30 حزيران ذكرى ثورة العشرين ، لو بقيت في الوجدان لكان أفضل وأجمل...

موسى فرج

الحوار المتمدن-العدد: 8025 - 2024 / 7 / 1 - 00:08
المحور: الثورات والانتفاضات الجماهيرية
    

من وعينا واحنا نحتفل بيها كلٌ على طريقته الخاصه بالأهازيج والهوسات عند العشائر أو الندوات والمجالس في المدن أو تخصيص اليوم لقراءة واستذكار ما قيل فيها وعنها عند الأشخاص ...وفي أقل الأحوال يحتفل الواحد بها مع نفسه فيعيش الزهو شعوراً منه بأن أبناء وطنه قد مرغوا في ذلك اليوم وجه وأنف المحتل الإنكَليزي بالوحل وبصرف النظر عن النتائج...لكن الأهم من كل ما تقدم انها كانت تشكل عامل مشترك للعراقيين من أقصى جنوب العراق الى أقصى شماله:
-أبن الجنوب والفرات الأوسط يراها من بنات أفعاله فيترنم ويعطي لنفسه الثلثين:
"ثلثين الجنة لهادينا..."
- وابن الشمال يرى له فيها الثلث: "وثلث لكاكا أحمد وأصحابه..."
-وأبن الغربية يرى له فيها ورچ فيرفع صوته بـ: "هز لندن ضاري وبچاها ..."
-أبن ديالى يشوف نفسه مو قاصر فيعلن على رؤوس الأشهاد: "ثلثين الطكَ من ديالى..."
-بربوتي آل سلمان من شيوخ السماوه يريد حصته ويزركَ عينه لواحد من جماعته فيصرخ :"وشويه شويه لبربوتي"...
-الكوت عن شبع واويهم من جثث الإنكَليز قال قائلهم :"واوي الكوت متعني ومتمور- يكول اشهل ربيعه اشكثر بيه اكسور- واوي العارضيه ايكله من ياخور- يتكَلب وهله يندهونه"...
- الناصريه قال عجمي السعدون عن الطكَ: "خل الطق للصد يالبيضا"...
- ابو الشاميه يشكَكَ براحته: "نشگ شگوگ ونخيط وحدنه - شك ما يتخيط شگينه ."
- ابو الحله يشتري الطلايب مشترى: "والموتة بكل عز نشريهه "...
- ابو البصره يعير شيخ خزعل الكعبي بالدرنكَات: "هي حرب أدول ياخزعل ماهي درنگات- وخلــهه لبو مطشـــر خلـفت الباشـــات-أسأل قنصلها اشسوينه " ...
ومعناها أنه يقول لخزعل أمير المحمره وقتذاك: هاي حرب دول مو خشابه ونقر على الدرنكَه " الطبله "...
-بني احجيم ردوا اعتبار بني لام فخاطبوا كوكس كبير الإنكَليز:"يكوكس وين وجهك.. جوك اهل لملوم"...!-تطلبك بالشعيبه, واعرضيت اليوم-لابد ما نسوي اعله السماوة اليوم- تستانس بيه حتى امريكه "...
- أزيرج من العماره قالوا: "وبيه آل ازيرج عيب يهتزون مدوخ العالم كله واحنه الدوخناك...!"
-الناصريه والشطرة: عندما ارسل الانكليز مندوب مفاوض يفاوض الأهالي للخروج من مواقعهم قال قائلهم: "شرناها وعيت باهيزه" ...
وكان جوابهم النهائي: "شرناها وكالت ما يعبر" .
ما الذي تغير بين 1920و2024:
أولا: الجماعه بدل ثلثين الجنه كووشوا على ثلثين الحكم والمحاصصه والموازنات والمقاولات...ولكن جعجعه بلا طحين...!
ثانياً: الإقليم صار عنده رئيس ورئيس وزراء ولليوم ما محصل الثلث ،يداعي بـ 17% ، ينطوه 12% فقط لا غير...ما علينا بالتحت الطاوله هذاك بحث آخر.
ثالثا: الغربيه...راح الهز لندن وبچاها وخلف فراغاً لن يسده الذي خطفوا منه المنصب وبقى كَاعد يم المره يحسب أسابيع الحمل ...
رابعاً: الناصريه والشطره: اللي چانوا ياخذون الشور من راس باهيزه هسا صار عدهم بهاهيز هواي بس كل بهاهيزهم من خارج الناصريه والشطره...!
خامساً: بني احجيم ...اللي چانوا يخاطبون كوكس بـ راح نسوي بيكم سوايه حتى أمريكا تتونس بيها: " لابد ما نسوي اعله السماوة اليوم -تستانس بيه حتى امريكه"...
خل يسألون ربعهم ليش صار شهر يتلجلجون من قدوم سفيرة " امريكه"...؟
وسادساً: ديالى چانوا يكَولون ثلثين الطكَ من ديالى هسا ابو حسن العامري نزعهم حتى من الوزرات ومو ثلثين حتى ربع ما بقى عدهم للستر...!
سابعاً: اهل البصره اللي چانوا يعيرون خزعل أمير المحمره بقولهم: "هي حرب أدول ياخزعل ماهي درنگات"، هسا اوامرهم يستلموها من المحمره...!
ثامنا: الكوت اللي چان واويهم " يتكلب وهله يندهونه " شبعان بجثث الإنكَليز، هسا واويتهم تتكَلب بالمناصب ومن يندهوها ما تلتفت...!
تاسعاً: السماوه: چان طموحهم "وشويه شويه لبربوتي" ...ولليوم بطل حيلي يريدون الشويه شويه من التخصيصات وما محصلين والفقر عدهم 52%...!
وعاشراً وهو الرباط : الله لا يوفق صدام ولا يوفق فلمه "المسأله الكبرى" ، لو باقيه ثورة العشرين هاجس وجداني في صدور الناس مو كانت أوجه وأحب وتجمع معظم العراقيين...؟ لكن ابن الزرقاء أصر أن يدخلها بدهاليز الطائفية والمناطقية حتى باتت اليوم مثل الخرقه اللي تعت بيها الچلاب كل واحد يكَول مالتي وأني لصاحبها ...وراحت لذة التنومس بثورة العشرين مثلما ذهبت بمناسبات أخرى كان العراقيون يجمعون عليها بصرف النظر عن مناطقهم وطوائفهم ومكوناتهم الإثنيه...
ثورة العشرين لكل العراقيين وأبرّهم بها أحرصهم على عزة العراق والعراقيين.

#موسى_فرج (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
في رحيل جليل شهباز، عضو هيئة إدارة الحوار المتمدن	في رحيل شاكر الناصري، أحد مؤسسي الحوار المتمدن

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل