حلم ريحان

علي حسن الشمري

الحوار المتمدن-العدد: 4909 - 2015 / 8 / 30 - 13:06
المحور: الادب والفن
    

حلم ريحان

حلم ريحان

بأول شهكَة معاتب عطش

ينغض خضار الروح

ويطش الملامح حركَة معزين

الدفو الينشاف طيف   يذبحة المجافاه

حلم ريحان

مو روجة خضار يرف عطش غياب

بآخرضحكة من الماي

حط بروحي باب وسالفة جرفين

يا ريحان هاكَد خصرك استاحش هواي

وعاش ملوي الروح

هاكبرة  الحزن بالعود

يا مرود ترافة

الخاطرك عايش جنت بس عين

يا نسمة اعلى غبشة هيل

هبت والنده مفرع

حلم ريحان

مسافاتي عطر مخمور

احزم كل ضلع بي روح

و اوصلك وهف جناز

وارد وياك

انه وخلكَي ... سفر ميت

يا آخ التمر بيه

أحس ركضه بالريه

ألنفس اكبر من العثرة

ادور عن فرح بي روح

تاخذني مسافاتي

واشم بطولك الذبلان

موكَد مشتهاية غيظ

ليش الزعل يا بستان

يتسيارة نده معرسين

حلو وبلوتك تنشم

يجنك دفو حجاية طين

يا كلما ردتلك باب

ارجع والدرب جرحين

ترة الظلمة سوالفهة اعلى كَد الشوف

عشت لجلك

أحد من صفنة المديون

وعاندت الهوه والماي

وتدريني

عنادي يعوف راسي

بساعة الملكَة

وما مرخوص ارسم خاطرك والماي

ضنك عالعطش تمشي

انه بلياك دمعة ليل

يفززني الصده عبرات

ويستاحش عيوني الحيل

يثكَل طيوف باجر ... وانت مو وياي

يا كبر العطش والنده استغربني

اخاف الصوت يعثر بالملامح ...  والهوه ما جاي

يا آخ شكبر خلكَي...صبر فلاح

لو غربة سفينة وراي...فوكَـ الصوت

روجات الهوه بصمات

تمنيتك قريب وتسمع الشهكَة

بيه هواي الك صفنات

على كَد ما وكف بيه قطار الليل

ومرايات مكسورة وجه

وجفون تثكَل من تشوف الغيم

ما جان اعلى بالي الطيف

لو أدري

شلت ملحة غريب

وما بجيت الشوف

ما جنت ادري نيتك طين

بأول خطوة

شوكَـ جدامنة يفرع

وما جنت ادري عشكَك ريل

يعبر عالمحطات بخلكَـ تمثال

لون أدري

احط الروح جوية عوز

شنهو قصوري يا ريحان

اركض ماي

وانت بطركَـ ملكَه وساجيه

ابلا روح

كَضن والمهم عندي جروح

وجم صورة بخيالي وياك

رماد الحيل ياخذني ... لجرف دخان

بلكت جوية ... أثر عطاب

ذابل دمي وعظامي خدر عودان

يا جادر يلمني

وبيه سردابين

صرت شوغة نده مزفوف

بحرورة شمس

ودّع حضن ورده

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل