الأدب بالدّارجة : ترجمة رواية -الغريب- لألبير كامو، الجزء 3

ضياء البوسالمي

الحوار المتمدن-العدد: 5271 - 2016 / 8 / 31 - 23:07
المحور: الادب والفن
    

خْذِينَا اُلنَّاس لْكُلْ لْقَهْوَة إِلِّي حَضَّرْهَا لْحَاجِبْ. بَعِدْهَا مَاعَادِشْ نَعْرِفْ شَيْ. تْعَدَّى اُللِّيلْ. نِتْذَكَّرْ حَلِّيتْ عِينِي شْوَيَّة شُفِتْ اٌلعُجَّزْ رَاقْدِينْ فُوقْ بْعَضْهُم، كَانْ وَاحِدْ بَرِكْ، مِتِّكِّي عْلَى يْدِيهْ إِلِّي شَادِّنْ لْعُكَّازْ، كَانْ يُغْزُرْلِي كَايِنُّو يِسْتَنّى فِيَّ نْفِيقْ. رْجَعِتْ رْقَدِتْ، وْ بَعِدْْ فِقِتْ خَاطِرْ حَسِّيتْ بِوْجِيعَة فِي كِلِوْتِي. اُلنْهَارْ بْدَا يِطْلعْ وْ اُلضَّوْ يِسْطَعْ فِي اٌلأُصِحْنَة اٌلبِلاَّرْ. قََامْ وَاحِدْ مِ اٌلعُجَّزْ وْ بْقَى يْكُحْ. كَانْ يِبْزَقْ فِي مْحَرْمَة فِيهَا مُرَبْعَاتْ كْبَارْ. فَيَّقْ لُخْرِينْ، قَالْهُمْ لْحَاجِبْ إِلِّي لَازِمْهُمْ يِمْشُوا، قَامُوا. اُلسَّهْرِيَّة تَعْ لْبَارِحْ خَلاَّتْ وْجُهْهُمْ كِيمَا اُلرْمَادْ. وْقِتْ إِلِّي خَرْجُوا سَلْمُوا عْلِيَّ، وْ أَنَا بَاهِتْ، كَايِنُّو اُللِّيلْ إِلِّي تْعَدَّى وْ إِلِّي مَاحْكِينَا فِيهْ حَتّى كِلْمَة عَمِّقْ صُحْبِتْنَا.
كُنِتْ تَاعِبْ. هَزْنِي لْحَاجِبْ لْبِيتُو وْ نَجَمِتْ نْصَلَّحْ شْوَيَّة مِنْ هِنْدَامِي. شْرَبِتْ زَادَة قَهْوَة بِاٌلحْلِيبْ، بْنِينَة بَرْشَة. وْقِتْ خْرَجِتْ اُلنْهَارْ طْلَعْ بِلِقْدَا. وْ فُوقْ لَجْبَالْ إِلِّي يُفِصْلُوا مَارنغو عَلْ لِبْحَرْ، اُلسْمَاءْ مْعَبْيَة باٌلبْلاَيِصْ لَحْمُرْ. اُلرِّيحْ تِتْعَدّى فُوقْهَا وْ تْجِيبْ مْعَاهَا رِيحَة اٌلمِلِحْ. نْهَارْ جْدِيدْ بْدَى. لَحْكَايَة تَوَّة عَنْدِهَا مُدَّة ، وْقِتْ مْشِيتْ لِلْقَرْيَة وْ حَسِّيتْ اُللَّذَة تَعْ المِحْوَاسْ كَانْ مَاجَاتِشْ أُمِّي هْنَا.
بْقِيتْ نِسْتَنَّى فِي اُلسَّاحَة، تَحِتْ شُجْرَة. كُنِتْ نْشِمْ فِي رِيحَة اٌلأَرِضْ، وْ مَازَالْ مَاجَانِيشْ اُلنُّومْ. تْفَكَّرِتْ زُمَلاَءْ لْبِيرُو. فِي لْوَقِتْ هَذَا، يْقُومُوا يِخِدْمُوا وْ كُنِتْ نِعْتَبَرْهَا أَكْثِرْ سَاعَاتْ مُتِعْبَة. بْقِيتْ نْفكَّرْ، وْ بَعِدْ لَهِّيتْ رُوحِي بْنَاقُوسْ يَضْرِبْ فِي وُسِطْ بَنْيَة. فَمَّة خُوضَة وْرَاء الشْبَابِكْ بَعِدْ كُلْ شَيْ رَاضْ، طَلْعِتْ اُلشَّمِسْ أَكْثِرْ فِي اُلسْمَاء، وْ بْدَاتْ سَاقِي تَدْفَى. شَقْ لْحَاجِبْ اُلسَّاحَة وْ قَلِّي إِلِّي لْمدِيرْ حَاجْتُو بِيَّ. مْشِيتْلُو لْبِيرُوهْ، مَدْلِي أَوْرَاقْ صَحَّحِتْ عْلِيهُمْ. لَاحِظِتْ إِلِّي هُوَّ لاَبِسْ لَكْحِلْ مَعَ سِرْوَالْ مْخَطَّطْ. خْذَا اُلتَّلِفُونْ بِيديهْ وْ سْأَلْنِي : " اُلجْمَاعَة إِلِّي بَاشْ يِدِفْنُوا جَاوْ عَنِدْهُمْ مُدَّة ، هَانِي بَاشْ نْعَيْطِلْهُمْ بَاشْ يْسَكْرُوا عْلَى اُلنّعِشْ، تْحِبِّشْ تْشُوفْ أُّمِّكْ آخِرْ مَرَّة ؟ " قُتْلُو لاَ. كَلَّمْهُمْ بِاُلتَّلِفُونْ بْصُوتْ ضْعِيفْ : " فِيجَاكْ، قُولْ لِلْجْمَاعَة يْنَجْمُوا يِمْشِيُوا. "
قَلِّي إِلِّي هُوَّ بَاشْ يَحْضِرْ فِي اُلدْفِينَة، فَشْكَرْتُو.

#ضياء_البوسالمي (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
في رحيل جليل شهباز، عضو هيئة إدارة الحوار المتمدن	في رحيل شاكر الناصري، أحد مؤسسي الحوار المتمدن

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل