تبرعاتكم وتبرعاتكن المالية تحفظ استقلال الحوار المتمدن، فشاركونا في دعم استمرارية هذا الفضاء اليساري الحر

أمّي .. قالَت

عماد عبد اللطيف سالم
كاتب وباحث
(Imad A.salim)

الحوار المتمدن-العدد: 4926 - 2015 / 9 / 15 - 01:05
المحور: كتابات ساخرة

أُمّي قالتْ : يابه شبيك ؟ هاي سابع جمعة ، وإنته مو على بعضك . بس لا واحد من أخوتك مات ، وإنته متِرضَه تكَلّلي ؟ .
أنا أجبتْ : لا يام . مَحّدْ مات . بس آني صِرِتْ ناشط مدني . وكل جمعة أنثَبُر ثبيرة الله حتّى أخلّي السيد ( العبادي ) ، يسوّي إصلاحات " حقيقية " .
أمّي قالتْ : هاي شوكِتْ صِرِتْ " نَشِطْ " ؟ يوّلْ إنته طول عمرك لتهِشْ ولا تنِشْ . وفوكَاها من تزوجِتْ كَمِتْ تخاف من " مِرْتك " خوفة الحيّة . ومن الخوف صار عندك فقدان ذاكرة مُزمن . وكلّ سنة يالّه تتذكّر عندك أم .
أنا أجبتْ : يُمّة شوفي . أولاً أنا ناشط ، مو " نَشِط " . و ثانياً آني ما اخاف من مرتي . بس آني دا أعيش بزمن ديموقراطي مدني ليبرالي ، يحترم الرأي الآخر . مو مثلج ، جبتيهه من عهد السلطان عبد الحميد الثاني ، الى 9-4-2003 وإنتي عايشة بالضيم والقهر والأستبداد والدكتاتورية .
امّي قالتْ ، وهي تهزّ يديها ورأسها و فوطتها و " شحّاطتها " إستهزاءاً بي : إي " شِفاية " ؟ وشرايدين من هذا الرجّال العبادي ، من فدوة أروحلك ، وللناشطين مال آخر زمن مثل إشْكولَك ؟ .
أنا أجبتْ : شوفي يام . أوّلاً آني ما أقبل تستهزئين بحركتنا الأحتجاجية آني وأصدقائي . وثانياً إحنه نريد هواية اصلاحات جذريّة ، مو " ترقيعات " . وهاي الأصلاحات نريدها " حِزَمْ " . حزمة ورا حزمة . وبكل حزمة نريد من العبادي يحُطْ واحد من " الجماعة " الكبار .. ويلِفّه بيهه .. وبعد مانسمعله لا حسّ ولا خبر .
أمّي قالتْ : يعني تريدون من هذا الرجّال " الحبّاب " العبادي ، يحُطْ بأوّل حزمة ذاك الرجال . و بثاني حزمة ذاك الرجّال . و بعاشر حزمة ذاك الرجّال . وذولة الرجال " الحبّابين " يجون مثل الملايكة .. و يخشّون بالحزمة ، هيج صنطاوي، وبعد ماتسمعولهم لا حسّ ، ولا خبر؟.
أنا أجبتْ : نعم ماما .
أمّي قالت ْ : نعم ماما !!!! . شنو آني قشمر مال الخلّفوك ؟ واستطردَتْ بإمتعاظٍ هجومي واضح :
شوف يابه . فدوة أروحلك . آني طافرة روحي ، وكَلبي خلصان . ليش متروح من يمّي ، كَبُلْ ما أكَلبَهْ عزه على راسك ، وراس مرتك . و عوفوا هذا الرجّال العبادي بحاله .. وروحوا إنجَبّوا أحْسَنلكُم .
أنا .. لم أجبْ يشيء . فقط " إنجَبّيتْ .. وذهبتُ الى مرتي وقلتُ لها : والله يا مرتي إنتي ملاك . بس هنّه ذنّي الأمّهات من يكبرن يصيرن نَحْسات . و " قنقينة " . وميعجبهن كلشي . واللي براسهن براسهن . والله ما يجرعهن .
بس يا ملاكي الحارس ، بروح الوالد العزيز .. بالجمعة الجايّة لتطلعين ويّايه لساحة التحرير . تره أمّي مراقبة الوضع حيل . وتحبّ العبادي حيل .. ومتحِبْ " الجَناين " النَشِطات حيل !!! .

#عماد_عبد_اللطيف_سالم (هاشتاغ) Imad_A.salim#

ترجم الموضوع إلى لغات أخرى - Translate the topic into other languages

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.

اشترك في قناة ‫«الحوار المتمدن» على اليوتيوب
في رحيل جليل شهباز، عضو هيئة إدارة الحوار المتمدن
في رحيل شاكر الناصري، أحد مؤسسي الحوار المتمدن

كيف تدعم-ين الحوار المتمدن واليسار والعلمانية على الانترنت؟

تابعونا على: الفيسبوك التويتر اليوتيوب RSS الانستغرام لينكدإن تيلكرام بنترست تمبلر بلوكر فليبورد الموبايل