أحلام يقظة جوال غير منفرد

ميلاد سليمان

الحوار المتمدن-العدد: 8410 - 2025 / 7 / 21 - 13:34
المحور: الفلسفة ,علم النفس , وعلم الاجتماع
    

قبل الفجر بساعة، وأنا قاعد مع ثلاثة أصدقاء بنشرب وننبسط بدخنة لطيفة نظيفة على هضبة المقطم، وسط ظلام الليل التام، ومن حولنا سيارات أخرى يجلس داخلها وأمامها شباب مثلنا أو أصغر أو أكبر، يحصل كل منهم على لحظاته الخاصة دون أن يزعج حد من حوله.
كنا بندردش في موضوعات مختلفة ومتنوعة ونتقافز من فكرة لفكرة كما يتقافز العصفور الزوغنن من فرع لفرع، يسلاااااام على الوعي، وأربعتنا بنملا فراغ الصمت بهبد ساخر ما بين مواقف منوعة وموضوعات عن مسلسل أو سينما واقتصاد وفلسفة وتاريخ، على قدر فَهم كل واحد، على متابعة احدث تريندات من الفيس بوك على شوية أحداث من الحياة اليومية، وكما هو معروف، ومتبع، ومتفق عليه عرفيًا، في قعدات الحشيش، بعد ما تخبطلك چوبين طرشمان، بيطلع كل المخزون النفسي الجواني وكأنك بتقلب فردة شراب طويلة من جوه لبرا، وتبقى متصالح مع كل الناس ومتقبل كلامهم مهما كان، كل الناس حلوين في عينيا حلوين، دا حتى بيقولوا عن اللاوعي أن كله أخُوُة برا وجوا، وبتلاقي فلتات اللسان بتشتغل وترابط الأفكار بيشتغل وبتتكلم بكل راحة وسلام وهدوء کراهب بوذي في أعلى سلالم التبت قبل رضاعة من سرسوب النرفانا، وسط سحبة ضبابية لذيذة... ويا أصحابي يا أهلي يا جيراني أنا عاوز اخدكم ف أحضاني... لكن نو هومو.

المهم، وصل بينا الحكي والفضفضة لموضوعات +18 وخاصة موضوع منشطات ما قبل الماتش اللذيذ، وايه بيدي باور حلو وبيعمل كام واحد، وايه بيعمل تأخير حلو، وبيقعد وقت ااد ايه، وايه اللي بيطلب معاك كسل وتثاؤب وهمدان، وايه اللي بيقلب بصداع واحمرار وزغللة وزكام، وكل واحد بيطلع خبراته في الموضوع، واللي اكتسبها إما بالسماع العام وإما بالتجربة المباشرة، لحد ما واحد منهم قال " دا فيه باور جربته قبل كده اسمه (...) بيدي انتصاب جامد ايييه... اللي هو لو تحط فنجان القهوة على بتاعك وتمشي بيه ميقعش"، وكمل بعدها كلامه عن سعره ومميزاته والشريط فيه كم قرص وتكون واكل خفيف.... ولما جربه خد تقييم كام نجمة من صاحبته!!.

بس أنا مكنتش سمعت أو ركزت مع باقي التفاصيل دي، لأني فضلت واقف زمنيًا عند أول جملة، واللي فِضلت تتكرر في دماغي بطبقات صوتية مختلفة ذات صدى " انتصاب ... اييييه... فنجان القهوة"!!.

وفي أثناء ذلك، أو في نفس اللحظة، حسيت بخُطاف ونش بيقمّرني من لوكسات بنطلوني من الخلف، وبيسحبني من وسطهم لفوق بشكل متسامي طيفي، ولا بقيت سامع بيقولوا ايه ولا بيحكوا في ايه، شايف بس بوؤهم بيتحرك بلا توقف، يضيق ويتسع كحظاظات كاوتش، ويا دوب سامع صوت تنفسي البطيء، وغطست في بير ذهني جواني مع فكرة فنجان القهوة المُقدم لعملاء الكافيه السياحي على قضبان الويترز، ويا ترى لو موظف بتاعه نام - أثناء ساعات العمل- والفنجان وقع منه واتكسر، الشكوى بتتقدم لإدارة الكافيه ولا دي أعراض جانبية للمنشط بسبب التعود عليه، وهل سهل التسامح معاها بنسب معينة، وهل لما يتخصم منه ويتعاقب، لتكرار كسر الفناجين، هيضطر وقتها يستخدم أيديه ويشيل الصينية بيهم زي الناس العادية بتوع زمان!!.

لحظة... طيب هو كل موظف مسموح له بكسر فنجان قبل رفده، " اتفضل اطلع بره... رصيدك من الفناجين خلص"، ويا ترى فيه ناس، عندها ما يكفي من الوعي، قبل الانترڤيو، وبتتدرب على الموضوع دا في البيت عشان لما تروح المقابلة تظبط الأداء صح، ولا ممكن بقى فيه مراكز تدريب وكورسات ( للذكور والمتحولين فقط) متخصصة ومعنية بتوريد موظفين ذوي خبرة وكفاءة في حمل الفناجين!!.

وممكن مع تقدم الزمن، لو ظهرت شركة منشطات منافسة وحابة تنزل بنوع دواء جديد، هل بتروح توزع عينات مجانية في فترة تجريبية على الويترز في كافيهات برندات معروفة، ولا التوزيع بيكون على بعض فئران التجارب من صبيان القهاوي الشعبية، ولا دلوقتي الأزمة الإقتصادية خلقت متطوعين جاهزين في غرف المعامل السرية في مناطق نائية داخل دول العالم الثالث!!.

وفكرة زي دي لما اتقالت دلوقتي وسطنا احنا الأربعة، وفي أحسن الأحوال، فيه حد فينا فاتح باقة نت ومجسات الخصوصية بتاعت جوجل والذكاء الصناعي لقطتها، ايه شكل الاعلانات الممولة والرييلز اللي هتظهر لنا الفترة الجاية على منصات السوشيال ميديا، ولا الفكرة دي هتشتريها انهي شبكة ترفيه أو حتى شركة أفلام كارتون ونشوفها في لقطة سريعة من فيلم American Pie ولا مسلسل The Simpsons أو Family guy أو حتى آنمي يابانيز مئوي الحلقات!!.

ايه داا... هو صاحبنا جاب الفكرة دي منين، وسحلنا بيها في وسط الكلام، هل جرب يعمل حاجة زي كداا مثلاً، قدام صاحبته أو لوحده، أو ممكن يكون شاف الموقف دا بالفعل في مكان ما، وفضل مخزون في دماغه منتظر القعدة المناسبة لبثها!!. ولا يمكن فيه حالة من التناص مع جذوره الصعيدية مع المثل بتاع "عنده شنبات يقف عليهم الصقر"، وطبعًا عشان مكانش ينفع يوقف الصقر على بتاعه اختار يقدم عليه فنجان القهوة!!.

وه .. هو أنا قاعد ساكت في وسطهم كدا بقالي ااد ايه، يا ترى خدوا بالهم إني وقعت منهم في وسط الشرب وطرت مع نفسي لكوكب تاني، وسايبيني أرجع وقت ما أحب، وكملوا هم كلام مع بعض، ولا دلوقتي بيكلموني وأنا مش برد عليهم أو يمكن رديت عليهم بس دماغي مازال هناك سارح مع الفكرة !؟، أن تفكر في إنك تفكر، على كل حال هرجع لهم عند آخر جملة وقفت عندها وفاكرها، وفي لحظة نزلت وتطابقت الطيفية مع نفسي المادية، واتعدلت في قعدتي ووجهت كلامي للجميع وقلت " واضح ان الدخنة المرة دي نظيفة بزيادة... المال الحلال آهووو".

مرّت لحظات صمت واحنا بنبص لبعض، بعدها دخلنا جميعًا في موجة ضحك لم يقطعها سوى صوت عراك بعض الكائنات الليلية في رحلة بحثها عن الطعام.

#ميلاد_سليمان (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
في رحيل جليل شهباز، عضو هيئة إدارة الحوار المتمدن	في رحيل شاكر الناصري، أحد مؤسسي الحوار المتمدن

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل