فيّ ملجوم

علي حسن الشمري

الحوار المتمدن-العدد: 4910 - 2015 / 8 / 30 - 17:06
المحور: الادب والفن
    

فيّ ملجوم

آخر ما كتب جرحي

راح افرح عمر دمعة وحلف بغروب يوجعني

وصل بيه السهر شمسين ما نايم

خلص عمري اعلى باب الراح واعرف رجعتة موتي

كَصر واهس خطوتي ودمعتي اولايات

غربه تشيلني برمحين

وتتكَطع مسامات النفس لو لاكَت الصفنة

ردت ارتاح ... لكَيت الصفنة فيّ ملجوم

ردت ابجي ... كبرت عازتي للون

وخدي البي صبح عميان حتى من الدمع محروم

وصل حالي هضيمه وعيشة المطلوب راسه وتايه بدمه

ردت افرح ... غصين بصلاة امي

الترفع ايدها كلما يطيح غروب

ولا عدهن يضيم الله اشكبر من اصفن بمكفاي

شوغة وحسرة المكسور ضل ويتنخي بفيّ الناس

امشكبن والسوالف ترس راس الغيم

من احسبهن حساب النده ويالعطاب

يشكَن رية عمري وانه ابن جرحين

الدوه يكسر مهابة كل جرح معصي

وانه ما اريد اطيب وبيه لجمة صاحبي ووكتي

من جان الدرب بي حيل يتحمل وجع نيتي

اخذت المامش من الروح

على كل سجة معمية جدم خطيت مندوم اليمر بي روح

يا روحي... كل رجفة جرح بي صوت

على كل راكَـ السوالف شفت روجة ناي

مفروش النعاس بكل جفن شارع

نهار الما يعرف الروح اجيسة بليل

اسبكَك للدفو حجايه

وافرع للهوه مرايات

تتكاسر براسي الريح

واهب هبّة شراع بخلكَـ آخر صوت

ابضلي شكد تكسر روج عاند نية السفان

واصفن والبحر بيبان

يا جف ما يطلع ماي حتى اندل وجع بابي

يا بابي غمكَـ جرحين والدكَه بثكَل وني

احس خفكَـ المتاناه رمح يندكَـ ناي

وتكبر وحشة بيه وصدة جفوف وناب

الدفو الضيعتة ما ظنيت

يعاتبني البرد بحرورة ملاكَة

كل شارع مشه بيه

وملامح صفنتي نده وجوه استغربت ضلي

البرد غربيل اغتض من طواري الشوكَـ

ولا حضنة دفو تشيل الخدر مني

يعازتهم سوالف حيل

وانه بحسرة ضوة وشمة وجه مامش

والفت الكسر والهم

شتلت ظنوني فوكَـ الدم

ولك يا كَلبي كونك تبرد ونرتاح

يشنهي الدنيه واتحسر

يشنهي الوكت كون ازغر

وانه الطاويهة خطوة حيف

دجيت السوالف كبل ما تبرد

وحطيت العطش نيشان خاف النهر ما يدري

من يمتة بجيت الطيش

وكاسرت الخلكَـ وهواس حته اللعب ما يكبر

جرعت المر ... مو مر هالوكت  بي خيط مدريهم

بوكت جان السلام حساب

من جان الصديق يبيعك بخبزة

من جان الملح مزة

مابي شارة اسم الله

وثلاثة من الجروح ثكَال

الكسر ومناحط بشدة المامش باب

والصفنة العركَـ ضلها مشاوير وغنة شوغات

هذا انه وبعد بيه الوكت مكَصي

بعد ومكَطعات الروح ما ينشدن ببلكت

يكلما الكَة مرسى بروح صاحب يفز روج الدم

وياخذني الهوه حجاية

وارد بيا وطن يا غربة الله وليش

كلما تكبر بروحي سفينة يموت حيلي شراع

مالوم المطر مهضوم

كره حضن السمه وطاح بخدر عالكاع

#علي_حسن_الشمري (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات