محاضرة جيل دولوز، 17 مارس 1987: شنوّة معناها ابداع؟ (جزء 1)

ضياء البوسالمي

الحوار المتمدن-العدد: 5804 - 2018 / 3 / 3 - 16:36
المحور: الفلسفة ,علم النفس , وعلم الاجتماع
    

شكونو جيل دولوز: باختصار، هو فيلسوف فرنساوي قلب النص الثاني تع القرن العشرين ومعروف بتخمامو في برشا مواضيع كيما السينما، الرسم، الموزيكة، الأدب وعندو كتب على فلاسفة يحبهم وتأثر بيهم برشا كيما نيتشه (الي حشاهالو بعد لامحالة وقلب بيه) وسبينوزا وبرغسون. حاسيلو، سي دولوز تعرّف عام 1969 على فيليكس غواتاري فيلسوف زادة هو ومختص في علم النفس (دولوز كان يحبو برشا وكيف حكى مع ماري كلير على الصداقة جبد على فيليكس) منطولش عليكم هو وسي فيليكس لقاو برشا حاجات تجمعهم ولقاو رواحهم يخمموا في نفس الطريق وكتبو كتاب ضد أوديب عام 1972 وكتبو زادة كتاب مهم علّخر اسمو شنوّة هي الفلسفة؟ عام 1991. هاو الرابط لصفحة سي دولوز في ويكيبيديا كان تحبو تزيدو تعرفوه أكثر:
https://fr.wikipedia.org/wiki/Gilles_Deleuze

المحاضرة على شنوّة تحكي؟
هذي يا سيدي محاضرة عملها دولوز عام 1987 قدام جماعة يقروا سينما وحكىة فيها على الابداع وفرّك رمانة الخلق والابتكار وجاوب على سؤال مهم برشا هو: شنوّة معناها واحد عندو فكرة ففي السينما؟ هاو الرابط تع المحاضرة بالسوري للناس الي يحبو يتفرجو في دولوز (على فكرة صوتو زبور برشا وفمّة عباد يجيبلهم النوم اما كان تركزو مع الي يقول فيه منتصورش تنعسو):
https://www.youtube.com/watch?v=2OyuMJMrCRw

توّة نسمعو سي دولوز.:
حتّى انا عندي شويّة أسئلة نحب نسألهم ليكم أنتم ونسألهم لروحي. باش يكونو.. هممم.. باش يكونو من نوع شنوّة تعملو أنتم بالضبط وقت تقروا سينما؟ وأنا.. شنوّة نعمل بالضبط وقت نتفلسف ولا نحاول باش نتفلسف؟ ايه، عندناش حاجات نجمو نقولوهم لبعضنا على ضو هذا الكل؟
بالطبيعة، الأمور ماهيش ماشية بالنسبة ليكم، وماهيش ماشية زادة عندي (الحاضرين يضحكو) أما موش هذا أكهو الي عندنا باش نتحدثوا فيه. ولا نجّم نسأل السؤال بطريقة أخرى: شنوّة معناها الواحد يكون عندو فكرة في السينما؟ اذا كان تخدمو في السينما ولا اذا كان نحبو نعملو سينما، شنوّة معناها يكون فمّة فكرة؟ وقت الي تقولو: آه، عندي فكرة. خاطر من جهة، الناس الكل تعرف الي انو تكون عندنا فكرة هذا في حد ذاتو حاجة موش ديما تصير، انو تكون عندنا فكرة هذي كيما الحفلة، أما موش ديما تصير. الفكرة لازمها تكون موجهة لبلاصة وفي ثنيّة معيّنة كيما بالضبط مولى الفكرة في علاقتو بكاتب ولا ميدان معيّن. نحب نقول الي الفكرة تنجّم تكون ساعات في الرسم، ساعات في رواية، ساعات في الفلسفة ولا حتى في العلم. وبالطبيعة مينجمّش واحد أكهو يكون عندو هاذم الكلّ.
كان تحبو، نجمو نقولو الي الأفكار لازم نعاملوهم كيما طاقات ساكنة فينا وموجودة لداخل أما في الغالب يكونو موجهين في سكّة معروفة ومعيّنة وماهيش بعيدة برشا عليها، بحيث منجمش نقول الي ندي فكرة عامّة. بالحاجات الي نعرفها، نجّم يكون عندي فكرة في مجال معيّة، فكرة في السينما ولا فكرة أخرى في الفلسفة.

#ضياء_البوسالمي (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
في رحيل جليل شهباز، عضو هيئة إدارة الحوار المتمدن	في رحيل شاكر الناصري، أحد مؤسسي الحوار المتمدن

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل