رجل لجميع المواسم

حميد حران السعيدي

الحوار المتمدن-العدد: 6630 - 2020 / 7 / 28 - 01:26
المحور: كتابات ساخرة
    

أگلك خويه أنا مو لگيتك گبل شچم سنه مجتمع وي أهل القريه تحثهم عل إنتخاب فلان وعلان وتعتبرهم أحق من أي واحد بأصوات الناس وتصيح بعالي صوتك اللي ماينتخبهم خاين واللي يختارهم راح يكون الأمام شفيعه يوم القيامه , مو إنت اللي گلت للناس ذوله ضمان حقوقكم ومستقبل أجيالكم , مو إنت گلت بضمانتي وكفالتي ودگيت صدرك للناس وگلت ماكو أشرف وأحسن من ذوله ... شوهسه تغيرت ليش ؟ ، مو ذوله فادوك وخلوك تعرف تحسب المليون وتعرفت بسببهم على الدولار واليورو وسكنت بيت ماكنت تحلم تمر من يم بابه وسياراتك عالموديل وأحسن النوعيات وأولادك ماشاء الله مرفهين ومنغنغين ليش خربت وياهم ؟ .

ذاك اليوم رحت للقريه وسمعت لغط عند الجماعه نفسهم مقررين ماينتخبون ربعك الأوليين لأن جنابك تگللهم هذوله خانوا المذهب ولازم نسقطهم بالأنتخابات الجايه !! عجيب ، ليش هيجي تسوي مو ذوله نفسهم اللي گلت للناس الماينتخبهم خاين المذهب هسه اللي ينتخبهم خاين المذهب ! تگدر تگلي منه وكلك على المذهب وخلاك تقرر بكيفك ؟ .

تره ماكو هيج إستخفاف بعقول الناس وضحك على ذقونهم والمذهب ما أعتقد جنابك تقررموالاته ومجافاته لأنك رجل تبحث عن مصلحتك وبس وعيب عليك تمنح نفسك سلطة التحكم بخيارات الناس وتمارس هذا الخداع , بعدين وين أكو إنتخابات هسه ... اها يعني انت شاد حزامك من اليوم لمرشحين قادمين لم تشرفنا بطر ح أسمائهم .. والله عمي إنت طرگاعه سوده .

تتذكر أهلنا كانوا يسولفونا واحنه إزغار على سالفة (مطلگ وغالي ويبار أو جبار كما يسميه أهل المدن ) , ما أعتقد إنت ناسيها بس مع هذا راح أذكرك بيها , (يبار) خطب بنت (مطلگ لغالي) وگال للمسكين مطلگ تره هذا (غالي) كلش خوش ولد وهو مثل أبني وأنا متعهد بيه يدلل بنيتكم ويعيشها أحسن عيشه , وصدگ المگرود مطلگ ومريته المسكينه (بدريه) وگالوا البنيه إجت قسمتها وبعد شهور من الزواج طلع (غالي) على حقيقته حرامي وسافل وماعنده لاذمه ولا ضمير وقرر (يبار) يروح لأهل البنيه المسكينه بس هالمره راح يشتم بالعريس ويذكر معثراته وهو اللي وصفه گبل چم شهر بأوصاف زينه , وكان المرحوم (مطلگ) يسمع من (يبار) وما يرد عليه وهناه طبت (بدريه) مثل اللبوه وصاحت :

(ولك يبار منعول الوالدين مو إنت الگلت غالي خوش ولد ومثل إبني ودگيت سدرك وكفلته هسه شنه الخلاك تتبره منه؟) وخصم الحجي أنا ماخايف عليك من أمثال (مطلگ) اللي يسمعون ويسكتون , خايف عليك من وحده مثل (بدريه) الله يرحمها تطيح حظك وتدري النسوان هم عدهن أصوات بالأنتخابات .

#حميد_حران_السعيدي (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات