يا عظيمة باعشقك

أسرار الجراح

الحوار المتمدن-العدد: 4883 - 2015 / 7 / 31 - 03:55
المحور: الادب والفن
    

يا عظيمة باعشقك
أسرار الجراح

يا مصر يا أحلى صدى شق الندا فوق النجوم
اتمخطري بصي بشموخك للجبل ..
وقوليله شايف قد ايه عمري أنا؟
ده انا عمري أكبر من نقوش في سلسلة
سجلها تاريخ وحضارة اتنزلت
واتدونت
قبل الهرم بصمة حكيمة اتفجرت
بين الخطاوي خَطّي أكد خطوتي
بعد الهرم
قمة وحضارة فيها من كل العجب
بين الخرافة والخرافة والرسالة والرسل
تهليل بدينّا اللي اتكتب
وبكلمة أرفع راسي فيها للسما
هي" ادخلوها آمنين "
وبحق رفرف فوق ديانات الإله
مجد اتحفر
من جوة شق النيل وكان بيه الحجارة اتمصرت
فيّ العروق اتحضرت
واتحررت
من أول العهد اتولد
كوني ودارت بصمته
واتحدى كل اللي يهدد صرخته
مصر الحضارة دي أنا !
وجبيني مرمر زي أحلام الزهور
واكبر كمان من لون تناديه الليالي بظلمها
واصغر رضيع فـ الحضن عارف دنيته
راسم هرم فوق نسر يسبح ع الغيوم
وعروسة بخيوطها تنام
فوق كف يحضن بين صوابعه حلم جيل
نايم ونيله فرشته
وبقلب أخضر عينه صادت سكته
يضحك مع طيور الحمام
يمسك جديلة وسنبلة
يكتب حروفه بلون يغني للعلم
أو شمس ترقص مع ربيع ..
حالف وأقسم إنه لازم يبقى حارس وردنا
دايما يغني لارضنا :

" يللا يا غيط القطن زهر في البلد
وتعالى شم الفل , يا نحل البلد
قومي يا بنتي وارقصي وخللي الهوا
يجمع وراكي عشق نخلك والنوا
رش السواقي بفرح نيلك يا ولد "

"خللي الفراشة بلون خضارك تسحرك
واوعا تسمي الضعف قوة ويكسرك
نقطة عرق تسبح على جبينك شرف
كلّك يامصري فوق جبين الكون شرف
مصريتك دينك وارضك يا ولد"
غنيت بقلبي وعقلي أحلى أغنية ..
يا مصر عاشقاكي أنا
باعشق قديمك والجديد
وفرشت فوق نيلك سنين العمر ورد
صيفك يدغدغ
وبشموسه نور يشعشع سمرتي
والضم زهور الأمنيات
اللي تزهزه طهري في فصل الخريف
واستنى أيام الشتا
بحنين وشوق وأنوثة تنقر عطرها
وبلون نجوم ترقص طرب
والناي يقول :
"مصري أنا"
واجمع طبول الليل واصهلل في السهر
وامسح بانفاسي ضباب الصبح واشرب قهوته
متحوجة بأحلى هوا
رايق وصفارته ندا
شَمْشَمْ شبابيك البلد
صبح علي وقلتله :
اديني بوسة من شفايفك واملا فنجاني أمل
واحضن شموخي ولف بيِّ ف كل حارات الوطن
طلعني مرة ع الرصيف
نزلني مرة من رصيف
خذني "لخوفو" المعجزة
ماتخافش من "خفرع" ده عدله معضلة
وانساني أحلم فوق أماني الحلو الاصغر "منقرع"
علمني أقلع كل لبس الجهل وابقى عارية
خلصني من خوفي اللي غطّى لون بياضي بالفشل
ده انا نفسي اتنطط واصَحِّي الجرأة واكسر غربتي
جوه العلم "والعق" كرامتي من براءة نهد غارق في الهزل
أدمنت خمر النيل وباعشق رعشته
والطعم يسحرني بخجل
طعم اللقا من غيرقبل
طعم العسل
طعم الرحيق المر في بق الغني
وقصور مايعرفهاش هَنَا
تلقاني جوه الحزن دمعي ضحكتي
واسمع زئيرالغش لما يقول رضاكي دنيتي
والأرض وانتي عزتي
وازاي بقى
وايه العمل
مقدرش احوشها ضحكتي
أصل الحقيقة الفلم عمره كم سنة!!
ولحد دلوقتي أنا ماعرفش مين هو البطل
؟ فين الحقيقة في الدجل
والنسر ليه صورته بقت متغيرة
مقدرش اشوف النسر يكتم صرخته
ولا حتى ارضى النيل ينزل دمعته
يا ألف آهة تشق قلبي ومهجتي
العشق لو سرك , أنا
أسراري مصر وعشقها يا كل فرحي
ابقي قربي
وارقصي
بنشوة غرام
خليني باسمك قبلة لوْنْها له ترانيم الحمام
عايزة أدوب بحضن أم
يللا احضنيني
وارمي حملك فوق كتافي والألم
يا أحلى من أحلى أمل
فرشك حصيرة بين ضلوعي وقعدتك
فوق الكفوف
الحنة ترسم ْبسمتك
من دمي اسقي الأرض واروي النخل واستني البلح
واروي المرايا من زهور الياسمين
قومي اغرسيني تحت عشبْ اتْبَلْ من أشرف عرق
أو بلليني بساقية ما تخافش المطر
وبوقت يحلى بالحكاوي
اوعي خوفك يغلبك
واحكيلي عن معنى المدينة والدول
واصحي وصحيني أصلي في الحسين
أو دقي أجراس الكنايس للصلاه
وتدخليني قصوروقلعة ومنضرة
واحميني في سطرك كحرف وكلمته
سيبيني أقرا الفل من عطرك بلد
مبلولة صفحاته بحكاوي شهرزاد
واقرا بتواريخك سما
وارفع على كتفك جفوني بكبرياء
واحلم ونفسي الحلم يبقى بلونه زي ما باعرفه
وردي وهواكي يلبسه
واقريني اسم هتعرفيه وهيعرفك
شايفك في دمي غنوة بتشق المدى
شايفك في روحي أحلى موال ابتدا
مَعرفش من بين الفصول
إلا الربيع ولوحته حبك بين عروقي لوِنُه
إنتي رسمتيني انا
وانا جوه طينك كل كللي هارسمه.

#أسرار_الجراح (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل