ملاح البحرين /زجل

رشيد منيري

الحوار المتمدن-العدد: 1625 - 2006 / 7 / 28 - 03:47
المحور: الادب والفن
    

إلى عبد الله موناصير

الظّْلامْ
نْشفتْ السواقي
ذْبلْتْ الورُودْ
واش بَاقي؟

الظّْلامْ
وَ أنا الْمفرقْ بينْ هْمومي
وْ لْحْلَامْ..

الظّْلَامْ يا حْبَابي
غْصْب لِي شْبَابِي
هُوَ طْرْقْ بَابِي
وَ أنَا حْلِّيتْ لُو الدَّارْ

حْنِيتْ لْدْموعي
مْكْسُور وْ ضْلُوعِي
هْشْهْشهَا الظّْلَامْ ِ
و كانْ الِّليلْ
كْلْح وْ طْوِيلْ
و الدْيَاب تْصِيحْ
تْبشرْ بالويلْ
ْترقُصْ للرِّيحْ
و تْصهلْ الخِيلْ
تْعيطْ للفَاِرسْ
فَارِسْنا عْلِيلْ
مْرِيضْ و نْاعْسْ
مَاهْزُّو صْهيلْ

و بْعِيدْ
فُوقْ التّلَّه
نَادَانِي نْبضْكْ
يَا عَبد الله
و سْمْعتْ صُوتْ قْريبْ
يْقرا قُرْآن غْريبْ
لنبي التسعين
فْالمشْرقْ و فْالْمغْربْ:
عْبد الله عْندُو مْلَّـه
و عْلِيهَا مَا يْتْخلَّى
يَاكْ عْلقُوهْ يْتدْلَّى
وْ يَاكْ مَا تْخلَّى

هُوَ اللِّي عْلّمْ الْمْوَاجْ
كِيفْ تغضْــبْ
هُوَ اللِّي نْوّرْ ظْلَامْنَا
وْ عْلمنَا الْحُبْ
هُو اللِّي قْلبُو شْلَّال كْبِيرْ
مَا يْنْضبْ

الْبَوْصَلَة يَا الشَّاهْدَة
عْلَى بْحَّارْنَا الْعَظِيمْ
خْلِّيكْ دِيمَا هَكْدَا
لا تْصيرِي حْرْفْ عْقيمْ
خْلِّيكْ فْ صْحْرَا الْورَاقْ
وَاحَه
خْليك لِلْخَافِياتْ
فْضَّاحَه
خْلِّيكْ لْلْعَامـــِلْ
وْ الْفْلاحَه
بَوْصَلَة.

احْنَا دْمْنَا فِدَى لأمْنَا
وْ امْنا كْبيرَة
بْحجْمْ الْعَالَمْ

وَ أنَا بْعْدَا
حْكَاتْ لِي جْدَّه
بْلِّي بْدْرةْ شُوكْ
نْبْتتْ ورْدَه
لْمَّا تْسْقَاتْ
بْدَمْ الشَّهِيدْ

لْكُلْ بْحْر مْلَّاحُو
و أنْتَ مْلَّاحْ الْبْحْرينْ
قَالُو قْتْلوكْ وْ ارْتَاحُو
لَكِنْ طْلْعُو لِيهُمْ خْرينْ
خْرْجُو للشَّارِعْ و اجْتَاحُو
صَمْت الجُدْرَانْ النَّايْمِينْ
هَادوكْ وْلادْكْ و بْنَاتْكْ
عْلمْتيهُمْ حُبْ الْفْجْرْ
تْكبرْ بْحيَاتْهُمْ حْياتْكْ
وِ زِيدُو فْطْرِيقْ النَّصْرْ.

#رشيد_منيري (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل