صنانير الغدر بالدهلة تتوسّد

كريم ناصر
(Karim Nasser)

الحوار المتمدن-العدد: 4786 - 2015 / 4 / 24 - 07:33
المحور: الادب والفن
    

إلى بطل
ــــــــــــــــ

لكَيتك راية تنذر روحها بكل ود
لكَيتك جدول يورّد
لكَـيتك مزهريّة وريحها اتفرهد
مثل طير البراري ابسمه كَلبي انهد
أحس نبضة شرايينك مجامر نار
وكلمن عاشرك يلكَه شمـس تمتد
يسيف المنثلم نصله ولا طخ راسه واتغمّد
تلالي بالسمه اهلالين
ودمّك حار مايبرد
تضوّي اعله المحطّه اشموع تشبخ ليل سد إبسد
إجت ريح اعله طارينه تنث اسموم فوكَـ الخد
صنانير الغدر
بالدهله تتوسّد
وشيهمّ البحر نكَلة جزر لو مد
***
إبضوه جروحك دبيب الكَاع
سيف ايشكَكَـ الظلمه
يلن روحك سمه ونجمات
كلما ينكَطع كَلبي أطيح بركَبتك ذمّه
تضوّي ابكل مسافات الوطن
والريح
وهواك لشهكَة المصيوب
يتغاوه مثل نجمه
***
إجدامي ما تزل خطوه تدوس ابسجّة ادروبك
إجدامي تطرد الوحشه تريد اتعسكر بصوبك
***
إبسموم الكَيظ أمدّ إجفوف/
يا نغمة حنين وشهكَة الملهوف/ روحك ما تهاب اتحد السيوف
وتغبش ساعة الشدّه وترد الباغي مجتوف
تنطر ليل المدلهم
وما تفحط
أحسّك كَاع للبردي
وبيت اضيوف
حناجر تشبكَـ الجيلات
تطرّز سمه إولايتنه
يمن خطّيت فوكَـ النجم والحرثه
دواير موت
أكَلك روف من خيط الشمس لجروحي واجروحك
حلو ابعلو النخل والفاله متلوحك
نسر جرحك
وخناجر طيفك احجاره
تحزّ اركَاب اعادينه
وصمَختْ ابكَاعنه ابساتين يالشايل صوارينه
تعلّمتك اطويره اتشلبه بثوب الوطن
والتين
عبرت الهور غابة وطين
تعلّمتك تكحل اجروحك الوكحه ابيارغنه
ولك يا كرّة اعيوني وضوه ادروبي أحضنك فَي نخل لو ياس؟
أريد الكَاك كَمره اتسد ظلام الناس/
ضمني لصدرك المهيوب طيرين
وصريفه اتنوح
كلشي ايهون لجلك يا نباعي الروح
كلشي ايهون
***
غريبة ابساعة الشدّات روحي اتموت
أهي وكّفه اعله حد السيف روحي اتموت
ممحله الكَاع ياكل من جرحهه الدود/
صدّكَني يبو الطيبات خلصانه الليالي السود/
صدّكَني أزامط بيك واشفافي تبوس الكَاع
أكَوم بشيمة التفكَه وضوه البارود/
تتحدّه ابعزم عيني سواد الليل/ شنهي الليل حتى الطير يضحك ما يهاب الغيم/ والصيهود
يا هيبه
يلن اسمك ابشريان الكَلب مشدود/
أهي دونك سفينتنه بلا قبطان/
وأهي دونك صريفتنه بلا عامود/
هلهلْ ياضوه البارود/ لشفاف الفرات وضحكة الشلّال أبد ما ينخر اعظامي البرد والدود/
أدريبك شهم مغوار/
أدريبك طبايع دم
وتطلب ثار/
تاريخك يمرّ ابكل كتر نجمه تشعّ انوار
إذا جان الرصاص ايشكَـ جبين الكَاع مثل النار/ شنهي النار/
أهو دمّك مثل دمّ الشمس ينزف
ويخنكَـ ليل/
يتمرجح ابوسط الدار/
أصعد بيك حد النجمه كل ليله
أسامر طيفك النوّار/
أشتاكَـ لطـواريَك/ تصير إحجايتي اكحيله
صدكَـ لفحة جناجيلك بحر هادر
صحيح الماي ما يتعب
وكل لحظه يغنّيلك ألف شاعر.

#كريم_ناصر (هاشتاغ)       Karim_Nasser#          

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
في رحيل جليل شهباز، عضو هيئة إدارة الحوار المتمدن	في رحيل شاكر الناصري، أحد مؤسسي الحوار المتمدن

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل