محطة تراب

علي حسن الشمري

الحوار المتمدن-العدد: 4909 - 2015 / 8 / 28 - 01:18
المحور: الادب والفن
    

محطة تراب
مشيت ونشفن عيون الدرب وتبدة كل حيلي
وبقة ظني.....حسرة والدة وجرحين
عشت عمري بمرارة ريج
يا فشلة نياشيني العفتهن بيه وتحنيت
ولك ما بيه حيل وشوكَي مهرة ثار
الدنيه وفكّدك بروحي
ياريت الحجي ينكَال واحجيلك شما بيه
واطش روس الايام الما عشتها وياك
ترد لو ما ترد فحطان بيه الفيّ
نشف واهس عيوني وداع
يا لذة حضن مفطوم
الوجع ما خله طيف يفزز الصفنة
أمس والما يعرفوني
لكَوني بسكته اسولف بيك
جاسوني وطحت نجمة
الك بيه ... نسمه وسالفة عرسان
وصوغة توج خدر دنيه وضوه هلالين
يتبده اعلى خاصرة السمه
ويطشني الك شوغات
الك بيه...شلك بيه
محطات وسمر غياب
سافرتك وجع وبكل محطة تراب
وذاك انت وجع شارب هوه الظلمة
ظنيتك وفي وتلتم
وظنيتك تمد الليل سجة حيل
على فراشي دفو وتحني آخر صوت
ومن اذكر هواك الريه تركَص عطش طير يون
وحجايتك الحلوة كَلتها امرورة النسيان
ظلك جان معسول
الشمس لو ضاكَته من السمه تشلع روحهة وتنزل
حسبتك خلّ...حسبتك للفرح تاخذني نيه هيل
ومن يا صوب من هذا الونين البيه اصيحنلك
وانه سارح بروحي الناي
وبراسي اخذ دوره الشيب
وبده يصحة ويه كل فزة رمح يندل زوايا الطيف
يا ليل شبقة من الشوف بعد طبكَة جفن بيه
وراح الخل... والصفنة التمر تكتل
ولك يا خلّ ... ما كَتلي اعوفك من يجي الليل
بواهس كَيش ... شجاك بدمعتي تغربل
وسجاجين العطش بسنيني صارن ظل
متى تلمني يبعد العود
صبرني... انه المايك فزع خلكَي عطش ريه
طفيت وروحي صمّ رماد وانطشت بعصرية
يذاك الماي يالجنك ندارة بت
ركض بيها العطش خطار
و اعزوبية المحبوب ترجية
اخذني ليا وكت اصحة اعلى جف الروج
والهدام...كبر بيه اعلى كل جالي
وركد خاطري بمشحوف ما ضايكَ وجه نيه
ولا شم الصدكَـ من شال بي ريحة دفو بنيه
وياخذني الونين شكبر خلكَـ الناي
وملح ريتي ابنسمة هواك الكَبل تارسني
صدكَـ واصبح هواك بروح
جم شهكَة بعطش سيفين وديت ولا منك
لا كَطرة هوه اتهد بيه روح الماي
لا فزعة نده لا صوت خاطر جاي
انه يا كاع اطبها تمد سماها فياي
واشكد ضاكَـ...كَلبي وما نسه لذة طعم جفك
الشمس تطلع فجر والدفو يلم الناس
وآنه الوجع شكَـ فورة نهر عطاب بعيوني
كلما ردت انسه الكَاك
ماخذ زبدة ظنوني

#علي_حسن_الشمري (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات