نثاية غروب

علي حسن الشمري

الحوار المتمدن-العدد: 4905 - 2015 / 8 / 23 - 18:33
المحور: الادب والفن
    

نثايه غروب
قروك بروحي شوغة ليل
لكَوك بريتي اثر طعنات
اشمهم والنفس خابط
وينك يا صدكَـ جرحي
لا حس بيه عابر ليل
لا هم بيه ناي غروب
همس ومنادس ضلوعي سوالف موت
يبرد خاطري من التم
واتمدد بطول العطش شهكَة راي
جفن وتبدت الصفنة دمع بي صوت
غركَان الهوة بريتي واطوف بمستحاي وجوه
يتبلل صدى جرحي بلجم خوان
ويصفن دموعي اردود بيبان ونثاية غروب
اكاسر يا حلم واليقضة مهرة ثار
افز وبعيني الف مشوار
اريد الليل يخلص حتى اضوكَـ الحيل
اسهر لا صبح يندهني حتى اغفة
اخذني الشيب غفلة وترس راسي نذور
طفيت بحسرة المامش واكول تعود
اشكثر شالت بروحي الناس
وانداف الهوة بريتي
يا طعم المرورة بملكَة المعزيات
خذت روحي بجسارة سيف لو ذب طولة عالركَبة
تمر بية وامرن بيك لا طارش ولا صفنة
وهنة اثنينهن آنة
أمر بيك وتمر بية لحد ما صاوغت حنظل
بياض الروج ياخذني لجرف شمسك
حلم بي لوعة شراع ودمع سفان
انة روحي هوة جويريد ما مرها الدفو حجاية
وعيوني حلم سجة
ما مر ريلهة اعلى البال وتحنت بأثر خطوة
وعلى واهس عيونك خضرت روحي
السهر وياك ضحكة عيد
يفرع من يمر الفيّ غنة حديثة
يزارعني شلك بالماي وانت بخاطري تجري
اضيع بخدك الخمري سوالف طيش
وازفن للسمة مراية
عشكَك والمستحة تفك بابها ولاية
انت تعيش سجة ماي
ما مرها العطش وتنظرت كَطرة
وانة الروج ياخذني...سالوفة اعلى متن الريح
طالت والبرد يندل ضلع ونّي
طفت روحي..
وانة العودتها تذل عطشها وما تذل لأحد
كبرت وزغرت الدنيه
وعافتني الملامح طفل تايه ماي
يا آخ بجرف ونّة وكَفت والدمع يجوي
خدرن نار اصابيعي
عليك امنادس بروحي زعل خوان ما يبرد
سهر عميان يكتل ما دروا طلعت شمس لو لا
يفي آخر حجاية بشفة النعسان
وكَفت ابالي تجوة ليل
ذكرتك وانكسر طولي وكمت دخان
يا علبت تمر سجين كبر بية ضلع منذور
المحطة اتنث تراب افراكَك
بعد ما بية حيل اشتاكَك
انة بروحي سفينة نوح...شايلك ذنبها شراع
لَوَن ادري العتب سرداب جا ضميتلك روحي
ضكَت جيتك محطة وحيلها امتاناه
يا ضحكة حديثة بطيش ترجية
يارنة حجل مفطوم عالنية
اخذني وياك...اعبرها الثكَال بسجة زلوفك
تعال نبيع ثمرتنا السوالف ظلمة
تعال بكل وكاحة وشوف خلكَي مراية الوحشة
ما كسر وجهة الشوف ... ولا تكَل الدمع غثها
جم ليلة اعلى ليلة استاهدك عنكود
واغط بظنة العاكَول
يا غبشة اشيريد يصير لَون ضكَتك تعب نجمة
ماني وخصرك حجاية .. بللها العتب جمرة
جم صيف التعدة وما نشف طرواك
ما ضلت سوالف بالبخت تنجاس
ما يسوة الحلم وافرشلة هيبة راس
طارن كل عصافيري
يهلبت طايح بشوفك هضم ريشة

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل