لعنة الترافيك .. بوست عميق على ما يسمى فيس بوك

صلاح شهاب
باحث
(Salah Shehab)

الحوار المتمدن-العدد: 5324 - 2016 / 10 / 25 - 17:42
المحور: الصحافة والاعلام
    

الموضوع اللي هتكلم فيه ده يمكن فيه ناس كتير مش هتفهم منه أي حاجة .. بس كان لازم اتكلم فيه لان الموضوع كبر وبهوق على الأخر .. يمكن يكون فيه ناس كتير اتكلمت عن اللعنة الجديدة اللي احنا عايشنها من فترة .. يعني كلامي ممكن ما يقدمش ولا يأخر .. لأنه مش جديد عليكم .. واحتمال انه ما يوصلش لحد أصلًا .. اللي بقوله ده ممكن يقراه خمسة او ستة من اللي عندي في قايمة الاصدقاء.. بس كان لازم نتكلم فيه بما اني بتاع تاريخ زي مابيقولوا .. يعني كلامي هو تسجيل موقف مش أكتر .
أنت ممكن تكون شايف اللي بيحصل على فيس بوك وتويتر جريمة في حق المجتمع .. وممكن تكون شايف اللي بيحصل ده شيء عادي ونوع من التنفيس والكلام الكبير اللي بيتقال.. ودول يبقوا أشهر التعليقات على الجدل اللي بيحصل على كل القضايا اللي بتنتشر على مواقع التواصل.. بس الحقيقة اللي معظم الناس ما تعرفهاش ان اللي بيحصل على المواقع حاجة كدا زي العرض والطلب.. هحاول ابسطهالك شوية واقولك ان مواقع التواصل حاجة زي السوق المفتوح .. فيها بياع بيستغل كل الاحداث اللي بتحصل وديه بتبقى بضاعته اللي بيقدمها للزبون المغفل اللي هو لا مؤاخذه انت .
أنا ما بقولش أن كل محتويات فيس بوك وتويتر وغيرها مالهاش أي لازمة بالعكس في بيدجات بتقدم حاجات عظيمة والمحتوي فيها ممتاز.. ودي اللي لازم ندعمها .. واحد تاني هيقولي ان مواقع التواصل معمولة للهلس والضحك.. وماله مافيش أي مشكلة اضحك ياعم وهلس براحتك.. بس لازم تبقى عارف ان الهلس والضحك والكوميكات اللي انت فرحان بيها ديه في ناس بتكسب من وراها وده اللي احنا بنحاول نوصله ليك علشان تبقى فاهم الدنيا ماشية ازاي .

الموضوع أكبر من اكونتات وهمية لناس مش موجودة أصلا.. أكبر من اشاعات واخبار بتشيرها عمال على بطال .. أكبر من محتوى ديني بيتقدملك على شكل بوستات من غير أي مصدر موثوق فيه .. وأكبر من فيديوهات العيال الخنيقة اللي بتشوفها على فيس بوك ويوتيوب .. ده أكبر كمان من الصور العريانة اللي ممكن تشوفها على بيدجات المراهقين .. أكبر من الاخبار اللي بتوصلك كل شوية .. أكبر من جروبات المجلس العسكري والجيش الالكتروني المصري .. وأكبر كمان من رقصة صافيناز اللي ممكن تتقدملك في لينك خبر بالفيديو .. فاكر مشهد صلاح عبد لله في فيلم الشبح لما قال للصاوي النت ده ياما فتح بيوت .. هو فعلًا فاتح بيوت ناس كتير .. كبر الريتش انت بس.. وزود الترافيك .. وانت هتلاقي الدولارات نازلة عليك زي الرز ... ساعتها بس هتبقى سوشيالجي عظيم وماحدش قدك .
مش هطول كتير بس هو الموضوع تقريبًا معقد جدًا .. أعقد من التحالفات اللي دايرة في منطقة الشرق الأوسط.. أعقد من فيديو سواق التوك توك اللي وصل في يوم واحد لأكتر من 400 ألف شير .. أعقد من فيديوهات داعش وبدايات باسم يوسف على يوتيوب .. فيديو معقد وبيدخل في حسابات كتير وحاجات مش لازم تعرفها خالص ..
طيب هو إيه المطلوب .. اقولك أنا إيه المطلوب .. كل المطلوب منك لما تلاقي محتوى محترم .. فنان جديد .. بيدج مهمة .. تحاول تساعدهم بلايك أو شير .. انشر البيدجات المحترمة .. اللي بتقدم خدمات حقيقية وساعدها انها تكمل .. لو لقيت بوست مش عاجبك ماتعملش نفسك فلحوس وتعلق بشتيمة أو تحاول تتقفلط وتتنطط في البيدج في كل البوستات وكأنك فاتح عكا .. لأنك بتزود الريتش عنده ياغبي.. يعني لو حاجة عجبتك شارك فيها .. ماعجبتكش اعمل أنلايك لأم الصفحة وأخلص .

#صلاح_شهاب (هاشتاغ)       Salah_Shehab#          

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
في رحيل جليل شهباز، عضو هيئة إدارة الحوار المتمدن	في رحيل شاكر الناصري، أحد مؤسسي الحوار المتمدن

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل