محمد نور الدين بن خديجة
الحوار المتمدن-العدد: 3233 - 2011 / 1 / 1 - 21:12
المحور:
الادب والفن
بوناني بابا نويل ... / زجل .
مشى عام
وجا عام
وجات شتا
وطاح ثلج
ونشفوا ويدان
وماتوا ناس
وكبروا حيوان
وطاحت راية
وتعلاوا عروش
وتفركعات كروش
و آ من شيطان .
* * *
سدوا الشراجم
وخبيوا لكلام
وارميوا قفولة
ع البيبان
لا دق دق سمعناها
ولا عمي زعكون
ولا كال *: أنا
ولا كلنا* : شكون
وانعس ياولدي
را الكلام
هاد العام
بالسكات مشطون .
* * *
دارت ليام
داخت ف ريوسنا
وغطست ف الدمع
لحلام ..
هيه يا عاود* يجري
والسوايع م وراه
والبارود والريح
والشهدا وفلسطين
وعروسة بلا عريس
وجمعة بلا خميس
وتناش د الليل
ضاعت ف الطرقان
وف ضلوع العريان
وشطحت
وغنات :
بوناني .. بوناني
بوناني.. بوناني ..."
بوناني ف الراس الخاوي
و ف جوف السكران
بوناني ف الفقايس
بوناني ف لمحاين
بوناني تجري
ف ثوب ا مزق
و ف رجل الحفيان
بوناني لحيوط
بوناني لدروبة
بوناني للبكا
والضحكة المزروبة*
بوناني مسيو
بوناني مادام
بوناني ليفيو
بوناني ليكامان
بوناني خلط أتاي بالشراب
البونية بالبوسة
لحمامة بالكلاب
بوناني بين البسمة على الناب
وزور الدمعة وردية
تفتن ع لكتاب .
* * *
ياه إ إ وانا على عاودي
طاير ف لحلام
تعثرنا ضبابة
وسحابة م لكلام
مديت ايدي لقلبي
هجم الخوف
وطاح اللجام
صبات شتا م لحروف
ترفعات لسما كفوف...
ياه إ ياه إ إ
oh la la
mon dieu مون ديو
بابا نويل اللي يبغينا
يضحك ..يرضي علينا
بابا نويل آش يهدينا
ف ليل طويل بالجوع
ف صبر مدبور ومضبوع
...
... ... ...
...
بابا نويل
بوناني bon anné
ينعس اللاصق
ويكمع الفاسق
ويحلم ياما
ف بلاد الحلم الممنوع
شعر : محمد نور الدين بن خديجة / المغرب .
*كال : قال .
* عاود : الحصان بالعامية المغربية
*مادام : ma dame
*ليفيو:lلشيوخ بالفرنسية
ليكامان: الصغار بالفرنسية
*البونية : اللكمة.
#محمد_نور_الدين_بن_خديجة (هاشتاغ)
كيف تدعم-ين الحوار المتمدن واليسار والعلمانية
على الانترنت؟