ..شكرا على اتصالك.
وبعد أن وضعت التلفون على طاولة المكتب سمعت أولادي علي وبرديس ولميس يقولون: شو رايكوا انروح نركب على ظهر بابا ؟ أو على رقبته؟؟ , فصرخت بهم قائلا: شو لويش هو انتوا كمان اليوم فاضيين ومش املاقيين شغل وبدكوا تشتغلوا بي ؟ فقالوا :
علي: ما هو الكمبيوتر خربان فعلى شو بدي ألعب ؟ وانت فاضي وشغل ما عندكيش فخلينا (نلعب عليك) يا بابا .
فقلت له : هههه تلعبوا على أبوكوا يا اكلاب يا واطيين يا أنذال ..هذا اللي ناق بعد التربية والتعب ؟ آه هيك بصير والله العظيم حقك تركب على ظهري وتحكيلي هيش وحيه.
برديس: شو يعني أنا كمان ازهقت من التلفزيون وبدي أياك اتشيلني على ظهرك وتلف بي الغرفه كلها أو ابتوخذني على الملاهي ..
فقلت: لا الملاهي بدها مصاري وأنا مصاري ما معيش وعلى ظهري بتركبي بالمجان ..وكمان حقك..يعني لازم المساواة بين الذكر والأنثى , أي هو علي كاين أحسن منك في شو؟.
لميس: صارت تبكي قبل أن تنطق بأي كلمة..فقلت لها : لالالالا كله كوم وبنتي حبيبتي لميس كوم ثاني, أي يلعن أمي ويلعن أبوي إذا ما بشيلك على ظهري وبطوف فيك في كل غرفة من غرف البيت ..وحين حملتها وبدأت أطوف بها جاءت زوجتي من بعيد وهي تصرخ وتقول: يا زلمه أي هو اللي ما بلقاله مشغله بيجي يشتغل فيك؟ فقلت : والله الأردن كله هيك, حتى أولادي وجيراني وأقربائي وأمي وأخواتي وأخي وأولاد أخي وشباب الحارة , كلهم, جميعا اللي ما عندهوش شغل بيجي بصير بده يشتغل بي, وشركة الاتصالات والهكرات والمتخصصين بفصل الإنترنت , وكمان اللي على الشات بالفيس بوك بس يلقوا حالهم فاضيين بصير بدهم أدردش معهم على شان يتسلوا بي.
أعتقد بأن الناس تطرب جدا على أحزاني..وتطرب جدا على ذبحي, لهذا السبب يشتغلون بي حين يجدون لديهم وقتا من الفراغ يقتلونه معي.
#جهاد_علاونه (هاشتاغ)
كيف تدعم-ين الحوار المتمدن واليسار والعلمانية
على الانترنت؟
|
ارسل هذا الموضوع الى صديق
|
حفظ - ورد
|
بحث
|
إضافة إلى المفضلة
|
للاتصال بالكاتب-ة
اليوتيوب
لينكدإن
تيلكرام
تمبلر
بلوكر
الموبايل
