جهاد علاونه
الحوار المتمدن-العدد: 5020 - 2015 / 12 / 21 - 19:42
المحور:
كتابات ساخرة
مرة من ذات المرات, أو لنقل قبل ثلاثة أشهر من هذا التاريخ.
قبل ثلاثة أشهر بالضبط وبالتحديد, كانت لنا أنا وصديق لي مشكلة مشتركة في المحكمة الشرعية التابعة لدائرة قاضي القضاة.
ذهبنا سوية أنا وصديقي ونحن نتعكز على بعض.
دخلنا الدائرة وكانت رائحة الدخان تعمي الأبصار.وكنا نحن منهكين من طلوع الأدراج.
واستقبلنا أول موظف بعد أن صعدنا الدرج, كان مكتبه مقابل مدخل الشقة وتوجهنا إليه مباشرة فقال لنا: تفضلوا...أي خدمه يا شباب, قلناله: احنا والله مشكلتنا هيك هيك, ومش عارفين شو بدنا نعمل!!, يعني حايصين لايصين ومش عارفين راسنا من رجلينا, إشي بقللنا اعملوا هيك وإشي بقوللنا اعملوا هيك, وفي ناس بقولولنا: لا هيك ولا هيك روحوا على المحكمة الشرعية مباشرة, وعشان هيك اجينا عليكوا.ومن ثم جلسنا على المقاعد قبل أن يطلب منا الجلوس.
قال: امممممم بسيطة جدا, هذي معاملتكم لا يستطيع حلها الا القاضي الشرعي نفسه, فقلت له: معقول؟!! قال: لعاد شو بتفكرها فوضه هذي مسأله دقيقه وفيها حقوق العباد وفيها أرامل وأيتام...إنت بتفكر القاضي شو بعمل هون إلا المسائل المعقدة, فقلت له: ماشي على بركة الله, شو نعمل؟ قال:معكوا الأوراق اللازمة؟..قلناله: ما بنعرفش شو المطلوب!!, قال: بسيطة جدا, شهادة ميلاد مصدقة للأولاد...وشهادة وفاة للمتوفى وصورة مصدقة عنها طبق الأصل, وكشف راتب من البنك مصدق ومختوم من البنك, وكتاب تغطية من مؤسسة الضمان الاجتماعي, وصورة مصدقة عن دفتر العائلة, وتقرير طبي...وشهود عدد 2 رجال, وصورة عن كل هوية لهم مصدقة أيضا من دائرة الأحوال المدنية طبعا للشهود, وصورة عن قرار راتب التقاعد العسكري...وصورة بطاقة شخصية لوالد المتوفى.. وخبير...إلخ.
فقلنا له: ماشي.
وخرجنا لنجهز الأوراق على أساس أن العملية سهلة جدا, قمنا خلال شهر كامل بالإجراءات بين البنك والضمان الاجتماعي وجمع الشهود وخبير ...و....و...و.حتى طلعت روح الواحد.
وحين جئنا إليه قال: تفضلوا.
قلناله: احنا اللي أجينا عليك من مده وطلبت منا هذول الأوراق, فاكرنا؟ قال: اممم صح, بس القاضي اليوم مجاز, وشغلتكوا ما حداش بحلها نهائيا إلا القاضي نفسه...هذي مسأله يجب أن تتم بغاية الدقه..روحوا الآن على زميلي فلان الفلاني, وشوفوا شو راح يحكيلكوا, ذهبنا إلى مكتب الزميل ولم نجده, بقينا بانتظاره حتى جاء, وحين عرضنا عليه الموضوع قال: اصلا هذه المعاملة مش عندي..هذي لازم القاضي رئيس المحكمة يطلع عليها شخصيا, قلناله: بحكوا إنه مجاز, قال: الآن الدوام انتهى تعالوا بكره, قلناله: ماشي.
عدنا في صباح اليوم التالي ودخلنا المحكمة الشرعية وهي تعج برائحة السجائر والتبغ, وحين وقفنا امام الموظف سألنا: نعم, تفضلوا, ابشو بقدر أخدمكوا؟ قلناله: احنا اللي أجيناك البارحه في نهاية الدوام, شو صرت ناسينا؟؟؟, قال: اممممممم لا والله ما أنا ناسيكوا تفضلوا, عرضنا عليه الأوراق ثم اخذها ودخل بها إلى مكتب القاضي وأغلق الباب خلفه وبعد خمس دقائق خرج من مكتب القاضي وقال لنا: القاضي عايز يشوفكوا.
دخلنا مكتب القاضي وألقينا عليه التحية والسلام وقال في هدوء: انا بصراحه حابب أخدمكوا من عيوني بس هذي المعامله الموظفين اللي عندي كلهم شغل شاي ودخان والله ما فيهم واحد بعرف يشتغلها, قلناله: البركه فيك علمهم, قال: والله شو بدي أقول ولا شو بدي أقول: هظول شغل شاي ودخان حاولت أفهمهم بس ما حداش فهم...امممم, ممكن تيجوني يوم الأربعه؟ قلناله: ليش خير انشاء الله يا فضيلة القاضي كل الأيام خير وبركه وهاظا اليوم اللي شفناك فيه هو أبرك يوم مر علينا بحياتنا, فدخيلين على الله والملك عبدالله تحلنا إياها اليوم..قال: هذي معاملة معقده واللي عندي بعرفوش يحلوها,والله هذول شغل شاي ودخان خلص تعالولي يوم الاربعه...قلناله: طيب بدنا نكرر السؤال فهمنا يعني اليوم ليش ما تشتغلها؟ قال: اليوم مزنوق بالشغل وعندي جلسات اكثيره وقضايا كثيره مش فاضي هذي بدها شغل كبير.
قلناله: ماشي.
رجعنا يوم الأربعاء عليه ودخلنا مكتبه وكان مظلم جدا, وقلناله: احنا اللي قلتلنا تعالوا يوم الأربعه, قال صح, بس اليوم الكهربه قاطعه وهذي بدها شغل على الكمبيوتر, خلص تعالوا يوم الأحد فيش عندي شغل.
رجعنا يوم الأحد ودخلنا على الدائرة وما كانش فيها حدى, دخلنا غرفة القاضي ولم نجده, سألنا عنه المراسل, قال: فضيلته راح يغطي مكان قاضي مجاز في منطقة أخرى, اذا مستعجلين الحقوه محل ما بداوم, قلنا على طول: عبينا السياره بنزين ولحقنا به, بعد ما دخنا السبع دوخات واحنا بنسأل عن عنوان المحكمة أخيرا بعد 3 ساعات بين مسافة الطريق وأزمة المواصلات والسؤال عن عنوان المحكمة, أخيرا والحمد لله وجدنا المحكمة, دخلنا عليها وسألنا عن القاضي, فقالوا: القاضي رجع يداوم بمكانه الاصلي, قلنالهم: نعم صحيح احنا سألنا عنه وقالولنا إنه جاي يغطي مكان القاضي اللي عندكم اللي ماخذ اجازه, قالوا: صحيح...كلامكوا صحيح, بس هو داوم عندنا 4 ساعات فقط لا غير ورجع على مكتبه, الحقوه إذا انكوا مستعجلين, قلت له والدمعة تكاد تسقط مني: يا حضرة المحترم والله اتعبنا...انا تعبت جدا, بعدين حطينا بنزين ب7 دنانير عشان نكمل المعامله وهسع بدنا نرجع على منطقتنا, دبرها الله يستر على ولاياك, قال: والله شاعر معكوا بس أنا وظيفتي محاسب مش قاضي ومعاملتكوا هذي معقده ما حداش بحلها غير القاضي الشرعي نفسه, فبعينكوا الله الحقوه...ثم قلت أنا بإستهزاء: بعينكوا الله الحقوه!!!.
وقلنا: لا حول ولا قوة إلا بالله, وقفلنا راجعين إلى قريتنا وحين وصلنا المحكمة سألنا عن القاضي: قالوا: خلص الدوام والقاضي روح تعالوا بكره.
ثاني يوم رجعنا وكان القاضي بمكتبه, دخلنا عليه وألقينا عليه التحية والسلام, قال الكاتب الذي يجلس بجواره: يا فضيلة القاضي هذا جهاد العلاونه, أكبر كاتب ساخر معروف وروائي وشاعر وناقد وسياسي أعتقل عدة مرات وتم مطاردته بسبب كتاباته الدينية.., فقال القاضي: يا سلام النا الشرف بالتعارف عليه, إجلس يا ولدي, فجلست: ثم نظر لي وقال: خير انشاء الله بشو بقدر اخدمكوا؟ قلناله: أطال الله عمرك احنا اللي اجيناك من شي 10 عشرة أيام على شان معاملة الباص والوكالة والتنازل....إلخ, قال صح صح, وين أوراقكوا: قلناله معنا, قال: هاتوها, اعطيناها له ثم قام بتقليب الأوراق وقال: روحوا على المحاسب, قلناله: ليش على حساب انه المحاسب شغل شاي ودخان وما حداش بعرف يشتغل هذي المعامله إلا أنت!! فقال: صحيح, بس عليها دفع رسوم, روحوا ادفعوا الرسوم وتعالوا, رحنا لعند المحاسب: نظر المحاسب بالأوراق وقال: ليش القاضي وداكوا علينا؟ قلناله: هو حكا, قال: لا ما بصيرش, أرجعوا عليه, وحين قفلنا راجعين من نفس الطريق تقابلنا مع مراسل الدائرة فقال: شو مالكوا يا جماعة الخير شو في؟ قلناله: يا رجل معنا معامله معقدة جدا ما حداش بحلها إلا القاضي, قال: هاتوا اشوفها, قلتله: شو بطلع بيدك عليها؟ ههههه وضحكت ضحكة من اعماق بطني خرج ضجيجها, فقال: هات, قثلتله: اتفضل, تصفح الأوراق ورقة ورقة ثم قال: إنتوا معاملتكوا جاهزه بدهاش إشي, قلناله: كيف يعني, قال: مش معكوا وكالة من المحكمة الشرعية؟ زي ما هو مكتوب هون؟ قلناله: آه, قال طيب: معكوا 3 ليرات ونص؟ قلناله: خذ 5, قال: لا بس 3 ليرات ونص, اعطيناه ال3 ليرات, ورجع على المحاسب وقله: لو سمحت هذي صورة عن الوكالة بالراتب لمن يهمه الأمر, صدقها لي بختم الدائرة, فقال له المحاسب: رسومها 3 ليرات ونص, قله: اتفضل, أخذ المحاسب ال3 ليرات ونصف, وختم الصورة المصورة عن الوكالة, ثم خرج من مكتب المحاسب وتبعناه, ثم التفت الينا وقال: خلص معاملتكوا جاهزه وروحوا فيها وين ما بدكوا, قلناله: والقاضي؟ قال: بلى قاضي بلا بطيخ إمبسمرخلص, الكوا شهر رايحين جايين والله إني حزنان عليكوا, اخذنا المعاملة وخرجنا من المحكمة وأنا أقول: صارلنا شهر رايحين جايين والكل يقول: المعاملة معقدة!!! والقاضي يقول بكل فخر واعتزاز بالنفس: معاملتكوا معقده وما حداش بحلها إلا أنا!!وبالنهاية: الفراش المراسل هو اللي يحلها!!وروحوا وتعالوا على البنك وعلى الضمان وعلى مؤسسة المتقاعدين وجيب شهود وودوا شهود, أه بالمناسبة إنسيت أحكيلكوا عن الشهود: كنا كل مره نأتي بالشهود كنا ناخذهم وانفطرهم لحمه وانجيب لكل واحد باكيت دخان وفي واحد منهم صار يتصل فينا بالليل ومره قال: حاسس عندي مغص وبدي اروح على المستشفى ورحنا وأخذنا, الله وكيلكوا وكإنا جايبينه يشهد شهادة زور...في كل مره كنا ندللهم على الآخر, ندللهم يعني ندلعهم, الله وكيلكوا صرنا فرجه للناس والشهود تحكموا فينا على مدار شهر بالكامل واكثر:لو اني قاضي القضاه بعمل المراسل قاضي ورئيس محكمة مراسل.
#جهاد_علاونه (هاشتاغ)
كيف تدعم-ين الحوار المتمدن واليسار والعلمانية
على الانترنت؟
|
ارسل هذا الموضوع الى صديق
|
حفظ - ورد
|
بحث
|
إضافة إلى المفضلة
|
للاتصال بالكاتب-ة
اليوتيوب
لينكدإن
تيلكرام
تمبلر
بلوكر
الموبايل
