الفنان القدير ؟

حسن مدبولى

الحوار المتمدن-العدد: 7093 - 2021 / 12 / 1 - 19:45
المحور: الادب والفن
    

هذا حوار إفتراضى وتخيلى بين شخصية تعمل فى أحد المجالات ،وبين ممثل قدير كبير السن والمقام فى أذهان العامة ، وسنفترض أن الشخصية الأولى بإسم مراد بك، والشخصية الثانية بإسم الفنان والممثل القدير الأستاذ رضوان ،

المكان: فى منزل الفنان القدير رضوان وهو يحمل الموبايل بصعوبة بالغة وإهتمام ليرد على مكالمة غير معتادة:

الفنان رضوان:- ألو مين معايا يا أفندم ؟

الشخصية الثانية :- أهلا وسهلا أستاذ رضوان مع حضرتك مراد فهمى كنت بطمن على حضرتك وأسأل على أحوالك ،،

الفنان رضوان: أهلاااا مراد بك إزيي معاليك يا أفندم واحشنى صوت حضرتك والله، بقالى كتيير ما نولتش شرف الرد على فخامتك ،

مراد بك: أهلا بيك يا أستاذنا حضرتك اللى واحشنا وواحش المصريين كلهم، أنت فين ياراجل ؟

الفنان رضوان: موجود يا افندم لكن السن بقى له حكمه والجهد مابقاش زى زمان

مراد بك: ربنا يديك الصحة ويحفظك لينا يارب

الفنان رضوان : الله يكرمك ويبارك فيك

مراد بك: إيه حضرتك هتفضل غايب كده عننا؟ مش هنشوف أعمال فنية لسيادتك قريب ولا إيه ؟

الفنان رضوان: الوسط الفنى إتغير وماحدش بقى بيسأل فى اللى زينا ، زماننا انتهى والناس نسيونا ، ياللاه حسن الختام

مراد بك : لا لا ماتقولش كده ياراجل ده حضرتك فنان قدير وأستاذ الأجيال ،ما حدش يقدر ينسى مسلسلاتك وأدوارك القيمة وأدائك الرائع فى كل أعمالك ، وأنا شخصيا لسه فاكر الفيلم التسجيلى اللى انت صورته سنة 2011 وحذرت فيه الناس من خطر الإخوان على الثورة، كنت سابق عصرك يا فنان،،

الفنان رضوان : ربنا يحفظك ويبارك فيك، ده بس من ذوقك ده بقاله عشر سنين ، الحمد لله إحنا بنجتهد وأجرنا على الله،

مراد بك: طبعا طبعا ، ده حتى انت رفضت ساعتها تتقاضى أجر عن دورك فى الفيلم ده ربنا يجعله فى ميزان حسناتك ، طيب أيه رأيك بقى أنا عندى لك هدية تانية ،دور هايل جدا هيخليك تتصدر الواجهة الفنية والإعلامية كلها ، وهيخلى الناس كلها تتكلم عن حضرتك وكمان بمقابل مجزى جدا المرة دى ؟

الفنان رضوان: هههه هو حضرتك ما غيرتش شغلك ولا إيه؟
عموما أنا مجهودى قليل دلوقتى وبتحرك بصعوبة وماعنديش جهد لتصوير مسلسلات أو أى حاجة جديدة !

مراد بك : ماتقلقش انا عارف ومتابع طبعا ، لكن الموضوع مش هياخد من حضرتك اى مجهود او وقت طويل ، هو يعتبر لقطة او إثنين فى قعدة واحدة ، بعدها سيب الباقى علينا ،

الفنان رضوان : طيب مين الممثلين الزملاء اللى معايا؟

مراد بك : فيه مدرسة جديدة فى الفن بتعتمد على الذاتية فى كل شيئ، واعتقد انك سمعت عن فيلم ريش اللى كان ابطاله قرايب ونسايب و من بيت واحد تقريبا ، يعنى ببساطة الممثلين اللى معاك هيبقوا أهلك وناسك و أفراد أسرتك مافيش حد غريب وكلهم هيكونوا عون لك ؟

الفنان رضوان: مش مستوعب أوى دلوقتى ، لكن هحاول أفهم بعدين، إنما بالنسبة للموضوع بتاع الفيلم ياترى محتواه ومضمونه إيه لازم أفهم طبعا ؟

مراد بك: مضمونه ماشى مع نفس المدرسة الجديدة اللى بتعتمد على ذاتية الأبطال والأماكن والمواضيع ، حضرتك هتدينا كام موقف او أزمة إنسانية خاصة بيك ، وإحنا هندرسهم كلهم ، وهنختار موقف واحد مؤثر منهم ، وهنحوله لسيناريو ، وحضرتك هتمثله واحنا هنصوره ونذيعه وننشره،
ولو حضرتك حددت لنا موقف واحد يبقى أفضل ،،

الفنان رضوان: حاضر هحاول أقعد مع الأسرة والمقربين وأجهز المواقف المناسبة ، وبالمرة ابلغ الممثلين القرايب اللى هيطلعوا معايا ( ههههه )ولا إيه سعادتك ؟

مراد بك: تمام تمام ، الله ينور ، لكن لازم تبقى متأكد إن دورك ده هيبقى فى غاية الأهمية، وهيفيدنا جدا، ومن بكره كل حاجة هتترتب مع حضرتك ، وأنا واثق إن الموضوع هيعمل شو كبير ،وهيبقى ترند، وهيخللى المصريين كلهم يتكلموا عنك ، وهيبقى أجمل دور فى حياتك الفنية يا فنان ياقدير !!

#حسن_مدبولى (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
في رحيل شاكر الناصري، أحد مؤسسي الحوار المتمدن	حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل