في حضرة لعشير

عبدالله مهتدي

الحوار المتمدن-العدد: 5479 - 2017 / 4 / 2 - 03:59
المحور: الادب والفن
    

شعر-زجل
في حضرة لعشير
الى روح زهير التيجاني
واه يا ديك الوترا اللايحة هبالها
على شط لبحر
حاضياه لا يرحل
شدي لي ميزاني
راه هزل ونحل
عيوط بها نسهر
تزهى حزاني
واه يا ديك الوترا الناشرة سوالفها
على غصان الشجر
نوشمك على كتفي
غير حني وعطفي
نعيط بعيوطك دموع
مكَيدة نواحها في جوفي
نوحي يا الوترا نوحي
نوحي وزيدي في جروحي
واه يا ديك الوترا الساكن حماقها
جبال وحجر
سيحي في دمي
زندي همي
ونسينسي في وجع الوقت
راه التيجاني قالو مات وهو حي
راه كتبت ليه بريه
راه معايا في الهضرة دا وجاب
ورد علي لجواب
واه يا ديك الوترا وشحال بيتي
من خاطر خاسر
ومن قلب عساس
واه يا ديك الوترا وشحال ما درتي
ما دار الكاس في الراس
واه يا ديك الوترا المدرحة عيوطها بين الطرقان
جادلا سوالفها بالحنة والقطران
راه كيال الجرح وفا وزاد
راه الفم وما جاب
راه الخط وما خط
راه اللغى وما من تدراحو ساب
واه يا ديك الوترا السارحة بين غيوم لكلام
راه تخبل فيا اللغى
وفاضو كيساني
راه مساس لساني
ضيعت ميزاني في عيوط التخمام
وبقيت وحداني
نقري ونقرا تخمامي
نكوي بيه ديك الكية
نحني بيه وجه ليام
واه يا ديك الوترا
راه التيجاني حي واخا كَالو مات
بيدو شير علي وفات

كَسدة لحروف تعرات وبهاتت
ما يرجع زواقها
حليب ناقة
ما يصقلها/ ما يبخرها
بخور العراكَة
لا مديت ليها يدي
ولا من كاس المعنى فاضت
لا شفت فيها ولا هي شافت
خسرت الوزنة والوزنة ماتت
كَسدة لحروف جلات
قوام الهضرة
فتشت على الصباح
لقاتو راح
فتشت على الحلمة
تخبلت في يديها ظلمة
وعليك تبري يا رفيقي
عليك تفتش بين سواقي لحزان
يا ك أرفيقي مولفين بزوج
تدندين الوترا
بيها نحفرو في الطريق طرقان
نفتلو للصبيان
من عطوب الوقت كَمرا
يلعبو تحت ماها
يغنيو تحت ضوها وسماها:
" هز قدم حط قدم
شوارع عامرة بالدم
هما يقولو هزمونا
وحنا نقولو انتصرنا"
ياك أرفيقي
شحال تخبل سرك بسري
شحال عليك
بفتيل القنديل نبري
وأنت ساكن مداد حبري
بيه نعكز على عطوب ليام
تطلع في يدي جمرا
وأنت يا رفيقي
شحال من سوايع في نواح الليل
تقري وتقرا
تغربل من لكلام احلام

شحال أعشيري
حطبتي من ديك الريح الرايحة
سوالفها على ليام مدرحة
شحال كتبتي
شحال قريتي
شحال من حكاية بضيم الوقت قلتي
شحال حلمتي
وشحال من صمت
طلع من صمتك كلام
شحال غرستي من فتيلة في سقف السما
باش كلشي يقرا
يترفع لقلم على الحكَرا
شحال من كليمة
زرعتي في كفوف الما
شحال سرجتي من خيل
ورَّدتي من سربة في عرس المحبة
شحال حفرتي من ساس
سهرتي على تخياط المعنى عساس
شحال زندتي من بارود
واه أقلبي واه
وشحال نفختي في عين الجمرا
بها زيانت بشرة الكَمرا
شعالة تشعل لفراح
بها نغسلو لجراح
يطلع نهارنا من كهف الظلمة
بفتيل الكلمة
وشحال.........
ما تحزمتي بسوارت لغدر
ما درتي حساب لعمر
ما غيرتي وقفا
ما هزتك في سمايم الليل رجفا
وها انت جوال في غربة لمكان
تخطوي خطوات في زماني
تشعل من طراف الكلمة
قنديل الكتان

آه يا مولاي التيجاني
خليتيني حاصل في الحصلة وحداني
مطارق الوقت
تحفر لي في الصمت قبر
تشعل في جوفي شلة جمر
ترفدني للمرفودة رفدة
تدوي في سكاتي رعدة
هاني ثاني
في زماني براني
موسد مواج لبحر
مكسي بتشيار لحجر
كلامي طحناتو رحى لعصيدة
وطيور الحلمة حصلت في المصيدة

آه يا مولاي التيجاني
كتبتك في دموعي
باربع موجات
الموجة اللاولى:
راكبة على الزاي
صوتها خارج من ناي المحبة
الموجة الثانية:
راكبة على الها
والها في دمي مرشوشة بمداد الصحبة
الموجة الثالثة:
راكبة على اليا
واليا في سفينة لكلام معليا
ماها يغسل هبال الكلمة
يطيح قضبان وفك قيود
يصرها في طريقك حلمة
الموجة الرابعة:
راكبة على الرا
بلادي بها زاهرا
زغروتة محرزة على لوقات
تدفي خاطر المعنى
تعري ايام القهرا
موردة بخدود الشجر
بها ينطق صمت لحجر
آه يا مولاي التيجاني
هاني ثاني
مدفكَة دموعي على لساني
من هجران الكلمة نعاني
ماعندي ليك غير قصيدة
بها نرسم تاج وريدة
ونسول سوالات:
مال الجماعة ولات جماعات
مال القسمة تقسمت قسمات
طوقو الحلمة بتشيار لكلام
دردروها عجاج في رحى ليام
ياك أعشيري
ما كنا حياحا
في دنادن الوترا
ما كنا قيوش
في تسبيح المداحا
مال الحلمة يا عشيري
زوقوها من برا
عكرو ليها بلحمر
زوقوها من الداخل
نبتو فيها ريحت لقبر
حزموها بعطيس القرطاس
حاصروها بحيوط وعساس
علقو عليها شلة مكاحل
مال الجماعة تلفت عيوط المحبة
جلات خيوط الكبة
اولى جدبات
ميزان الجدبة
شي ياكل من كَصعة الجاه
وشي يعمر الشكارة حبة

جاي ليك أرفيقي جاي ليك
غدا النوبة فيا
واليوم النوبا فيك
نكتبك في كناش حزاني
أنت مني وأنا فيك

الموت داز
والحرف تكسر
الموت هجم
والحرف تلجم
الموت ضرب الضربة وحرن
والحلم حزن
الموت علينا حق
دافنة سرها في بيرها
حالفة ما تنطق
الموت حريق
الموت طريق
كية لي ما قرا وكتب
كية لي ما من عطوب المعنى حطب
كية لي ما من بزولة الكلمة حلب
ما تعريها شمس
ما تبات على الضس
ما يهزها ما
ما تباع بفلس

ألباس أرفيقي لباس
ما نفاوض عليك سهير الكاس
الخروف صايكَو شناقو
لتفوار الكسكاس
وأنا معاك بايت على المعنى عساس
ألباس ارفيقي لباس
الشكارة والفاس
ما كاين باس
لبست لعداوة قميص لمحبة
لقيوش ولات غربة
زورت لكلام جاه وحبة
وتخبلت فينا خيوط الكبة
ألباس أعشيري لباس
الليل هجم
واللغى مساس

توحشت فيك يا رفيقي
وما بينا من كلام
نطحنوه في رحى زاهية
نخبزوه وريدة
خدودها موردة
نهدو بيها تخبال لحدود
نخبزوها عجينة وسدود
في ثقوب ليام
توحشت فيك غمزة المعنى
يزهى في كلامك لكلام
ويطرب المغنى
بيه نجدل حبال
نتسلق حيوط المحنة
توحشت فيك لميمة وما عطفت
توحشت فيك لبلاد وما عطبت
توحشت فيك لبحر وما دا وجاب
توحشت فيك السما وما غطات
توحشت فيك الشتا وما غسلات
توحشت فيك الكلمة وما عرات

واه أقلبي واه
بين ضربة الموت
وزهر لمرشة
رسمتك في خيال لحكاية ندبات
سرجتك بارود في وجع النكبات
نجيك من جات الريح
من عام الرفسة
عيوطها كيات
جراح تفكَد جراح
محفورة صورتك في دمي
مونسه همي
عيوطها بحات
والفرحة في جفونها بكات
وأنت بعيد في غربة لمكان
تخطوي خطوات
ملحف بسلهام الكلمة
تسقيني من جمر الكلمة
يطلع مني لفجر كلام
بيه نسليك ونتسلى
أنا ما خليت سما
نشوفك طير يحلق
ينشر قصايد لمحبة
ما خليت بحور
نحسك في ضلوعي ما
يسقي بحبق الورد
رحبة لمحبة
وأنت في دمي وشمة
مدادها جمر
ماها بحر
أنت شان وهمة
واه أرفيقي واه
شحال من جرح فيا مجروح
وأنت في قلبي كية
تدندن معاني وتبوح
ياك غير البارح
كنا نحفرو للطريق طرقان
نفتلو من ظلام الحكَرا
حبال لكلام
نفخو في جمرة لوجع
شعالة لحلام
نريبو حيوط القهرا
نبنيو سواري ونهدو بيبان
نسمعو يدندن معاني بوح الكيسان
نفكو حجاية الكبة
نسقيو دموع الكية قرطاس محبة
واه أرفيقي واه
نصبح عليك بالوفا
نبني ليك في قلبي قبة
نرمم بيك عيوط الوترا وعطوب الوقفا
وحق وشام الندبة
وحق القرشال لي منو قرشلتي
صوف الكلمة
وحق المغزل لي غزلتي منو
سربات الحلمة
راه عيوط الكية ولات كيات
راه دموع الكلمة بكات

#عبدالله_مهتدي (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات