اذا جان بكردستان هيج فساد؟؟؟فالله يساعد فقراء بغداد

نوري جاسم المياحي

الحوار المتمدن-العدد: 4390 - 2014 / 3 / 11 - 08:16
المحور: اليسار ,الديمقراطية, العلمانية والتمدن في العراق
    

اكولكم وعيون كلمن جفت دموعه من البجي على ا هل العراق ...تره اني هم عيوني تذرف دموع الالم والحزن على اللي صار بينا واللي جاي يصير يومية ...واكول الكم واسمعوني زين ياهل العراق ...الله يستر من الجايات ؟؟ الله يستر عليكم وعلينا من ناس ما عندها لاذمة ولا ضمير ولارحمة بالقلوب ...
صار فترة قررت وي نفسي ان ابطل الكتابة لان وصلت الى قناعة وهي لاشعبنا ولاحكومتنا ولانوابنا ولاسياسينا ما يفيد بيهم الحجي ...
شوفوا الفقراء والبسطاء والمساكين شلون يومية ينكتلون ويموتون بالشوارع بالمئات وبالالاف وتنهجم بيوتهم على روسهم وما يحركون ساكن وجنهم مثل فورة الحليب .. ساعة الساعة يفورون وبعد يوم ينسون ..الى درجة اكول هيجي شعب يستحق ويستاهل كل ما يسوه بيه ...الاستعمار ودول الجوار والعملاء الارهابيين ..والسياسيين والفاسدين ..
البارحة سمعت خبر يكول ...ان السلطات الصحية في اقليم كردستان وبحملة واحدة ضبطت 900 طن من الادوية الفاسدة .. فوقفت عند هذا الخبر حائرا ومتسائل ...اذا جان بكردستان واصل الفساد والخيسة لهاي الدرجة ؟؟؟لعد عدنا ببغداد ولاسيما ومثلا في مدينتي الصدر..او اهوار الجبايش والشعلة ومهجري واهالي الفلوجة والانبار ..شأكو من خيسة وشلون حالهم ؟؟؟ اكيد الخيسة واصلة الى كوكة الراس ؟؟
كلنا نعرف انه في اقليم كردستان يوجد ريس سبع وحوك وكول وفعل ..واخو اخيته وحتى البعض من العراقيين يوصفه ويشبهه بالحزم مثل المرحوم صدام حسين .. وكلنا نعرف اليوم ببغداد تايهه الحسبة ..فلاحكومة مال اوادم ؟؟ ولا مجلس نواب مال اوادم ؟؟ ولاريس عدنا مال اوادم ؟؟ وحتى ما عدنا اوادم مال اوادم ؟؟
كلكم تتذكرون ... جان عدنا مفتش صحة وجماله (من اهالي النجف الاشرف ) ويقال انه من قادة حزب (الدعوة الحاكم ) .. هو ومراته ( الله يستر عليها ) ..لعبوا بقطاع الصحة وبوزارة الصحة ..شاطي شباطي وجولة ... وأخيرأ احيل الرجل على التقاعد بتهم فساد توصف بانها ازكمت الانوف ..وولكن الاخ وكبقية الفاسدين وحتى يومنا هذا (كما يشاع )بفضل صداقاته للريس و قابلياته البهلوانية ..حر ولازال يصول ويجول .. ويلعب شاطي شباطي كما يقول العراقيون ..
الله وكيلكم يامن تقرؤون كلماتي هذه .. ان قطاع الادوية والصحة في بغداد خاصة والعراق عامة كارثي وفاسد حتى النخاع ...وهو اسهل طريق لكي تصبح غني وربما مليادر ... الله وكيلكم ومحمد كفيلكم والعباس ابو راس الحار يكسر ظهري اذا كذبت عليكم ...اعرف واحد كعيبر وكلاوجي اصلي وما عنده علاقة بالادوية لا من قريب ولا من بعيد .. يستورد شاحنات من الادوية وصار ملياردير ...والامثلة على الفساد كثيرة يعرفها اصحاب المهنة الصحية الشرفاء ...
وانطيكم مثل بسيط واحدنا يروح يشتري دوة مكتوب على القوطية 20 او 30حباية يفتحها يلكة بيها 10 حبابي .. وبس رب العالمين يعرف هي صالحة لو اكسباير ؟؟ لان اكو هسه ظاهرة ...واحدنا يزلط الدوة زلط وما يشوف عليه فرق او فائدة ؟؟
انطيكم مثل اخر ...قبل فترة ظهري وجعني ورحت للاختصاصي ..وخلال الانتظار لاحظت ان سكرتيرة الطبيب تطلب من كل مريض يطلع من الطبيب ان يشتري الادوية ويجلب الادوية بحجة للتحقق من صحتها .. والغريب يعود المريض من الصيدلية وهويحمل علاكة جبيرة ( مثل هاي اللي نستخدمها عندما نشتري البطاطا والطماطة )متروسة ادوية وبكميات تلفت النظر .. حتى في احدى المرات ... كانت المريضة مسكينة وعجوز ... فقلت لها الله يساعدج على هاي الكمية من الادوية ...انتي يراد الج صيدلية ... ولم اكن اعلم ان السرة راح يوصلني مثلها.. وفعلا نفس الشي صار معي ..
اني بيه عادة ..اجيك الدوة وي ابن اخي الصيدلي لانني اثق به لانه صيدلي عتيك ... وبعد شراء الدواء ذهبت اليه ..فسألت ابن اخي عن رأيه بادوية الطبيب ونوعيتها ...فقال كلها مسكنات وفيتامينات ولزكات ... وعندما سألته ...شدعوة هلكد ( عشرة شيتات مسكن مثلا) ...اخبرني ضاحكا ...اكيد الطبيب متفق مع الصيدلي او قد يكون الطبيب نفسه صاحب الصيدلية ؟؟؟ وسألت ابني عن ثمن الادوية ..قال 100 الف دينار ... وبربكم اني متقاعد ...رحم الله ايام الخير من جانت الحكومة تداوينا بلاش والادوية كلها امريكية اصلية ولا هي مغشوشة ولا اكسباير ...طيح الله حظ هيجي حكومة وهيجي شعب وهيجي حرامية فاسدين ...
ايام زمان كانوا يوصفون الاطباء وذوي المهن الصحية برسل الرحمة .. ولكن للاسف البعض ممن دخلوا المهنة شوهوها و اساءوا لسمعتها ..لاننا فقدنا قيمنا واخلاقنا .. والبعض يطالب الناس ويضحكون عليهم...روحوا انتخبوا حتى تغيرون .. عمي ...الشغلة كلها خربانة وماتصير الهه جارة ؟؟؟
اللهم احفظ العراق واهله اينما حلوا او ارتحلوا

#نوري_جاسم_المياحي (هاشتاغ)      

---

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل