رمزى حلمى لوقا
الحوار المتمدن-العدد: 6858 - 2021 / 4 / 3 - 02:32
المحور:
الادب والفن
ليه حفروا
في قلبي جناين ورد
بفاس مسموم. ؟
فأطلع من حلمى المتعفر
وانا كلي هموم.!
وانا كل ما اقوم
ارجع من وقفة عمري أتشل
بتعكز دايمًا على بكرة
و البُكرة بيجى بليل مُعتل
أتاريني بقيت كَوَطن مُحتل
والضحكة اللي ما فارقت جوفى
إلّا ومسبوقة بِنيل أحزان
خلّتني جبان
بقانون مختل
خلتني ادوَّر على نفسي في حنايا الروح
أتاريني بروح
لطريق مش سهل
فبلاقي ملامحى بتشبهني
والصوت اللي بيملا جوارحى
مش صوت انسان
بل صوت الصرخة اللي ما سندت في طريقها جريح
أو ظل مسيح
بتجيله الطعنة في عز الضُهر
بملامح غِل
والبسمة الصفرا بتملي الوش
شماتة بتوصل حد موت
فى أخ شقيق
أوصاحب خِل
#رمزى_حلمى_لوقا (هاشتاغ)
كيف تدعم-ين الحوار المتمدن واليسار والعلمانية
على الانترنت؟