الكتابة من أسفل ( عيال ميت نامة )

صلاح شهاب
باحث
(Salah Shehab)

الحوار المتمدن-العدد: 4646 - 2014 / 11 / 28 - 00:39
المحور: كتابات ساخرة
    

الصدفة لو خلتك في يوم تروح مشوار في الوقت اللي بيسموه الذروة , وهو وقت خروج الموظفين وعفاريت المدارس أو شياطين مصر في زمن اللاشئ , وركبت مترو ولا ميكروباص في مواصلة مالهاش آخر , فده قدرك ياريس وماتحاولش تهرب منه , فلو ركبت في يوم المترو القشاش فحاول تتشاهد قبل ما تركب , لانك احتمال تنزل من غير حاجات معينة خاصة بيك .
الجيل الجديد اللي طالع ورور مابين ال12 وال17 سنة دول بقى أجارك الله , عيال مايعرفوش اللي خلقهم ياراجل , هتلاقي منهم اللي حاطط الهاند فري وده يعتبر ابن الناس فيهم , أما الباقي منهم ياساتر مشغل الموبايل على أعلى صوت ومشغل مهرجان , ويقولك عليه ده جامد فشخ ويرقص ويتنطط هو وزمايله وكأنهم كانوا خارجين من ديسكو مصر , مش من مدرسة تعليمية .
هتسمع اجدع وصلات الشتيمة بين كل الزملاء الأعزاء وده على فكرة حديث جانبي عادي بس هما بيحبوا يحطوا شوية تحابيش على بعض المفردات الخاصة بالفاميليا , يعني شتيمة بالام ماشي , بالأب يجوز , ده غير الضرب والتلطيش والجري بين الركاب اللي اساساً واقفين مش طايقين روحهم من كتر الزحمة¸ وده على فكرة العادي , ياراجل طاقة وبيخرجوها , يعني مش أحسن مايخرجوها في حاجات مش ولابد , والصوت طبعا عالي والحوار في الاساس بيدور حوالين البنات والذي منه .
عرق وريحة مش هي , زائد صوت عالي , وجري وحركة وضرب بالشلاليت والاقلام وخبط في الجسم ده ملخص يوم عادي طالما العيال ديه موجودة معاك في مواصلة , وانت مش في حيلتك غير انك تدعي ان المترو ينجز , والمحطات اللي ملهاش عدد تخلص وتوصل بالسلامة , المحطات بقى مليانة بنات مدارس بردوا ماتعرفش ليه طالعين في نفس الميعاد و العفريت اياهم ينزلوا من عربية المترو يخبطوا فيهم وهاتك يتحرش وصويت وزعيق وناس تهلل , وتكبر , وحاجات غريبة , وانت ولو ربنا كرمك وخدتك الشهامة علشان تنزل تزعق في أي واحد فيهم , هتاخد تريقة من هنا لآخر الشارع , واحد يقولك ياراجل كبر مخك , ياعم الأطفال احباب الله , طب وهما دول اساساً اطفال , حاجة تجنن والله .
واحد واقف عمال يتأفف ويقول اللي يخرب بيت اهليكم, والتاني يرد وهما اهاليهم مالهم بس الدور على التعليم والمدارس والحاجات اللي بيتعلموها فيها , واحد ساند راسه قال والمدرس دوره ايه في الموضوع ده مش ياخد باله من تصرفات الطلاب اللي عنده ويحاول يحسن فيهم بدل التركيز على الدروس واللي بياخدوها , ياعم ده نظام في الإساس فاشل , ربنا يرحم الجميع .
أما بقى لو وصلت بيتك والحمد لله بالسلامة , فاشكر ربك واحمده انك عرفت توصل سالم غانم لبيتك واهلك وصحابك , وحاول تستعد لليوم اللي بعده لان نفس الوصلة هتكرر يامعلم و وللامانة بيبقى في شوية تغييرات في بعض الوشوش والاجسام والمهرجانات اللي شغالة كمان , ففاصل ونواصل ليوم جديد مشحون بأمل في جيل المفروض البلد المحروسة ديه هتعتمد عليهم في يوم من الايام , ولكي الله يامصر .
كلمة اخيرة ميت نامة اللي فوق ديه مش المقصود بيها منطقة ميت نما اللي في شبرا الخيمة ولا المقصود بيها التمويه على الشتيمة المعروفة اياها من غير تفصيل عليها , المقصود بيها ميت وده ياباشا رقم مائة باللغة الفصحى , ونامة كلمة فارسية معناها كتاب , يعني المقصود غير اللي وصل لحضرتك فصفي النية شوية .

#صلاح_شهاب (هاشتاغ)       Salah_Shehab#          

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل