ديوان : كناش حرث الكلام

عبدالعاطي جميل

الحوار المتمدن-العدد: 4908 - 2015 / 8 / 26 - 16:26
المحور: الادب والفن
    

كناش حرث الكلام
.................
لمضيغ
...................
اللي بغا الخير
إيديرو فراسو
ينصح ضراسو
قبل ما يمضغ الكلام ..
.....................
لجرح
.....................
الجرح إيلا ما تطهر
ما يرجع لباسو
مولاه إيقل نعاسو
ما ينفعو مدام ..
.....................
لجام
.....................
الخايف ديما محكور
غارق فتعاسو
ظالم ناسو
ديما لابس للجام ..
.....................
لفاس
....................
واللي حر ما يصبر
إيهز فاسو
يدفع باسو
و يحرث الظلام ...
..........................
صيام
.........................
الفقير عايش مقهور
يترجى ناسو
ما يلبس قياسو
قاهرو الصيام ...
.......................
لقصر
....................
الناعس فالقصر
يدرج فكاسو
طاب نعاسو
وغارق فحلام ..

...................
تجبر
................
النحل تجبر
يقرس من باسو
يسب من قاسو
و ما يرد سلام ..
...................
ساس
................
البيرمخور
حفرو ساسو
عرضو داسو
ما صفا لو طعام ..
......................
نظام
......................
شارد يشعر
ذهبو ارجع نحاسو
كثر تعاسو
ينظم لكلام ..
.........................
لقياس
....................
البحر كيجر
إيلا فات قياسو
يغدر رياسو
حتى فليلة التمام ..
........................
سوارت الربح
...................
لوسط
..................
كبرت بيك
يا الكلمة
طاحت على راسي معانيك
وسط الكور ندور
ما عرفتش حدود سطور
نغمس قلام حزاني فسحور
والناس نايمة تخمم ففطور ..
.......................
ضحكة سارح
.....................

الكانون بلا جمر
يتحير فعراه
وأنا فالدرب وسخ
بلا صابون
ضحكة تحكيها لعكايز
جيت فطلوع الفجر
سبقت الشمس .

وكمرة البارح
كالت للنجوم :
ذاك السارح قريت فعينيه
سوارت الربح .

ولفرساوي فقلب رسامي
نقش مخطوط
بلون جهر
يقول : عشرين فبراير
قوس النصر .
يرمي يمين
يرمي شمال
طوب وحجر ..
شق طريقو بيمان بحر .

وذاك الضر
بجنود القهر واقف
فطريق الشوك
ما يشوف غير كبالتو
وحدها تطيب ..
.....................
لفساد
....................
أناري على شلا دراري
بصوت الحق تلالي
ضد لفساد
لي عشش فلبلاد
حتى دار ولادو
حتى دار حفادو
ياكلو الرمل
يزرعو قاع لبحر
بالخوف والجذام
عبيد مشرطين
لكدام واللور ..
.................
دوام
...............
لي فاتك بليلة
فوتو بجوج ..

راه علام الصح
وكلام الصح
ديرو فكتافك
وحدو يدوم .

وكلام لمخزن
صوف ودار ريحة
وتديه الجيحة
الله يستر ..

الكلام إلى عما سير وخليه
ما فيه فايدة
رفاقتو بالضر زايدة .

والكمرة ديك السمرة
كالت البارح للنجوم
وأنا السارح
قرات فعيني سوارت الربح ...
…………….
ـ سبوب
..............
ها لقلم . ها دواية
اجلس حداية
اكتب سبوب
لهاذ المحبوب .
بقى بلا قراية
عايش بسعاية
بحال لمجروب ..
لهاذ المحجوب ،
الساكن فرزاية
اكتب شي سبوب ...
.....................
لكمرة
......................
كالت ليك الكمرة
ديك السمرة
طلع الكرمة
تشرب
تزرد التين
رزقك كالها ليك ..

نزل تورد
حتى تطيح الحيط
على ماليه ..
حتى يشيط
فوك الشواري
طيح من فوق السلك
البايع والشاري
مع راس الخيط
وما يفكوها دراري ...
........................
لخيط
.....................
هاك ورا
كال المقص
لوليدات الدص
راس الخيط
هدد الابرة بالثقيب
وثقب الشكارا
جمع الشفارا
يحكمو البلاد .
وأنا حارة
تشفي لعدا
بلا عشا وبلا غدا
داكة لوتاد
والجارة فارة
تسرق لعواد ..

فالارض إمارة
بيد لجواد
ودوك الحكارة
جاهم قواد
بلا إجارة
يخرج لوفاد .
دار قيتارة
فم الباب
بلا حزارة
جمع لعواد
كال بشارة
فعين الحساد ..

شد وأرى
ولد القمارة
فالكمرة كالو بان
وساس ليه القمح
والسوسة لعباد .
جمع لحزارة
وجاب صوارة
شهد لحضارة
باسمو كتبو لبلاد ..
ودوك الشمكارة
شافو لي جرى
كالو بالإشارة
طز على اولاد لقحاب
الله يرحم
من جا وجاب ...
....................
ـ لحياح
.................
أنا طايب
وهاري
ما بايع
ما شاري ..
ما واكل
ما خاري ..
حر
فالتحياح ...
..................
ـ بوبي ببابي
.......
وا كيف كيف
كيف طابا ، كيف الكيف ..
وأنا عشقتك طابة
وما عشقت الكيف .
طابة جذابة .
طابة خلابة .
طابة عشابة .
طابة عطابة
وباباك يوشكاد ..

سقوفها شقوق
دخانها سفوف
مع تاتاي ما تحافي
و تبرد الجوف .
نجيك .. نجيك .
ولا ما جاك
نجيبو ليك ..

وا كيف كيف
كيف طابة
ديما عجابة
بعيون خلابة
بيدين حطابة
كنت سرابة سلابة
تحكي فزمان خابابا ..

نجيك واطي
نجيك بوحاطي
وتقولي : بابا جاي ..
...
وتقولي : بابا بابا
بوبي ببابي ..
وأنا بوجادي
أنا بوبي
وبا عروبي .. كناوي
صحراوي
لابس قشابة .. لاوي
بلا تناوي
من عرق زمان ..

أجي أجي
نلعبو حابا
فديك الصابة
ولعروسة لعابة
مخبية دابا
في كاغط الحلوى
تلعب دور قحابة ..

سومك غالي
وتنادي : الشليني أبابا
بابا .. بابا
بوبي ببابي ...
...
كنت نعرفك طابة
بنت الصابة
فزمان ..

ودابا دابا
برد الحال
ولساني ثقال
الميزان طاحت ليه الجرية
من ديك البلية
ضيع صروفو
فالبهتان ..
...
الحركة لي زرعت
فيها راس المال
واقفة تلالي
بلسان الحال
تقول : أويلي أبابا
تباعت لبلاد ..

وكنت فالعرصة
نشرب الدكة
لي تحل الزكة ،
وليت ناعس فلمرسة
مريض بالضرسة
فيدي كرسة كارمة
بلا ما حسنت حسابي ..

وصوت عالي بح موالي :
هواك داني
اسمك جلاني
هواك كواني
هواك شواني
هواك حواني
و الحاكم باعك رخيصة ..

أويلي أبابا
أويلي أبابا
باباك أورا دياشك ..
أويلي أبابا
بوبي ببابي ...
.....................
ـ لبواط
..............
و أنا كنكول ديما :
واش حياتي سقيمة ؟
واش حيلتي يتيمة ؟
مهبول
مشغول
ما باغي كريمة
ما باغي لحيمة
ما باغي نكون بهيمة ..

راسي مرفوع
صوتي مرفوع
بحال ديما .
داخل سوق راسي
خارج سوق ناسي
الخاوي ديما ..

نكول شا
نكول را
راكب حماري
نازل فداري
بحال القلم فالدواية
زاكي كيف المرطوب
على حيط الوقت .

الله يجيب للي يفهمنا
يصبغنا بقرايتو
بدوايتو
بلا صمخ الصداع ...

اللوحة للي فيها قريت
منها دويت
منها ديت صلابة ..

عندي ليكم حلم جديد
تمنيت ليكم حكم لذيذ
تاكلو فيه الكاوكاو
بلا هاو هاو
بالطاي طاي
و بلا ديطاي
الخبز السخون
السكن المضمون
الصحة المرهونة
والمرا بالمونة
و الحق فالشوماج ..

بلا حكرة
بلا شفرة
بلا قهرة
فراش و غطا دافي
و دراري فكتافي
و الحومة فراحة
بلا بوليس
بلا طوبيس ..

فراش وغطا دافي
الضو دايم والما صافي
و الخير وافي وافي
ديال ا لبلاد
يتفرق على الجميع
بلا باشا بلا قواد ..
بلا بواط نوار
بلا بولة ديال المية
يضوا الدوار..

عندي ليكم كلمة
عندي ليكم حلمة
ديرو معاي البال :
الشاري كسبان
و البايع كسبان
و أنا قنديل رفيق لعمى
واش ينفع الما
إلى بقى فالسما ..

الخير يكلو التمساح
و لا يخذو السفاح ..
.....................
لوحة
.....................
اللوحة للي فيها قريت
منها دويت
بها تكويت
و طاحت فالبير
واش يعرف المدير
لسكنجبير ...
...................
ـ بلاد السيكسوفان
....................
لعفو
فبلاد خفو . زفو
على عباد تفو
لهلا يعفوعلى لحم رخيص .
مول الفز كيقفز
فعيد الطنز
فعيد الطز
الله يعفو
على خيزو والبنان
كلسنا عليه كاملين ..

الله يعفو
مولانا ورجانا
سرح العيا فينا
جلسنا عليه راضيين
مضغنا السكات
شي كايشوف شي
للي فيه شي بلية
لهلا يزيدو
ولي كان ضحية
كلاه الحوت
لحم لبلاد رخيص
فسوق البزناسة
والساسة الخساسة
النعاسة فقبة الويل ..

كالت البراحة
البارح
شافت اللحم سارح
فواح
يجلب السواح
فبلاد تفو
لكل يعفو
ولميزان طاح
وخسر الطرح
بنانا بنانا
لكل مواطن
نوسعو باب الدرب
وما يبقى غيار
وللي عطا ظهرو
للعمالة الصعبة
لهلا يقهرو
آمين ..

فبلاد تفو
واحد كاري حنكو
واحد حاضي زكو
ليفزو بيه القومان .
الله يرحم السلاوي
ماتسمع غير أوكي أوكي
فبلاد الترمدان
ولخيزو والبنان ..

فتوى تابعة فتوى
فعين لبراني
تابعة الفتوة
ولادنا الصغار
فالحضار
فالبيار
فباب الدار
يتصيدو ويتكالو
كيف لحلوة
كيف شكلاط
بضاعة اولاد الصغار .

فبلاد السيكسوفان
بالمجان
والدعوة مقبولة
فالميزان
والعفو مضمون
لكل محروم
وللي دوا يرعف
وللي ما عرف يعرف
فبلاد الترمدان .

حنا رهن الإشارة
السمع والطاعة :
"عليك أمان عليك أمان
لا ثقة فنظام
ولحكومة والبرلمان .. " ..

وحضي كرك
لاي ضرك
فبلاد السيكسوفان
نوضو كاملين
نحميو قاعنا
وقاع اوليداتنا
قبل مايفوت زمان ..

لا ثقة في النظام
ولا فالحكومة
ولا فالبرلمان ...
.................
ـ الكلام يزلق
..............
علاش ؟؟..
ما عرفتش علاش
ما عرفتش علاش
قلبي يخفق
عيني تسبق
ما عرفتش علاش
كلمة تزلق
و يتبعها كلام ...

ما عرفتش علاش
يدي تسكي
الشجر يكبر
عيني تنقي
و الزرع يثمر
خير وسلام ...

ما عرفتش علاش
ما عندي سوق
ما عندي بوق
ما عندي جوق
يزوق السلام ...

ما عرفتش علاش
الراس شاب
القلب طاب
داير عقلي فحجاب
و نتسناه بالباب ...

ما عرفتش علاش
سافرت كثير
و مازلت صغير
ما عرفتش علاش ..

ما عرفتش علاش
إلى عطيت الكلمة
نموت فيها
و إلى شفت الحكمة
نطيح فيها
كيف العمى فالظلمة
ما عرفتش علاش ...

ما عرفتش علاش
قلت ليه :
إلى كنت قرطا
طيح معيا لوطا
كون محراث الوقت
لا محراب الصمت
ما عرفتش علاش ...

قلت ليه :
البكا غير بكا
مورا الميت و لا قدامو
البكا غير بكا
ما ينفع بفمو ولا بنغامو
ما عرفتش علاش ...
.....................
ـ الوقفة كلام
.............
الكلام تعرفو
من الوقفة
وخا يعطيك بالظهر ..

والكلمة برا
تقراها تبرا
مطروزة بالسر ..
هاك ورا
بلا حزارة
نديو و نجيبو فالكلام
حتى يطيب الزهر ..

الكلام تعرفو
من الوقفة
و خا يعطيك بالظهر ..
تعرف خوه
من الخلفة
و خا يعطيك بالظهر .
و يعرفك
من الرجفة
و خا يقل النظر ..

كلمة مني
كلمة منك
نطلعو دروج
بجوج
نبنو بروج الربح
نطلعو لسطاح المعنى
نشربو عيوط
حتى يسكر الفجر ..

الكلام تعرفو
واقف على الصح
وخا يعطيك بالظهر ..
..............................
ـ بلا ريال بلا جوج
.......……………………..
كلام السوق
ديما الفوق
سوموغالي
فوق الميزان
كيف لعلام عالي
و العيوط خارجة
من الصابة كذابة
تحت السمطة
تخبي الكلام .
دايرة فوضى
تحت لحزام ..

فرشت هيدورة
من دم لحروف
وأنا كيف لخروف
ديمة هربان
من فم الزريبة
القريبة من الذيبة
كيف يخرج كلامي
موضي وضوي
في صهريج النحل
ديال العناد ؟؟..

وبالطرح نحمي خبز
مجروح بلا حرب
وسل من فم النشبة
حكاية دواية
نحطها حداية
ولساني ينطق
يكتب كيات ؟؟ .

لي مات على بلادو
وولادو فالزناقي
فالحلاقي يسعاو
باب الله مسدود
ليلهم ولى نهار .

والوقت خاسرة
كيف ماليها
والعدو داخل خارج
كيف ذكر حايل
راسو عالي
ما فيه يدام
وهاذ السما مسمومة
مغمومة .. مثقوبة
وما يطيح منها ريال ...
............................
ـ لحروف
........................
الحروف خوت
من كرش وحدة
كل واحد ورسمو
كل واحد وسمو
يكبرو فالمعنى
يكونو قبيلة
تتسمى القصيدة
..............
ـ قديم
.............
قديم و بالي
و ما خرج
من بالي ..
...................
ـ سيدي
...............
سيدي قناص
و عينو عورة
سيدي وكال
فالطلعة
ولحدورة ..
...............
ـ البلاد
..............
لبلاد بقرة
وقيلا ثور
والحلابة بلا دور
شي يحلب من لقدام
شي يحلب من للور ..
................
ـ الطير
............
طوير طار
و قلز فوقو
ما شاور مولاه
ما شاور رفيقو ..
................
ـ لمعطعط
...............
ظهرو فاح
و جلس حدايا
باه براح
و مو عطايا ..
................
حكاية اليوم
....................
لغة الفارة
حكارة
تصول
وتجول
بمرسوم ..

كلام جدي
دصارة
ممنوع
فالجوامع
فلكتوب
ما عندو سوم ..

جدي كان عايق
خباني فشونو
وأنا مازال نونو
فحفيرة نعوم .

خباني فغواتو
زرعني فدواتي
حتى نشفات .

خرجت منها فازك
نكتب بصمخ حمق
حكايات اليوم :
حكاية موكة
مولات لعيون
و السبع الداصر
الخاسر
للي غلبو النوم
بعدما سكر .

و السبع الفرماش
عايش بفرماج الروم
لحم الصيد
بزاف عليه ..

خليلني ساكت
فدواخلي كلام
يغلي
منو نشرح برارد
و يشيط الخير ..

خليني ساكت
لساني نساني
ومن الخوف
تلف لحروف ...
.....................
ديك الشجرة
...
ديك الشجرة
للي تتعنى بها
تحاول تطلع ليها
بت أنا فيها ليلات ..

قطفت منها ثمرات
لبحالك خليت الباقي
بعدما نزلت راوي
وعيني شبعات ..

الشجرة للي تتعنى بها
بهاذ اليدين
بهاذ العنين
تسقات ...
…………….
الكلة
............
الكلة فالسلة
و السروال محلول
تظنو مهبول
غادي ماجي
يسبقو الكلام
قد قياسو
جاب نعاسو
و طال عليه الليل ..

و الكلة فالسلة
و الكلة ما فيها ما
ما فيها عسل
و فيها ظل يطل
جبد السبسي
و المطوي
و هو يطوي
لسانو
و جبد قلامو
يكتب و يجدب ..

و لالة الكلة فيها شريبة
و لالة الكلة فيها حليبة
و شدك دلخبز كافي
و زيتون حافي
بفمو يرسم لوحات
بعينو يكتب غمزات
بلبيض و لكحل
و يجبد عليه النحل
قد قياس الخير
جاب راسو فبير لكلام ..

شدوه البارح
كان فهمو سارح
يكول :
عاش الشعب .
عاش الشعب .
فوضح النهار ...
................
كتبت مابين 2000 و2015
..................
عدد الصفحات 108
..................

#عبدالعاطي_جميل (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات