الحمار له خمس رجلين و جناحين و بيطير

أيمن غالى

الحوار المتمدن-العدد: 5832 - 2018 / 3 / 31 - 22:41
المحور: كتابات ساخرة
    

مفاهيم و كلام كتير بنحتاج نشرحهم؛ لكن ممكن نوجزهم و نوفر توضيحهم بطرق و وسايل مختلفة؛ بمثل؛ بقصة؛ بحكمة؛ و ممكن بنكتة بليغة توفر وقت الشرح و توصل المفاهيم بصورة كاملة ..
أسيبكم مع النكتة إللى جاية و نرجع نكمل كلامنا مع بعض ..

النكتة* بتقول:
إتنين قرويين ( حسنين و محمدين )؛ كانوا قاعدين يتسامروا مع بعض ..
حسنين: تحب أجول لك فزورة يا محمدين ؟
محمدين: جول يا حسنين
حسنين: حاﭽة ليها خمس رﭽلين و ﭽناحين و بتطير
محمدين: ﭘاه .. ما خبرش يا بوى
حسنين: شوف حلها إييه .. الحمار
محمدين: ﭘاه .. بجى الحمار له خمس رﭽلين و ﭽناحين و بيطير ؟
حسنين: لَعْ .. بس بِنصَّعِبها شوية

نسيب النكتة شوية و نشوف الحكاية دى مع بعض ..
لو تابعنا ترجمة أسماء الأعلام من لغات العالم للعربية حا نشوف حاجات عجيبة لها العجب؛ منها:
نشوف حكاية ترجمة أسماء الأعلام من لغات العالم للعربية و نحاول نفهم دماغ المترجم و نعرف غرضه و كونه عاوز يوصل لإيه ..
نشوف إسم الفيلسوف أفلاطون جاى منين و العرب ترجموه إزاى .. الراجل فى اليونانية إسمه بلاتون Πλάτων ( بمعنى: العريض )؛ مع العلم إن إسمه ما فيهوش حرف " ف " و لا فى اليونانية حرف " ط " ..
و نشوف إسم الفيلسوف اليونانى Ἀριστοτέλης أريستوتليس ( بمعنى: ممتاز النيَّة )، تلميذ أفلاطون ومعلم الإسكندر الأكبر, و إزاى العرب ترجموه لـ أرسطو؛ برضه حشروا حرف الـ " ط " فى إسمه, و حذفوا نُص إسمه؛ يعنى ممكن نقول أعطوه إسم دلع و كان ممكن يدلعوه بإسم ( طاطا أو طيطو و ممكن تيتو للتخفيف ) بدل من إسمه المكلكع بالنسبة لهم ..
و واحد زى الفيلسوف السكندرى ( Ἰωάννη ὁ Φιλόπονος بمعنى؛ المحب للإجتهاد ) جون فيلوبونوس (490 - 570 م )؛ لما نشوف ترجمة إسمه لـ " يحيى النحوى " ممكن نفهم إيه ؟
أكيد حا نفهم إنه راجل عربى من إسمه و صفته العربية و مش بعيد نفهم إنه هو إللى واضع ألفية بن مالك الحقيقى أو إنه هو نفسه سيبويه ..
طيب نشوف مثل معاصر زى الأمين العام السابق للأمم المتحدة كوفى أنان Kofi Annan الغانى الجنسية و نتذكر بداية تعيينه؛ و خروج الصحف المصرية – و معاها العربية - بترجمة إسمه لـ كوفى عنان؛ بالرغم إن إسمه Annan ؛ بس إحنا و بقدرة قادر سامِّيناه عنان فى محاولة لإضافة مَسحة عروبية لأصله, و إنه قريب أم السيد بالسويس, و الحاج برعى النقاش بالجيزة, و برعى عنان بالسويس و عبد الشكور عنان ببولاق, و نسيب عائلات أنّح بالأنفوشى , و عائلات الدكش و أبو رجل مسلوخة بالدرب الأحمر ..

و المشكلة الكبيرة إنك لَمَّا تحاول تبحث فى المراجع العلمية و العالمية؛ أو تستخدم محركات البحث الإليكترونية الغربية و العالمية عن أسماء أفلاطون و أرسطو و يحيى النحوى و عنان؛ مش حا تلاقى لهم وجود لأنك – لو مش عارف حقيقة أسماءهم – حا تضطر تكتبها حسب ما سمعت و شوفت أسماءهم بتتكتب إزاى فى المنطقة العربية و حا تضطر تبحث عن أفلاطون بهجاء Aflaton, و أرسطو بهجاء Aristto, و جون فيلوبونوس بهجاء Yehia Al Nahawy, و هكذا .. و أكيد محركات البحث حا ترد عليك برد ممكن يزعلك ..
إلى جانب إن أسماء الأعلام بلغتها لها معانى مفهومة و بعد تعريبها – و بمعنى أصح؛ بعد عجنها و شلفطتها – ما تلاقيلهاش أى معنى ..
يعنى ضرورى تُستُر مجالك و تخليك مع المراجع و محركات البحث العربية؛ لو مش عارف حقيقة أسماء الأعلام إللى بتبحث عنها و ما تعرفش غير أسماءهم بالعربية ( أو زىّ ما العرب سمُّوهم أو دلعوهم ) ..

آخر الكلام:
لو راجعت الجماعة إياهم إللى قايمين على ترجمات أسماء الأعلام من مختلف اللغات للعربية و سألتهم: أنتم ليه بتعملوا كده؛ حا يقول لك:
أنت نسيت نكتة الحمار أبو خمس رجلين و جناحين و بيطير وَلَّا إيه ؟!!

* النكتة باللهجة الصعيدية و هى إحدى ثلاث لهجات معتمدة حتى الآن دوليا للغة المصرية الحديثة مع السكندرية و القاهرية
و ترجمة مفردات النكتة كالتالى من الصعيدية للعربية:
أجول: أقول جول: قًل حاﭽة: شئ ما ليها: لها رﭽلين: أرجل ﭘاه: علامة تعجب
ما خبرش: لا أعلم ( ما؛ أداة نفى, ش؛ أداة تأكيد النفى فى نهاية الكلمة ) شوف: أنظر إييه: ماذا يكون / تكون
بجى: هل لع: لا

#أيمن_غالى (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل